БАЙРАМ МУНОСАБАТИ БИЛАН АМУДАРЁЛИК АЁЛ-ҚИЗЛАР ИШТИРОКИДА СПОРТ МУСОБАҚАЛАРИ ЎТКАЗИЛДИ

Халқаро аёл-қизлар куни муносабати билан юртимизнинг барча ҳудудларида турли маънавий-маърифий, кўнгилочар тадбирлар ўтказилди. Корхона-ташкилот ва муассасаларда “Аёл борки, олам мунаввар”, “Аёллари қадр топган юрт”, “Сен барибир муқаддассан, муқаддас аёл”, “Қизлар давраси” номли маданий-маърифий тадбирлар кўтаринки руҳда нишонланди. Айниқса, байрам арафасида ташкил этилган спорт мусобақаларида қатнашган аёл-қизларга жўшқинлик улашилиб, байрамни хушнуд ўтказишди.

5-6 март кунлари Амударё туманида ҳам 8 март – Халқаро аёл-қизлар байрами муносабати билан таълим тизимида фаолият олиб бораётган аёл-қиз ходимлар ўртасида “Спорт – саломатлик гарови” шиори остида спортнинг шахмат, шашка, стол тенниси, дартс ва волейбол турлари бўйича мусобақалар ўтказилди. Мусобақалар Амударё муҳандислик техникуми, туман ихтисослаштирилган мактаби ва 40-сонли умумтаълим мактаби спорт залларида ўтказилди.

Мусобақаларнинг очилиш маросимида иштирок этиб сўзга чиққан масъуллар барча хотин-қизларни, спортчи ва тренерларни, тизим ходимларини нафосат ва гўзаллик байрами билан табриклашди. Жамиятимизнинг турли жабҳаларида хотин-қизларнинг ўрни беқиёслигини таъкидлаб, улар ўзларининг билими ва малакаси, тажрибаси ва маҳорати билан юртимиз равнақига, жамиятимиз ривожига мунособ улушини қўшиб келаётганини, жисмоний тарбия ва спорт соҳасида ҳам самарали меҳнатлари, юқори кўрсаткичлари билан эл назарига тушган, обрў-эътиборга сазовор бўлган аёл-қизлар кўпчиликни ташкил қилишини, улар турли нуфузли мусобақаларда улкан ютуқларни қўлга киритиб, туманимиз, мамлакатимиз довруғини оламга ёйишга ўз ҳиссаларини қўшишаётганини фахр ва ғурур билан эътироф этиб ўтишди.

Мусобақаларда туман бўйича ҳудудларда ғолиб саналган иштирокчилар ва ғолиб жамоалар иштирок этишди. Спортнинг шахмат тури бўйича бўлиб ўтган мусобақаларда фахрли 1-ўринни 11-сонли умумтаълим мактаби ўқитувчиси Раиса Сахиева, 2-ўринни 65-сонли умумтаълим мактаби ўқитувчиси Озода Абдуллаева, 3-ўринни 12-сонли умумтаълим мактаби ўқитувчиси Дилором Шомуродовалар эгаллашди. Шашка тури бўйича ўтказилган мусобақаларда эса фахрли 1-ўринни 26-сонли мактабгача таълим ташкилоти ходими Турсуной Тожибаева, 2-ўринни 67-сонли умумтаълим мактаби ўқитувчиси Зулайҳо Бобожонова, 3-ўринни 45-сонли умумтаълим мактаби ўқитувчиси Дилфуза Абдураҳмоновалар қўлга киритишди.

Спортнинг стол тенниси тури бўйича қизғин кечган мусобақаларда 46-сонли умумтаълим мактаби ўқитувчиси Муяссар Машарипова фахрли 1-ўрин, 8-сонли мактабгача таълим ташкилоти ходими Гулшод Машарипова 2-ўрин, 11-сонли умумтаълим мактаби ўқитувчиси Қундуз Камолова 3-ўрин ғолиблари бўлишди. Шунингдек, спортнинг дартс тури бўйича ўтказилган мусобқаларда эса 19-сонли умумтаълим мактаби ўқитувчиси Муборак Машарипова фахрли 1-ўринни, 11-сонли умумтаълим мактаби ўқитувчиси Насиба Камолова 2-ўринни, 16-сонли умумтаълим мактаби ўқитувчиси Раҳима Сапарбоева 3-ўринни эгаллашди.

Баҳсларга бой тарзда ўтган волейбол мусобақаларида эса фахрли 1-ўринни 28-сонли умумтаълим мактаби жамоаси, 2-ўринни 22-сонли умумтаълим мактаби жамоаси, 3-ўринларни 41-сонли умумтаълим мактаби жамоаси ва 32-сонли умумтаълим мактаби жамоалари эгаллашди.

Мусобақаларда ғолиб бўлган жамоалар ва фахрли ўрин эгаллаган иштирокчилар Таълим ва фан ходимлари касаба уюшмаси Амударё туман бўлинмаси кенгаши томонидан дипломлар ва совғалар билан тақдирланишди.

У.Абдураҳмонов, Ўзбекистон таълим ва фан ходимлари касаба уюшмаси Амударё туман бўлинмаси кенгаши раиси.