Elmiraning hayot mazmuni

Elmira Jumaniyozova umumtaʼlim maktabini tugatib, “men tarbiyachi boʻlaman”, deganida koʻpchilik: “bu yoʻnalishda ish topish qiyin-ku, bolalar muassasalarining koʻpchiligi yopilib ketgan boʻlsa”, deya roʻyxushlik berishmagan. Chunki Amudaryo tumanidagina emas, balki mamlakatimizning barcha hududlarida maktabgacha taʼlim-tarbiya muassasalari faoliyati nihoyatda sust, koʻpchiligi haqiqatdan ham qarovsiz holatda boʻlib, nomaʼlum sabablarga koʻra yopilgan edi.

– Bir kun kelib, bu sohaga eʼtibor qaratiladi, davlatimiz tomonidan katta-katta mablagʻlar sarflab bunyod etilgan binolar shunchaki tashlab qoʻyilmaydi, – ishonch va qatʼiyat bilan gapirdi uni orzulari yoʻlidan qaytarmoqchi boʻlganlarga.

Qalbidagi qatʼiy qaroridan qaytmagan Elmira hech ikkilanmay hujjatlarini Nukus pedagogika kollejining maktabgacha taʼlim yoʻnalishiga topshirdi va sinovlardan muvaffaqiyatli oʻtib, kollej talabasi boʻldi. U kollej diplomiga ega boʻlgan 2016-yilda Amudaryo tumanida sanoqligina maktabgacha taʼlim-tarbiya muassasalari faoliyat yuritar, u tarbiyachi boʻlish orzusini aytganida yaqinlari “bashorat” qilganlariday, oʻz yoʻnalishi boʻyicha ish topishi haqiqatdan ham qiyin boʻldi. Boz ustiga, u yillari bolalar muassasalari xodimlari navbatma-navbat, majburiy tarzda paxta yaganasi-yu yigʻim-terimga, jamoat ishlariga jalb etilar, taʼlimiy va tarbiyaviy ishlar koʻngildagiday olib borilmasdi.

2017-yilning sentyabr oyida Prezidentimiz “Maktabgacha taʼlim tizimini tubdan takomillashtirish chora-tadbirlari toʻgʻrisida” Qaror va “Maktabgacha taʼlim tizimi boshqaruvini tubdan takomillashtirish chora-tadbirlari toʻgʻrisi” Farmon qabul qilib, sohada tub islohotlarni boshlab berdilar. Shundan keyin davlat maktabgacha taʼlim tashkilotlari faoliyati yanada jonlanib, sohaga xususiy sektor ham faol jalb qilina boshladi.

Ikki yil davomida, 2016-2018-yillarda “Barkamol avlod” bolalar maktabida mutaxassis sifatida faoliyat borgan Elmira Jumaniyozova nihoyat orzusiga erishdi: 2019-yildan 6-sonli davlat maktabgacha taʼlim tashkilotida tarbiyachi sifatida ish faoliyatini davom ettirdi. Bu paytga kelib Prezidentimizning qatʼiy nazorati asosida sohada jiddiy oʻzgarishlar amalga oshirildi. Maktabgacha taʼlim tashkilotlarini zamon talablari darajasida qayta taʼmirlash, rekonstruktsiya qilish, jihozlashga alohida eʼtibor qaratildi, hududlarda yangi-yangi muassasalar qad rostladi. Elmira ishlayotgan 6-sonli MTT ham barcha qulayliklarga ega, ikki qavatli binoga koʻchib oʻtdi.

Muassasada yaratilgan shart-sharoitlar, zamonaviy jihozlar, qatʼiy mehnat intizomi va ahillik asosidagi ish jarayoni, bolajonlarnining begʻubor dunyosida yashash va ishlash Elmira Jumaniyozovaning doimiy orzusi edi va u bunga erishdi. Tabiatan tinib-tinchimas, mehnatkash boʻlgan Elmira qisqa fursat ichida oʻz ish faoliyatini nafaqat namunali tarzda ado etuvchi, balki boshqalarga ibrat boʻla olguvchi xodimaga aylandi. Maktabgacha taʼlim tizimida amalga oshirilayotgan izchil islohotlarni, sohaga oid innovatsion gʻoyalarni oʻz faoliyatiga tatbiq etishdan aslo charchamadi. Tinimsiz izlanishlari, oʻqib-oʻrganishlari natijasida kasbdoshlari havas qilgulik oʻziga xos ish uslubi va tajribasiga ega tarbiyachi sifatida tanildi. Tuman va Respublika miqyosidagi koʻrik-tanlovlarning doimiy va eng faol ishtirokchisiga aylandi.

Yaqinda Elmira Jumaniyozovaning hayotida yuz bergan quvonchli voqea nafaqat uning oʻziga, balki barcha yaqinlariga, ayniqsa, 6-sonli MTT da faoliyat yurituvchi hamkasblariga ham quvonch bagʻishladi. “Yil tarbiyachisi” koʻrik-tanlovining tuman bosqichi gʻolibi sifatida mazkur tanlovning Qoraqalpogʻiston Respublikasi bosqichida Amudaryo tumani shaʼnini munosib himoya qilgan Elmira Jumaniyozova Respublika bosqichida ham faxrli 1-oʻrinni egallab, mutlaq gʻoliblikni qoʻlga kiritdi.

– Men bu yutuqqa oʻz-oʻzidan erishganim yoʻq, – deydi Elmira kamtarlik bilan. – Avvalo meni hamisha qoʻllab-quvvatlab turgan muassasamiz jamoasi, hamkasblarim, qolaversa, oila aʼzolarim, menga ilhom, ishonch va joʻshqinlik, ish jarayonimga zavq-shavq baxsh etguvchi sevimli bolajonlarimning mehridan kuch oldim.

Darvoqe, har tong oʻz onalari bagʻriga oshiqqanday, Elmiraga talpinib, muassasa ostonasiga qadam qoʻyguvchi kichkintoylarning oʻziga xos begʻubor dunyosida yashash, ularga quvonch va shodlik ulashish maqolamiz qahramonining hayot mazmuni, ushalgan orzulari, ezgu niyatlarining goʻzal ijobatidir.

Robiya Yoʻldosheva.