Xalq deputatlari Amudaryo tuman Kengashining 4-sessiyasi toʻgʻrisida axborot

2024-yil 27-dekabr kuni Amudaryo tumani hokimligining majlislar zalida Xalq deputatlari tuman Kengashining navbatdagi – toʻrtinchi sessiyasi boʻlib oʻtdi.

Sessiyada deputatlar, tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Kengash raisining oʻrinbosari Madamin Kazakov ochdi hamda olib bordi. Sessiya kotibligiga 4-Beruniy saylov okrugidan deputat Sayyora Jumamuratova saylandi.

Sessiya kun tartibidagi dastlabki masala – Oʻzbekiston Respublikasi Prezidentining 2024-yil 23-sentyabrdagi “Kambagʻallikdan – farovonlik sari” dasturini amalga oshirish boʻyicha birinchi navbatdagi chora-tadbirlar toʻgʻrisida”gi qaroriga asosan Amudaryo tumanida eng ogʻir mahallarni tanlab olish va ularda amalga oshiriladigan ishlar” yuzasidan tuman hokimining birinchi oʻrinbosari Faxriddin Yusupov hisobot berdi.

Hisobotda Prezident qarori ijrosini taʼminlash maqsadida tumanda eng ogʻir ahvoldagi 7 ta – Zahiriddin Muhammad Bobur, Amir Temur, Qangli, Boʻzyop, Kuyuk koʻpir, Oq oltin ovul fuqarolar yigʻinlari hamda Uyshin mahalla fuqarolar yigʻinlari tanlab olingani qayd etildi. Ushbu mahallalarda tomorqa yerlarini sugʻorishni yaxshilash yoki ularga elektr energiyasi barqaror yetkazib berilishini taʼminlash, internet sifatini oshirish, ichki yoʻllarni taʼmirlash va boshqa infratuzilmani yaxshilash maqsadlarini amalga oshirish uchun jami 20 mlrd 650 mln. soʻm mablagʻ ajratilishi rejalashtirilgani xususida soʻz yuritildi.

Sessiya kun tartibidagi navbatdagi masala yuzasidan tuman hokimligi bosh mutaxassisi Jaxongir Haydarov hisobot berib, Oʻzbekiston Respublikasi Prezidentining “Pillachilik soxasida kasanachilikni qoʻllab-quvvatlash hamda pilla yetishtirish uchun ozuqa bazasini yanada kengaytirishning qoʻshimcha chora-tadbirlari toʻgʻrisida”gi Farmoni ijrosini taʼminlash maqsadida tumanda amalga oshirilayotgan ishlar yuzasidan hisobot berdi. Hisobotda tumandagi zaxira yer maydonlari hisobidan 12,2 gektar konturlarni ochiq elektron tanlovga qoʻyish taklifi kiritilib, bu boʻyicha Kengashning tegishli qarori qabul qilindi.

Kun tartibidagi navbatdagi – “Xotin-qizlar muammolarini tizimli ravishda aniqlash hamda “Ayollar daftari”ni yuritish orqali bartaraf etish toʻgʻrisida”gi masala yuzasidan tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova hisobot berdi.

Goʻzal Saburova oʻz hisobotida tumanda xotin-qizlarning hayot va turmush sharoitidagi muammolarini aniqlash, yakka tartibda ishlash orqali ularning hayot tarzini yaxshilash hamda ijtimoiy faolligini oshirish, shuningdek, aniqlangan muammolarni kompleks va manzilli hal qilish borasida amalga oshirilgan keng koʻlamli ishlar xususida soʻz yuritdi.

Shuningdek, 2025-yil uchun Amudaryo tumani mahalliy byudjetining asosiy prognoz koʻrsatkichlari toʻgʻrisidagi masala ham mhokama qilinib, ushbu masala yuzasidan tuman Iqtisodiyot va moliya boʻlimi boshligʻi Javlonbek Jumamurodov hamda tuman Soliq inspektsiyasi boshligʻi Jahongir Rahimovlar hisobot berdi.

Hisobotlarda 2025-yil uchun Amudaryo tumani mahalliy byudjetning xarajatlari 133 mlrd 942 mln 669 ming soʻm miqdorida prognoz qilinayotgani, ushbu xarajatlarni qoplash uchun esa mahalliy byudjet daromadlari va yuqori byudjetlardan ajratiladigan mablagʻlar yoʻnaltirilishi qayd qilindi.

Sessiya soʻngida Oʻzbekiston Respublikasi Bosh Prokuroturasining 2024-yil 25-noyabrdagi “Sektorlarga biriktirilgan hududlar taqsimotini qayta koʻrib chiqish” toʻgʻrisidagi xatiga asosan tumandagi sektorlardagi ishlar samaradorligini yanada oshirish masalasi muhokama qilindi hamda Amudaryo tumanidagi shaharcha, ovul va mahallalar 4ta sektorga qayta taqsimlandi.

Sessiya majlisida kun tartibidagi barcha masalalar yuzasidan masʼullarning hisobotlari tinglandi, atroflicha muhokama qilindi va tegishli qarorlar qabul qilindi. Shuning bilan xalq deputatlari Amudaryo tuman Kengashining 4-sessiyasini oʻz ishini yakunladi.

Charos Arslonova, tuman hokimligining Axborot xizmati rahbari.