Спортнинг қўл жанги тури бўйича ҳоким соврини учун ўсмирлар ўртасида ўтказилган мусобақа рақибларнинг муросасиз жангларига бой бўлди

Мамлакатимизда жисмоний тарбия ва спортни оммалаштириш давлат ижтимоий сиёсатининг муҳим йўналишларидан бири этиб белгиланган. Чунки спорт аҳоли саломатлигини мустаҳкамлаш, ёш авлодни соғлом ва баркамол этиб тарбиялаш орқали жамиятда соғлом турмуш тарзини қарор топтиришда муҳим аҳамият касб этади. Спорт мактабларида яратилган замонавий шароитлар ва тажрибали мураббийларнинг ўзига хос машғулотлари натижасида чемпион спортчиларимиз жаҳон миқёсида ўтказилган мусобақаларда юртимиз байроғини юксакларга кўтаряпти.

Бугунги кунда амударёлик ёшлар орасида спортнинг қўл жанги тури билан шуғулланувчи спортчилар кўп. Белгиланган тартибда доимий ўтказиб келинаётган мусобақалар эса иқтидорли спортчиларни аниқлаш имконини бермоқда.

Жорий йилнинг 24 июнь санасида Амударё тумани спорт мактабида ёшлар ойлиги доирасида спортнинг қўл жанги тури бўйича ҳоким соврини учун ўсмирлар ўртасида туман очиқ биринчилиги мусобақалари ўтказилди.

Тадбирда Амударё тумани Мудофаа ишлари бўлими бошлиғи Шерзод Муродов, туман Спорт мактаби директори Чоршам Тажимуродов, фахрий устоз спортчилар, тўгарак мураббийлари ҳамда спортчи ёшлар иштирок этишди.

Мусобақада 10 ёшдан 15 ёшгача бўлган 100 нафардан ортиқ спортчилар ўз вазн тоифасида куч синашдилар. Спортчиларнинг ғолиблик учун муросасиз кечган беллашувлари бош ҳакам Аброр Отажонов ҳамда ёрдамчи ва ён ҳакамлар Комил Қутлимуродов, Бекзод Отажонов, Саламат Жиемуратовлар томонидан назорат қилиниб, адолатли баҳолаб борилди.

Такидлаш жоизки, Ўзбекистон Республикаси Президентининг тегишли қарорлари билан қўл жанги спорт тури аҳоли, айниқса ёшлар, Қуролли Кучлар ҳарбий хизматчилари ва ҳуқуқни муҳофаза қилиш органларининг ходимлари ўртасида янада оммалаштирилиб, соҳа учун моддий-техник базани мустаҳкамлаш ҳамда малакали кадрлар, тренерлар ва ҳакамлар тайёрлашга бўлган эътибор янада кучайтирилди. Бу спорт тури жанг санъатининг бир тури бўлиб, рақиблар қўллардан фойдаланган ҳолда бир-бирига қарши курашадилар. Қўл жанги нафақат жисмоний куч, балки тезлик, техника ва стратегияни ҳам талаб қилади.

Маълумот ўрнида, бугунги кунда Амударё тумани спорт мактабида спортнинг 18 тури бўйича жами 2400 нафар спортчилар машғулотлар билан шуғулланиб келишмоқда. Спортнинг қўл жанги тури бўйича туманимиз ёшлари мамлакат миқёсида ўтказилаётган мусобақаларда ҳам фахрли ютуқларга эришмоқда. Биргина 2024 йилнинг олти ойи давомида ўтказилган Ўзбекистон чемпионати ва кубоги мусобақаларида спортчиларимиз томонидан жами 19 та медаль, шундан 6та олтин, 9та кумуш ва 4та бронза медаллари қўлга киритилди. Шунингдек, туманимизнинг Қиличбой овулида туғилиб ўсган Ўзбекистон чемпиони Лобар Жумабоева жорий йилда Бухоро вилоятида бўлиб ўтадиган Жаҳон чемпионати мусобақаларида 58 кг вазн тоифасида иштирок этади. Бу каби эришилган ютуқлар туманимизда мураббийлар ва спортчи ёшлар учун яратилган шарт-шароитларнинг амалий натижаси, десак муболаға бўлмайди.

“Ҳоким соврини” учун ўтказилган мусобақанинг якуний натаижаларига кўра, 10-11 ёш чегарасида Жаҳоншер Абдурасулов, Беҳрузбек Фарҳодов, Фозилбек Йўлдошев ҳамда Ниёзбек Сафарниёзовлар ўз вазн тоифаларида 1-ўринни қўлга киритишди. 12-13 ёшли спортчилар ўртасида кечган муросасиз беллашувларда Яхиббай Абатбаев, Жавоҳир Оллоёров, Артур Утегенов ҳамда Алишер Мамбетбоевлар ўз вазн тоифаларида рақибларидан устун эканликларини исботлашди. Мусобақа давомида йигитлар қаторида қизлар ҳам абжирликларини намоён қилишди. 14-15 ёш чегарасида қизлар ўртасида ўтказилган беллашувларда Улзада Утепбергенова ҳамда Азиза Сотиболдиевалар ўз вазн тоифасида ғолибликка муносиб кўрилди. Шунингдек, мусобақа давомида ўтказилган профессионал жангларда Миржалол Ярашбаев ҳамда Бекнияз Айтниязовлар ўз вазн тоифасида 1-ўринни енгиб олишди.

Мусобақа сўнгида ғолиб бўлган спортчилар туман ҳокимлиги томонидан диплом ва эсталик совғалари билан тақдирланди.

Аброр Отажонов, Амударё тумани спорт мактаби қўл жанги бўйича катта мураббийи.