1-sonli maktabda “Bayrogʻim – iftixorim, gʻururim!” nomli maʼnaviy-maʼrifiy tadbir oʻtkazildi

Davlat ramzlari har bir millatning oʻziga xosligini, xalqning tarixiy xotirasi va orzu-umidlarini ifodalaydigan muhim belgilardir. Bayroq, gerb va madhiya kabi ramzlar millatning erki va mustaqilligining timsoli boʻlib, har bir fuqaroda gʻurur va iftixor tuygʻularini uygʻotadi. Ayniqsa, yosh avlodga davlat ramzlarining ahamiyatini anglatish juda muhim. Bu orqali ularning ona vatanga boʻlgan mehri va sadoqati yanada ortadi, vatanparvarlik tuygʻulari yuksaladi.

Bundan 33-yil oldin – 1991-yil 18-noyabr kuni Oʻzbekiston Respublikasining davlat bayrogʻi qabul qilingan edi. Ushbu sana munosabati bilan Amudaryo tumanidagi 1-sonli umumtaʼlim maktabida “Bayrogʻim – iftixorim, gʻururim!” nomli maʼnaviy-maʼrifiy tadbir oʻtkazildi. Tadbirni maktab direktori Dilrabo Sherboyeva ochib berdi va ishtirokchilarni davlat bayrogʻi qabul qilingan sana bilan tabrikladi. Tadbirda maktabning boshlangʻich sinf oʻquvchilari ishtirok etib, bayrogʻimiz va boshqa davt ramzlari haqida sheʼrlar aytib, maʼlumotlar berdilar.

Oʻquvchilar bayroqdagi ranglar va tasvirlar mamlakatning boy tarixi, hozirgi hayoti va kelajagini oʻzida mujassam etganini, jumladan moviy rang tiriklik mazmuni aks etgan mangu osmon va obihayot ramzi hisoblansa, oq rang muqaddas tinchlik, poklik va begʻuborlik timsoli ekani, yashil rang tabiatning navqironligini va tiriklik ramzini bildirsa, qizil chiziqlar vujudimizda joʻshib oqayotgan hayotiy qudrat irmoqlarini anglatishini sheʼriy usulda ifoda qildilar. Navqiron yarim oy tasviri tarixiy anʼanalarimiz bilan bogʻliq boʻlib, ayni paytda u qoʻlga kiritilgan mustaqilligimiz ramzi ekani, 12ta yulduz tasviri esa tarixiy anʼanalarimiz, qadimgi yilnomamizga bevosita aloqador ekani haqida tadbir ishtirokchilariga batafsil maʼlumotlar berildi. Maktabning boshlangʻich sinf oʻquvchilari tomonidan ijro etilgan sheʼrlar va qoʻshiqlar oʻquvchilarning davlat ramzlariga nisbatan hurmatini yanada oshirishga xizmat qildi.

Darhaqiqat, yosh avlodni vatanparvarlik ruhida tarbiyalashda davlat ramzlari muhim ahamiyat kasb etadi. Davlat ramzlarini hurmat qilish – bu ona yurtga boʻlgan muhabbatning eng yorqin koʻrinishidir.

Bayroq qadimdan har bir davlat, xalq va qavmning gʻururini belgilaydigan ramz boʻlib kelgan. Urushlar va janglarda bayroq nafaqat birlashtiruvchi timsol, balki jangovar ahamiyatga ega muhim belgilardan biri boʻlgan. Jang maydonidagi ogʻir vaziyatlarda qoʻshinning har bir askari bayroqni himoya qilgan, bayroq bor joyda qoʻshin jonkuyarlik bilan kurashgan, chunki uni yoʻqotish magʻlubiyat deb hisoblangan.  Dushman bayrogʻini yoʻq qilish yoki qoʻlga olish uning ustidan gʻalaba qozonishning ramziy maʼnosini bildirgan. Demak, qadim zamonlardan ham bayroq jangchilarga ruhiy kuch bagʻishlab, ularni Vatan va qoʻshin sharafi yoʻlida jangovar harakatlarga undagan.

Nafaqat oʻtmishda, balki bugun va barcha zamonlarda ham bayroq, gerb va madhiya kabi davlat ramzlari yoshlarda vatanparvarlik hissini tarbiyalaydi, ularni oʻz yurtini sevish va himoya qilishga chorlaydi.

Yosh avlod kamolotida bu kabi maʼnaviy-maʼrifiy tadbirlarning oʻrni beqiyosdir. Bunday tadbirlar orqali oʻquvchilarda Vatanga boʻlgan mehr-muhabbat, milliy gʻurur va faxr tuygʻulari shakllanadi. Oʻz tarixini, madaniyati va qadriyatlarini bilgan yoshlar Vatanga sadoqatli, uning rivoji yoʻlida kamarbasta shaxslar sifatida kamolga yetadi. Shu sababli ham Amudaryo tumanidagi 1-sonli umumtaʼlim maktabida turli sanalar munosabati bilan maʼnaviy-maʼrifiy tadbirlar oʻtkazish yaxshi anʼanaga aylangan. Ushbu tadbirlardan koʻzlangan maqsad oʻquvchi yoshlarni milliy bayramlarimiz, tarixiy shaxslarning hayoti va ijodi haqida maʼlumotlar olib, ulardan ilhomlangan holda barkamol shaxslar boʻlib yetishishga undashdir.