Davlat xavfsizlik xizmati kubogi sport musobaqalarining tuman bosqichi gʻoliblarini taqdirlash marosimi boʻlib oʻtdi

Bugungi kunda mamlakatimizda yosh avlodni har tomonlama sogʻlom, aqlan va jismonan yetuk etib voyaga yetkazish masalasi davlat siyosatining ustuvor yoʻnalishlaridan biri hisoblanadi. Sport va jismoniy tarbiya barkamol avlodni shakllantirishda muhim ahamiyat kasb etadi. Sport inson salomatligini mustahkamlash, sogʻlom turmush tarzini shakllantirish, maqsad sari intilish, iroda, sabr-toqat va jamoada ishlash koʻnikmalarini rivojlantirishda muhim vosita boʻlib xizmat qiladi. Aynan sport orqali yoshlar oʻzlarida qatʼiyat, intizom, masʼuliyat va vatanparvarlik tuygʻularini shakllantiradi.

Shu sababli ham soha rivojiga alohida eʼtibor qaratilib, Prezidentimiz tashabbusi bilan joylarda zamonaviy sport inshootlari, bolalar sport maktablari, stadion va sport zallari qurilmoqda. Bu esa yoshlar uchun sport bilan muntazam shugʻullanishga keng imkoniyat yaratmoqda.

Davlat xavfsizlik xizmati raisi kubogi sport musobaqalari ham barkamol avlodni voyaga yetkazishdek xayrli ishlarga hissa qoʻshish maqsadida tashkil qilingan boʻlib, ayni kunlarda joylarda mazkur musobaqalarning tuman bosqichlari yakunlanib, ishtirokchilar keyingi bosqichga tayyorgarlik koʻrmoqdalar. 21-may kuni mazkur musobaqalarning Amudaryo tuman bosqichi gʻoliblarini taqdirlash marosimi tantanali tarzda oʻtkazildi. Tuman Xotira maydonida marosim uchun katta tayyorgarlik koʻrilib, bayram dasturi tashkil etildi.

Tadbirda tuman hokimi Sobir Xoʻjametov boshchiligidagi rahbarlar, jamoatchilik faollari, sportchi yoshlar hamda aholi vakillari ishtirok etdi. Tadbirda musobaqaning tuman bosqichida gʻoliblikni qoʻlga kiritgan mahallalar jamoalari medal, diplom, kubok hamda qimmatbaho sovgʻalar bilan taqdirlandi.

Marosimda tuman hokimi Sobir Xoʻjametov soʻzga chiqib, yurtimizda yosh avlodni har tomonlama sogʻlom, maʼnaviy yetuk va vatanparvar qilib tarbiyalash ustuvor yoʻnalishlaridan ekanligi, bu borada amalga oshirilayotgan keng koʻlamli islohotlar qatorida sport musobaqalari, xususan, Davlat xavfsizlik xizmati raisi kubogi uchun oʻtkazilayotgan bellashuvlarning oʻrni va ahamiyati beqiyos ekanligi xususida soʻz yuritdi. Shuningdek, gʻolib yoshlarni muvaffaqiyat bilan tabrikladi va keyingi bosqichlarda yuqori natijalarni koʻrsatishda ularga yuksak ishonch bildirdi.

Musobaqaning tuman bosqichida mini futbol boʻyicha oʻgʻil bolalar oʻrtasida faxrli 1-oʻrinni Farovon mahallasi jamoasi, 2-oʻrinni Oybek va 3-oʻrinni Xizr eli mahallasi jamoalari egalladi. Qizlar oʻrtasida esa faxrli 1-oʻrin Xolimbeg ovuli, 2-oʻrin Oq oltin va 3-oʻrin Toʻlqin ovuli jamoasiga nasib etdi.

Musobaqa doirasida futbol boʻyicha oʻtkazilgan bahslar ham murosasiz kechdi. Jamoalar chempionlikni qoʻlga kiritish uchun bor kuch va imkoniyatlarini ishga soldilar. Futbol boʻyicha bellashuvlar yakuniy natijalariga koʻra Toʻlqin ovuli jamoasi faxrli 1-oʻrinni, Kuyuk koʻpir ovuli jamoasi 2-oʻrinni va Qangli ovuli jamoasi 3-oʻrinni qoʻlga kiritdi. Gʻolib jamoalar keyingi bosqich – Qoraqalpogʻiston Respublikasi bosqichi musobaqalariga yoʻllanma oldi.

Taʼkidlash joizki, mazkur musobaqalar yoshlar oʻrtasida sogʻlom turmush tarzini targʻib qilish, jismoniy tarbiya va sportga boʻlgan qiziqishni oshirish, shuningdek, harbiy-vatanparvarlik ruhini mustahkamlashda muhim ahamiyat kasb etmoqda.

Shuningdek, musobaqalar nafaqat sportchilar oʻrtasida sogʻlom raqobat muhitini shakllantiradi, balki yoshlarda jismoniy tayyorgarlikni oshirish, intizom, jamoaviylik, iroda va qatʼiyat kabi fazilatlarni kamol toptirishga xizmat qiladi. Ayniqsa, musobaqalarning harbiy-vatanparvarlik ruhida oʻtishi yoshlar qalbida ona Vatanga sadoqat, fidoyilik va masʼuliyat tuygʻularini yanada kuchaytiradi.

Qolaversa, bu musobaqalar orqali yoshlar oʻzlarining sportga boʻlgan qobiliyatlarini namoyon etish, oʻz ustida ishlash va yuqori natijalarga erishish imkoniyatiga ega boʻlishadi. Bu esa oʻz navbatida, sogʻlom turmush tarzining jamiyatda ommalashuviga xizmat qiladi.

Taqdirlash marosimi doirasida ishtirokchilar va mehmonlar uchun tuman Madaniyat boʻlimi tomonidan tayyorlangan kontsert dasturi namoyish etildi. Boʻlim xonandalari tomonidan ijro etilgan kuy-qoʻshiqlar tadbirga bayramona ruh bagʻishladi. Kontsertda tumanimizning mashhur estrada xonandalari, isteʼdodli ijodkorlar chiqish qilib, tomoshabinlarga koʻtarinki kayfiyat ulashdi.

Davlat xavfsizlik xizmati raisi kubogi sport musobaqalari barkamol avlodni shakllantirish, ularni jismoniy va maʼnaviy jihatdan komil insonlar qilib voyaga yetkazish yoʻlida muhim vositalardan biri boʻlib xizmat qilmoqda. Bu kabi tashabbuslar kelajakda yurtimiz dovrugʻini dunyoga yoyadigan, vatanparvar yoshlar yetishib chiqishiga zamin yaratadi.

Charos Arslonova, tuman hokimligining Axborot xizmati rahbari.