Amudaryolik shoira Zulfiya Olloyorovaning 60 yillik yubileyi keng nishonlandi

Xalqimizning koʻngillarni toʻlqinlantirib yuboruvchi anʼanalari, biri-biriga bildiradigan ezgu tilaklari koʻp. Duoga qoʻl ochgan keksalar: “Orzu-niyatlaring amalga oshsin, murod-maqsadlaringga yetgin”, deya tilak bildirishlari bejizga emas. Chunki insonning insonga yaxshiliklar tilashi uning nafaqat ruhiy holatida koʻtarinki kayfiyat uygʻotadi, balki orzulari roʻyobi uchun qanot ham bagʻishlaydi. Bu tilaklar anʼanaviy tarzda insonlarning eng yaxshi, quvonchli kunlarida takror-takror jaranglaydi. Amudaryolik shoira Zulfiya Olloyorova uchun 2024-yilning oktyabr oyi ana shunday goʻzal tilaklar bilan hayotiga fayz bagʻishladi. Aynan ana shu kuni u umrining 60 bahorini qarshiladi.

Zulfiya Olloyorova 1964-yilning 25-oktyabr sanasida oddiy dehqon oilasida dunyoga keldi. Tabiatan mehnatkash va kitobsevar boʻlgan otasi Hayitboy Olloyorov bilan onasi Bibisora onalar ilk farzandi boʻlgan qizaloqqa buyuk otashnafas shoira Zulfiyaxonim ijodiga mehrlari balandligidan, qolaversa, qizimiz shoira boʻlsin, degan orzu bilan Zulfiya deb nom berdilar.

Ota-ona orzusimi, chin koʻngildan qilgan duolarimi, Zulfiya ulgʻaygani sari ijodga moyil, shoirtabiat qiz boʻlib voyaga yetdi. Ayniqsa, uzun qish tunlarida otasi Hayitboy otaning biri-biridan qiziqarli ertak va rivoyatlari, oiladagi 5 nafar qizlarning biri olib, biri qoʻyib sheʼrxonlik qilishlari uning fikri charxlanib, ijod maydoniga dadil kirib kelishi uchun zamin yaratdi. Koʻpchilik shoir va yozuvchilarni katta shaharlar tarbiyalab, kamolga yetkazadi, degan fikrni bildirishadi. Aslida esa haqiqiy ijodkor uchun manzil va makonning ahamiyati yoʻq. Bunga Zulfiya Olloyorovaning hayoti va ijodiy faoliyati yaqqol misol. Zulfiya, avvalo, oʻzining hayot sinovlariga bardoshi, sabr-u matonati bilan boshqalardan farq qiladi.

Ilk mehnat faoliyatini Mangʻit shahridagi xalq isteʼmol mollari ishlab chiqarish korxonasida oddiy ishchi boʻlib ishlashdan boshlagan Zulfiya Olloyorova kech boʻlsa-da oʻz bilimini boyitish maqsadida Amudaryo agrobiznes kasb-hunar kollejida boshlangʻich taʼlim oʻqituvchisi yoʻnalishida tahsil oldi. Baxtli-saodatli turmushiga koʻz tegdimi, umr yoʻldoshi Xolboy Ortiqov 31 yoshida vafot etib, ikki nafar farzandi bilan hayotining qolgan qismini yolgʻizlik oʻz domiga tortganida ham u qalamini qoʻlidan qoʻymadi.

Ijodini, orzularini tushunadigan, uni doimo qoʻllab-quvvatlaydigan aziz insonidan erta ayrilgan Zulfiya bor mehrini farzandlariga berdi, goh yarim tunlarda, bolalari shirin uyquga ketgan pallalarda, goh oʻzi ishlaydigan korxonada tushlik qilgan damlarida dardlarini pinhon tutib, ezgu orzularini qalamga oldi. “Zebo” taxallusi bilan sheʼrlar yozdi, bilimini boyitish maqsadida mumtoz adabiyot namunalarini tinmay mutolaa qildi.

Oʻqib-oʻrganishdan, izlanishdan aslo charchamagan Zulfiyaning intilishlarini zimdan kuzatadigan otasi esa har doim “shoira qizim, Zulfiya qizim”, deb koʻnglini koʻtarib qoʻyishlari unga haqiqiy ilhom lahzalarini ato etdi.

Vaqt – hamma narsaga, ayniqsa, insoning dilini oʻrtagan dardlariga malham, deydilar. Farzandlari ulgʻaygan sari Zulfiya Olloyorovaning ijodiy faoliyati ham takomilga yetib bordi. Ayniqsa, “Barkamol avlod” bolalar maktabida, toʻgarak rahbari sifatida ishlagan davri Zulfiya uchun haqiqiy ijod damlarini ato etdi. Bu yerda ijoddagi ilk ustozi, Qoraqalpogʻiston Respublikasida xizmat koʻrsatgan madaniyat xodimi, mazkur maktabning direktori, taniqli shoira va jurnalist Xonimjon Rajabovadan sheʼriy talablar yuzasidan olgan maslahatlari, deyarli har kuni oʻtkaziladigan adabiy suhbatlar uning ijodida keskin burilish yasadi.

Ustozining qoʻllab-quvvatlashi, begʻaraz yordami bilan 2008-2010-yillar oraligʻida “Muharrir” nashriyotida ketma-ket uchta sheʼriy toʻplamlari – “Ufqqa qoqilgan ishq”, “Dunyoliqda dunyo ranglari”, “Koʻngilning chor nagʻmasi” kitoblari nashr etildi. 2013-yilda esa “Suyemen aq bulttay paklik jolin” nomli sheʼrlar toʻplami “Qaraqalpaqstan” nashriyotida, qoraqalpoq tilida nashrdan chiqdi.

Zulfiya Olloyorova joriy yil 25-oktyabrda tabarruk 60 yoshga toʻldi. Hayotini milliy-maʼnaviy qadriyatlarni mustahkamlash, yosh avlodni vatanparvarlik ruhida tarbiyalashdek ezgu ishga bagʻishlagan shoirani quvonchli kunida muborakbod etish uchun ustoz va shogirdlari, yaqin doʻstlari shu kuni Amudaryo tuman madaniyat markazining tantanalar saroyiga tashrif buyurishdi.

Amudaryo tuman hokimligi tomonidan tashkil etilgan yubiley kechasida tuman hokimi oʻrinbosari Nodirbek Kamolov shoirani qutlugʻ 60 yillik yubileyi bilan tabrikladi va Maxpirat nomidagi Oʻrta Osiyo xalqlari tarixi instituti qoshidagi Turon Fanlar Akademiyasi nodavlat notijorat tashkilotining Abdulla Qodiriy nomidagi koʻkrak nishonini Zulfiya Ollayorovaga tantanali ravishda topshirdi.

Shu kuni ustozlari, shogirdlari mehridan koʻngli obod shoirani tadbir ishtirokchilari turfa guldastalar, goʻzal va ezgu tilaklar bilan samimiy muborakbod etdilar va shoiraga yanada joʻshqin ijod yor boʻlishini tiladilar.

Robiya Yoʻldosheva