Paxtadan yuqori hosil olishga qaratilgan seminar boʻlib oʻtdi

Amudaryo tumanining Oq Oltin ovulida joylashgan “Yakupova Gavhar” fermer xoʻjaligida 2025-yil hosili uchun chigit ekilgan maydonlarda qator orasiga ishlov berish, chuqur yumshatish, oziqlantirish va suspenziya sepish kabi agrotexnik tadbirlarni uyushqoqlik bilan, tizimli tarzda tashkil etish boʻyicha seminar oʻtkazildi.

Seminarga Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev, Qoraqalpogʻiston Respublikasi Joʻqorgʻi Kengesining qoʻmita raisi Anvar Jumanazarov, Oʻzagroinspektsiyaning Qoraqalpogʻiston Respublikasi boshqarmasi boshligʻi Arslon Yusupov, Amudaryo tumani hokimi Sobir Xoʻjametov va fermer xoʻjaliklari rahbarlari qatnashdilar.

Seminar davomida soʻzga chiqqanlar gʻoʻzaning sogʻlom oʻsishi, yuqori hosil berishi va zararkunanda hamda kasalliklarga chidamli boʻlishi uchun agrotexnik tadbirlarning oʻz vaqtida va sifatli bajarilishi muhim ekanligini, agrotexnik tadbirlar ichida qator oralariga ishlov berish, suspenziya sepish, chuqur yumshatish va oziqlantirish muhim oʻrin tutishi xususida soʻz yuritdilar.

Aytish joizki, qator oralariga ishlov berish — bu begona oʻtlarni yoʻqotish va tuproqni yumshatishga xizmat qiladigan agrotexnik tadbirdir. Gʻoʻzaning dastlabki rivojlanish bosqichlarida qator oralarini kultivatsiya qilish orqali begona oʻtlar bilan kurashiladi, tuproqda namlik saqlanishiga koʻmaklashiladi, ildizlarning yaxshi rivojlanishiga sharoit yaratiladi. Ilk ishlovlar gʻoʻza 3-4 haqiqiy barg chiqarishi bilan boshlanadi va vegetatsiya davomida bir necha marotaba takrorlanadi.

Suspenziya sepish oʻsimlik barglari orqali oziqlantirish va himoya qilish uchun mikroelementlar va kimyoviy moddalarni mayda tomchilar holida sepish jarayonidir. Bunda, mikroelementlar ishlatiladi, fungitsidlar va insektitsidlar qoʻllaniladi, natijada gʻoʻzaning bardoshliligi oshadi, hosildorlik koʻpayadi. Gʻoʻzani barg orqali oziqlantirishga qaratilgan bu usul tez taʼsir koʻrsatishi bilan ahamiyatlidir.

Gʻoʻzani chuqur yumshatish – tuproqning 25–30 sm chuqurlikkacha ishlov berilish jarayoni boʻlib, ushbu tadbirni amalga oshirish orqali ildiz tizimining chuqurroq rivojlanishiga sharoit yaratiladi, tuproqning zich qatlamlari ochilib, yomgʻir yoki oqar suv singishiga yordam beradi. Bu usul odatda vegetatsiyaning oʻrtalarida, mexanik ishlovlar oraligʻida qoʻllaniladi.

Seminar mobaynida joriy yilgi paxta xomashyosidan yuqori hosil olish uchun ushbu agrotexnik tadbirlarni samarali tashkil etish boʻyicha maslahatlar, taklif, tavsiya hamda koʻrsatmalar berildi.

Fermer xoʻjaliklari rahbarlarlari ham oʻz tajribalari bilan oʻrtoqlashib, gʻoʻza parvarishida qoʻllanayotgan turli agrotexnik usullar va texnologiyalar haqida oʻzaro fikr almashdilar.

Charos Arslonova, tuman hokimligining Axborot xizmati rahbari.