Huquqiy mashgʻulotlar orqali yoshlar ongida qonunga hurmat ruhi shakllanmoqda

Mamlakatimizda huquqiy davlat barpo etish, qonun ustuvorligini taʼminlash va jamiyat aʼzolari, ayniqsa, yoshlarning huquqiy madaniyatini yuksaltirishga alohida eʼtibor qaratilmoqda. Oʻzbekiston Respublikasi Prezidentining 2024-yil 24-may kungi “Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida”gi Farmonida ham yuridik taʼlimning uzluksizligini taʼminlash, voyaga yetmaganlar va yoshlarning huquqiy savodxonligini oshirish asosiy ustuvor vazifalar sifatida belgilandi.

Shu maqsadda Vazirlar Mahkamasining 2024-yil 27-avgust kungi tegishli Qarori bilan Yoshlarning huquqiy savodxonligini oshirish, ularni qonunga itoatkorlik va huquqbuzarlikka toqatsizlik ruhida tarbiyalash boʻyicha chora-tadbirlar Dasturi tasdiqlandi. Mazkur dastur yoshlar oʻrtasida qonunga hurmat ruhini shakllantirish, huquqbuzarliklar profilaktikasini kuchaytirish va huquqiy madaniyatni yuksaltirishda muhim ahamiyat kasb etmoqda.

Dastur doirasida umumiy oʻrta taʼlim muassasalarida qonunga itoatkor hamda huquqbuzarliklarga toqatsiz yoshlarni tarbiyalashga qaratilgan aniq chora-tadbirlar belgilangan. Xususan, amaliyotchi huquqshunoslar, profilaktika inspektorlari, sudyalar, prokurorlar, advokatlar va adliya xodimlari ishtirokida huquqiy mavzularda darsdan tashqari amaliy mashgʻulotlar tashkil etilmoqda.

Bu kabi mashgʻulotlar orqali oʻquvchilarga voyaga yetmaganlarning huquq va burchlari, huquqbuzarlik tushunchasi va uning oqibatlari, shaxsiy huquq va erkinliklar, inson huquqlari va erkinliklarining kafolatlanishi, davlat hokimiyati tizimi, sud hokimiyati va davlat xizmatlarini koʻrsatish tartibi haqida keng tushunchalar berilyapti.

Ana shunday dars mashgʻulotlaridan navbatdagisi Fuqarolik ishlari boʻyicha Amudaryo tuman sudi tashabbusi bilan tuman Maktabgacha va maktab taʼlimi boʻlimi tasarrufidagi 2-sonli umumtaʼlim maktabida tashkil etildi.

Mazkur dars mashgʻulotida Fuqarolik ishlari boʻyicha Amudaryo tuman sudi raisi Adilbek Seytnazarov va mazkur sudning sudyasi Muhabbat Qaypovalar tomonidan turli mavzularda maʼruzalar qilindi. Unda maktab oʻqituvchilari va yuqori sinf oʻquvchilari faol ishtirok etdi.

Dars jarayonida sudyalar oʻquvchilarga Konstitutsiyaning mazmun-mohiyati, davlat hokimiyati tarmoqlarining shakllanishi va ularning vazifalari haqida hayotiy misollar orqali keng tushunchalar berdi. Jumladan, qonun chiqaruvchi, ijroiya va sud hokimiyati tarmoqlari, ularning oʻzaro muvozanati hamda xalq manfaatlarini taʼminlashdagi oʻrniga alohida toʻxtalib oʻtildi.

Ayniqsa, sud hokimiyatining adolatni taʼminlash, inson huquq va erkinliklarini himoya qilishdagi roli, sudyalar faoliyatida qonun ustuvorligi va xolislik printsiplarining ahamiyati haqidagi maʼlumotlar oʻquvchilar uchun juda qiziqarli va foydali boʻldi.

Ushbu amaliy dars orqali oʻquvchilar huquqiy mavzularda oʻzlarini qiziqtirgan koʻplab savollarga javob oldilar. Dars yakunida amalga oshirilgan qiziqarli mashgʻulot uchun Fuqarolik ishlari boʻyicha Amudaryo tuman sudi raisi Adilbek Seytnazarov va mazkur sud sudyasi Muhabbat Qaypovalarga maktab maʼmuriyati tomonidan minnatdorchilik bildirildi.

Mamlakatimizda yosh avlodni huquqiy jihatdan ongli va faol fuqarolar sifatida tarbiyalashga qaratilayotgan eʼtibor samarasi oʻlaroq, taʼlim muassasalarida oʻtkazilayotgan bunday dars mashgʻulotlari jamiyatda qonunga hurmat, huquqiy bilim va masʼuliyat tuygʻusini kuchaytirishda muhim oʻrin tutadi. Konstitutsiyada belgilab berilgan davlat hokimiyatining shakllanishi, uning faoliyat yoʻnalishlari va xalq manfaatlarini taʼminlashdagi vazifalari haqidagi bilimlar har bir yosh fuqaro uchun hayotiy ahamiyat kasb etadi.

Fuqarolik ishlari boʻyicha Amudaryo tuman sudi tomonidan tashkil etilayotgan bunday maʼnaviy-maʼrifiy oʻquv mashgʻulotlari yoshlarning huquqiy bilimlarini mustahkamlash, qonunga hurmat ruhida tarbiyalash va huquqbuzarliklarning oldini olishda samarali vosita boʻlib xizmat qilmoqda.

Shohzod Qurbonboyev.