18-noyabr – Oʻzbekiston Davlat bayrogʻi qabul qilingan kun

Davlat ramzlari hamisha muqaddas va ardoqli sanaladi. Boisi ularda sevikli Vatanning surati, mehru tarovati, xalqning mardonavor oʻtmishi, bugungi fidokorligi va istiqboli baralla namoyon boʻladi. Ulardan biri Oʻzbekiston Respublikasi 1991-yil 18-noyabrda qabul qilingan Davlat bayrogʻidir.

Bayrogʻimizdagi moviy rang – tiriklik mazmuni aks etgan mangu osmon va obi-hayot ramzi. Timsollar tilida bu – yaxshilik, donishmandlik, halollik, shon-shuhrat va sadoqatni bildiradi. Binobarin, Amir Temur davlati bayrogʻining rangi ham moviy rangda edi.

Oq rang esa muqaddas tinchlik ramzi boʻlib, u kun charogʻonligi va koinot yoritgichlari bilan uygʻunlashib ketadi. Oq rang – poklik, begʻuborlik, soflik, orzu va xayollar tozaligi, ichki goʻzallikka intilishning timsoli.
Yashil rang – tabiatning yangilanish ramzi. U koʻpgina xalqlarda navqironlik, umid va shodmonlik timsoli hisoblanadi.

Qizil chiziqlar boʻlsa vujudimizda joʻshib oqayotgan hayotiy qudrat irmoqlarini anglatadi.

Navqiron yarim oy tasviri bizning tarixiy anʼanalarimiz bilan bogʻliq. Ayni paytda u qoʻlga kiritilgan mustaqilligimiz ramzi ham.

Yulduzlar barcha uchun ruhiy, ilohiy timsol sanalgan. Oʻzbekiston Respublikasi Davlat bayrogʻidagi oʻn ikki yulduz tasviri ham tarixiy anʼanalarimiz, qadimgi yilnomamizga bevosita aloqador. Bizning oʻn ikki yulduzga boʻlgan eʼtiborimiz Oʻzbekiston sarhadidagi qadimgi davlatlar ilmiy tafakkurida nujum ilmi taraqqiy etganligi bilan ham izohlanadi.

Davlat bayrogʻimizdagi oʻn ikki yulduz tasvirini oʻzbek xalqi madaniyatining qadimiyligi, uning komillikka, oʻz tuprogʻida saodatga intilishi ramzi sifatida tushunish lozim.

Davlatimiz bayrogʻi milliy-madaniy anʼanalarimizni oʻzida toʻliq mujassamlashtirgan. “Oʻzbekiston Respublikasining davlat bayrogʻi toʻgʻrisida”gi Qonun 1991-yil 18-noyabrida qabul qilinganidan soʻng, unga 1999, 2005, 2010, 2019, 2023-yillarda ayrim oʻzgartirish va qoʻshimchalar kiritildi. Mazkur oʻzgartirish va qoʻshimchalarning mohiyati xususida toʻxtaladigan boʻlsak, avvalambor davlat bayrogʻining doimiy ravishda aynan qanday binolarda, qanday idoralarning majlislar zallarida, qanday mansabdor shaxslarning xizmat xonalarida, qonun hujjatlari bilan belgilangan bayramlar, saylov va referendum kunlarida qayerlarda, qanday marosimlar paytida koʻtarilishi aniq va batafsil belgilab berilgan.

Jumladan, "Oʻzbekiston Respublikasining Davlat bayrogʻi toʻgʻrisida"gi qonunga oʻzgartirish va qoʻshimchalar kiritish haqida"gi Qonun Prezident tomonidan 2023-yil 8-iyulda imzolangan qonunga koʻra, Davlat bayrogʻidan foydalanilishi mumkin boʻlgan holatlar kengaytirildi, Jumladan bayroq va uning tasviri tushirilgan belgilardan jamoat joylarida, binolarda, yashash yoki ish joylarida, transport salonida; bayroqdan sport musobaqalari, ommaviy, tantanali va madaniy tadbirlarda, oilaviy bayramlarda, xotira sanalarni nishonlashda, jamiyat va davlat arboblari, harbiy xizmatchilar dafn marosimlarida;xalqaro sport musobaqalari hamda Oʻzbekiston chempionatlari uchun sport kiyimlarini tayyorlash uchun bayroqning tasviri tushirilgan belgilardan foydalanish mumkin.

Ayni kunlarda bayrogʻimiz qabul qilinganligining 33 yilligi yurtimiz boʻylab keng tantana qilinyapti.

“Oʻzbekiston Respublikasining Davlat bayrogʻi toʻgʻrisida”gi Qonunning 2-3-moddasida bayrogʻimiz mamlakatimiz suverenitetining ramzi ekanligi, xalqaro munosabatlarda Oʻzbekiston Respublikasining timsoli boʻlishi eʼtirof etilgan. Hozir u jahonning turli nuqtalarida magʻrur hilpirab turibdi. Ayniqsa, sport arenalarida, milliy terma jamoalarimizning ishtirokidagi xalqaro sport musobaqalarini oʻtkazish vaqtida hamda nufuzli bellashuvlarda yurtimiz sportchilari gʻoliblik shohsupasida turganida bayrogʻimizning baland koʻtarilishi qalbimizga faxr-iftixor tuygʻularini baxsh etadi, koʻnglimizni togʻdek koʻtaradi.

Bayrogʻimiz jonajon oʻlkamiz dunyoda xalqaro hamjamiyatning tenglar ichra teng aʼzosi ekanligini anglatadi va oʻzida milliy-madaniy anʼanalarimizni mujassamlashtiradi.

Demakki, bayrogʻimiz bizning gʻurur, iftixorimizdir. Uni eʼzozlash esa fuqarolarda oʻzining qadr-qimmatiga, oʻz mamlakatiga va shaxsiga boʻlgan ishonchni yanada mustahkamlaydi.

Bayrogʻimizda yurtimizning, xalqimizning obroʻ-nufuzi yuksakligidan dalolat beruvchi ramziy timsollar mujassam. Shunday ekan, sarbaland qaddimiz va qadrimiz timsolini hamisha eʼzozlaylik va boshimiz uzra baland koʻtaraylik!

Ona yurtimizdagi tinchlik va osudalik hech qachon bizni tark etmasin, bayrogʻimiz baland-balandlarda Oʻzbekiston deb atalmish jannatmakon yurt shaʼni, shonu shavkatidan darak berib hilpirayversin!

Islombek Matkarimov, Maʼnaviyat va maʼrifat markazi Amudaryo tumani boʻlinmasi rahbari