15-sonli umumtaʼlim maktabida PISA–2025 sinovlari oʻtkazildi

Mamlakatimizda taʼlim-tarbiya tizimidagi islohotlar dunyo tajribasiga uygʻun va xalqaro mezonlarga tayangan holda izchil amalga oshirilmoqda. Bu jarayonda taʼlim sifatini chuqur tahlil qilish va uni takomillashtirishda xalqaro baholash tizimlari alohida ahamiyat kasb etadi. Ana shunday yirik tadqiqotlardan biri – PISA xalqaro baholash dasturidir.

Yaqinda Amudaryo tumani Maktabgacha va maktab taʼlimi boʻlimi tasarrufidagi 15-sonli umumtaʼlim maktabida PISA–2025 xalqaro baholash tadqiqotining sinovlari oʻtkazildi. Sinovda mazkur maktabning 15 yoshli, yaʼni 2009-yilda tugʻilgan 42 nafar oʻquvchisi qatnashdi.

Tadbirda tuman hokimi Sobir Xoʻjametov, Qoraqalpogʻiston Respublikasi Maktabgacha va maktab taʼlimi vazirligi mutasaddilari, tuman Maktabgacha va maktab taʼlimi boʻlimi boshligʻi Yalgʻash Shomurotov hamda sohaning boshqa masʼul xodimlari ishtirok etdi.

Tuman hokimi sinov jarayonida ishtirokchilar bilan samimiy suhbatlashib, kelgusi muvaffaqiyatlariga tilakdoshlik bildirdi. Shuningdek, taʼlimda xalqaro mezonlarni joriy etishning ahamiyati, bu orqali olinadigan natijalar kelajakda taʼlim tizimini rivojlantirishda muhim asos boʻlib xizmat qilishi alohida taʼkidlandi.

Eʼtiborga molik jihat shundaki, PISA–2025 tadqiqotida ishtirok etish uchun Qoraqalpogʻiston Respublikasi boʻyicha 727 ta umumtaʼlim maktabi orasidan faqatgina 11 ta maktab qurʼa tashlash orqali tanlab olingan. Tanlov natijasiga koʻra, Amudaryo tumanidagi 15-sonli umumtaʼlim maktabi mazkur xalqaro baholash sinovida ishtirok etish huquqini qoʻlga kiritdi.

Maʼlumot oʻrnida qayd etish joiz, mazkur tadqiqot Oʻzbekiston Respublikasi Maktabgacha va maktab taʼlimi vazirining 2025-yil 28-avgust kungi “PISA–2025 xalqaro baholashning asosiy sinov jarayonlarini oʻtkazish toʻgʻrisida”gi tegishli buyrugʻi asosida tashkil etilyapti.

PISA — Iqtisodiy hamkorlik va taraqqiyot tashkiloti tomonidan har uch yilda oʻtkaziladigan xalqaro baholash dasturi boʻlib, unda oʻquvchilarning faqatgina nazariy bilimlari emas, balki hayotda uchraydigan muammolarni tahlil qilish, yechim topish, tanqidiy fikrlash va muloqot qilish kabi funktsional koʻnikmalari baholanadi.

Oʻzbekistonda mazkur tadqiqotda ishtirok etayotgan maktablar tasodifiylik printsipiga asosan tanlab olingan boʻlib, ular soni 233 tani tashkil etdi. Maktablar mamlakat hududlaridagi urbanizatsiya darajasiga qarab 27 ta guruhga boʻlingan boʻlib, Prezident maktablari esa qoʻshimcha alohida guruh sifatida ajratildi.

PISA tadqiqoti nafaqat oʻquvchilar bilim darajasini, balki milliy taʼlim tizimining global oʻzgarishlarga qay darajada moslasha olishini baholaydi. Shu jihatdan, ushbu sinovlarda maktab oʻquvchilarining ishtirokini taʼminlash orqali taʼlim sifatini oshirish, xalqaro tajribani oʻrganish va ilgʻor usullarni amaliyotga joriy etish imkoni yaratiladi.

Oʻquvchilarning funktsional bilim va koʻnikmalarini rivojlantirish, xalqaro mezonlarga moslashish — bu faqat taʼlim sohasining emas, balki butun mamlakat taraqqiyotining muhim ustunidir.

Shohzod Qurbonboyev.