Tuman saylov komissiyasi: saylovga qizgʻin tayyorgarlik koʻrilmoqda

Ayni kunlarda mamlakatimizda muhim siyosiy jarayon – Oliy Majlis qonunchilik palatasi va mahalliy Kengashlarga oʻtkaziladigan saylovlarga tayyorgarlik ishlari qizgʻin pallaga kirdi. Amaldagi qonunchilikka koʻra bu jarayonga Markaziy saylov komissiyasi, hududiy saylov komissiyalari, tuman va shahar saylov komissiyalari hamda xalq deputatlari viloyatlar va Toshkent shahar Kengashlariga saylov oʻtkazish boʻyicha okrug saylov komissiyalari, uchastka saylov komissiyalari tomonidan puxta tayyorgarlik koʻrilmoqda.

Amudaryo tumani saylov komissiyasi ham bu borada samarali faoliyat olib bormoqda. Tuman saylov komissiyasining qarori bilan bir mandatli saylov okruglari tuzilib, ularning chegaralari, saylovchilar soni toʻgʻrisidagi maʼlumotlar ommaviy axborot vositalarida eʼlon qilindi. Belgilangan muddatlarda Xalq deputatlari tuman Kengashi deputatligiga nomzodlar koʻrsatgan siyosiy partiyalardan zarur hujjatlar qabul qilib olinib, 125 nafar deputatlikka nomzodlar roʻyxatga olindi hamda ularga guvohnomalar berildi.

Komissiya aʼzolari nomzodlarga va siyosiy partiyalarga saylov kampaniyasida ishtirok etish uchun teng sharoitlarni yaratgan holda saylovni moddiy-texnik jihatdan taʼminlashga doir masalalarni hal qilishda faollik koʻrsatmoqda.

Tuman saylov komissiyasi tuman hududidagi siyosiy partiyalar, boshqa jamoat birlashmalari, mahalliy davlat hokimiyati organlari, fuqarolarning oʻzini oʻzi boshqarish organlari vakillarining hamda korxonalar, muassasalar va tashkilotlar rahbarlarining saylovga tayyorgarlik koʻrish hamda uni oʻtkazish bilan bogʻliq masalalar yuzasidan axborotini eshitib, saylov jarayoniga tayyorgarlik koʻrish ishlarini nazorat qilib bormoqda.

Saylovchilar roʻyxatlarining tuzilishini va hamma tanishib chiqishi uchun taqdim etilishini nazorat qilish ham tuman saylov komissiyasining vakolatiga kiradi. Tuman saylov komissiyasi va uchastka saylov komissiyalari saylov jarayonini boshqarish axborot tizimiga ulangan boʻlib, tumandagi saylovchilarning dastlabki roʻyxati shakllantirilgan.

Komissiya tomonidan Halq deputatlari Amudaryo tuman Kengashi deputatligiga nomzodlar roʻyxatga olingan boʻlib, ayni kunlarda nomzodlar va siyosiy partiyalar vakillari saylovoldi tashviqot ishlarini amalga oshirmoqdalar. Saylovoldi tashviqoti doirasida odamlar gavjum joylarga siyosiy partiyalarning maqsad va vazifalari, nomzodlarning saylovoldi dasturiga oid bannerlar  va boshqa targʻibot vositalari joylashtirilgan boʻlib, joylarda saylovchilar bilan uchrashuvlar belgilangan jadval asosida tashkil qilinmoqda.

Bayroq, gerb, yashirin ovoz berish kabinasi, statsionar va koʻchma ovoz berish qutisi kabi saylov jihozlarini uchastka saylov komissiyalariga yetkazish ishlari saylovga tayyorgarlik koʻrish va uni oʻtkazish boʻyicha tuman saylov komissiyasining kalendar rejasida koʻrsatilgan muddatlarda amalga oshirildi. Endilikda tuman saylov komissiyasi tomonidan muddatidan oldin ovoz berish va saylov kuni ovoz berish uchun saylov byulletenlarini tayyorlash va ularni saylov uchastkalariga yetkazib berishga tayyorgarlik koʻrilmoqda.

Tasdiqlangan kalendar rejasiga asosan 16-oktyabrga qadar ovoz berish kuni, vaqti va joyi toʻgʻrisida saylovchilarni xabardor qilish, 16-23-oktyabr kunlari muddatidan oldin ovoz berishni tashkil etish va 27-oktyabr kuni, yaʼni saylov kunida soat 8:00dan 20:00gacha ovoz berishni qonun talablari asosida tashkil etish koʻzda tutilgan.

Ya.Shamuratov, Xalq deputatlari Amudaryo tuman Kengashiga saylov oʻtkazuvchi tuman saylov komissiyasi raisi