YoSh VA IZLANUVChAN OʻQITUVChI

Amudaryo tumanidagi 22-sonli umumtaʼlim maktabining matematika fani oʻqituvchisi Otabek Karimov oʻz pedagogik faoliyatini boshlaganiga hali koʻp vaqt boʻlgani yoʻq. Oliygohni tugatib, oʻquvchilarga matematika fanidan ilk dars bergan kuni hamon yodida. Oʻshanda u bolalarning xuddi moʻʼjizalar olamiga kirganday, hayratlar ogʻushida darsni qunt bilan oʻzlashtirishga harakat qilishlarini koʻrib, chin dildan quvondi va albatta matematika toʻgaragini tashkil etishni koʻngliga tugib qoʻydi. Uning bu niyatini maktab direktori Azimjon Bekberganov ham qoʻllab-quvvatladi. Shu tariqa tarbiyaviy ishlar taʼsirchanligini oshirish, bolalarning boʻsh vaqtlarini mazmunli tashkil etish maqsadida matematika faniga qiziquvchi oʻquvchilardan iborat “Yosh matematiklar” toʻgaragi tashkil etildi.

Oradan hech qancha vaqt oʻtmay Otabek Karimovning oʻquvchilari fanlar olimpiadalarida tuman bosqichi gʻoliblari sifatida olimpiadaning Qoraqalpogʻiston Respublikasi bosqichida Amudaryo tumani sharafini munosib himoya qilish darajasiga yetdilar.

Agar insonda chuqur bilim boʻlsa-yu, tashabbuskorlik va tashkilotchilik qobiliyati boʻlmasa, ayniqsa, u oʻqituvchi sifatida faoliyat yuritsa, oʻz yoʻnalishi boʻyicha biron bir jiddiy muvaffaqiyatga erishishi qiyin. Otabek Karimov oʻqituvchilik faoliyatini boshlagan ilk kunlardanoq nafaqat matematika fanining bilimdoni, balki tashabbuskor va tashkilotchi oʻz ish uslubiga ega pedagog sifatida hamkasblarining eʼtiboriga sazovor boʻldi.

2018-yilda Otabek Karimov tomonidan tashkil etilgan “Yosh matematiklar” toʻgaragi tahsilini olgan bitiruvchi yoshlar har yilgi fanlar olimpiadasining tuman va Qoraqalpogʻiston Respublikasi bosqichlarida 22-sonli maktab sharafini munosib himoya qilib, sovrinli oʻrinlarni egallab kelishmoqda. Har yili toʻgarak aʼzolarining deyarli 90-95 foizi oliy taʼlim muassasalari talabaligiga qabul qilinmoqda.

Shuningdek u Choykoʻl OFYga biriktirilgan yoshlar yetakchisi tomonidan tashkil qilingan “Zakovat” intellektual oʻyinlarida, shashka, shaxmat sporti musobaqalarida ham oʻz oʻquvchilari bilan faol ishtirok etish orqali yuqori sinflar oʻquvchilarining boʻsh vaqtlarini mazmunli oʻtkazishlariga munosib hissasini qoʻshib, nafaqat oʻquvchi-yoshlar, balki yosh pedagoglarga ham ibrat boʻlmoqda.

Uning dars jarayonida zamonaviy texnologiyalardan unumli foydalanish orqali darsda oʻquvchilarining oʻzlashtirish samaradorligini taʼminlashga qaratilgan saʼy harakatlari ham tahsinga loyiq. Ayniqsa, bilim maskanida va oʻzi istiqomat qilayotgan mahallada oʻtkazilayotgan tadbirlardagi faol ishtiroki, mamlakatimizda mustaqillik yillarida taʼlim sohasida amalga oshirilayotgan keng koʻlamli islohotlarning mazmun-mohiyati va uning amaliy samaralarini targʻib qilishdagi faol saʼy-harakatlari ota-onalarga juda manzur.

– Farzandim oʻqimishli, el-yurtda obroʻ-eʼtiborli boʻlsin, degan ota-ona taʼlim- tarbiya tizimidagi izchil islohotlardan albatta xabardor boʻlishi kerak, – deydi Otabek Karimov. – Chunki davlat har bir bolaning kelajagi uchun millionlab soʻm mablagʻ sarflasa-yu, ota-onalar bu haqda xabardor boʻlishmasa, farzandlarining kelajagi haqida hozirdan qaygʻurishmasa, taʼlim-tarbiya ishlarimizda muvaffaqiyatga erisha olmaymiz. Shu bois, oʻqituvchi bilan ota-onalarning hamkorligi juda muhim.

Otabek Karimov oʻz pedagogik faoliyatini boshlaganiga endi 5-yil boʻldi. Oʻtgan qisqa fursat ichida u nafaqat shogirdlari, balki, kasbdoshlari va hamqishloqlari orasida oʻzining samimiyligi, fidoyiligi va qatʼiyati bilan “Otabek ustoz” degan sharafli nomga, el-yurt hurmatiga sazovor boʻldi. Zero, oʻqituvchi uchun ustozlik maqomining oʻzi eng ulugʻ baxtdir.

Robiya Yoʻldosheva.