YoShLARGA MAKTUB

“Yosh boʻlib qolishni xohlaysizmi?”
 (Yoshlar bilan suhbatdan)

Menda boʻlsa edi sening yoshliging,
Gohida sokin-u, goh beboshliging.
Xayollari ummon va sarkashliging
Ardoqlab, qalbimdan berar edim joy,
Umrimga bagʻishlab jahoniy chiroy.

Lek ortga qaytmaydi umr karvoni,
Olislarga otgan vaqt palaxmoni.
Hamon yuragimda yoshlik armoni,
Ahd-u imkoningga beqiyos havas —
Orzularim mening yoshlikka payvast.

Havas qilmayinmi, ilm-u irfonda,
Yaratib qoʻyilgan ulugʻ imkonga.
Sharaflar keltirib Oʻzbekistonga,
Vatan bayrogʻini koʻtarganingda,
Men ham turgim keldi sening yoningda!

Kelajakka doxil ezgu qadaming,
Vatanni asragay oliy qasaming.
Oʻqish-izlanishda kechgan har daming
Matonat bobida tengsiz, betakror,
Azm-u qaroringdan etgum iftixor.

Baland minbarlarda mardona, magʻrur,
Soʻz aytsang, tegrangda hayrat aylanur.
Ajdodlardan meros shijoat, surur
Jismingda joʻsh urgan lahzalarda ham,
Betimsol haybating koʻnglimga hamdam.

Vatan tomirida oqqan toza  qon —
Boʻlgʻusi alloma, Temuriy hoqon.
Beruniy, Xorazmiy, ... zabt etgan dovon,
Shahd-u shiddatingga boʻlganda poydor,
Men senga talpindim takror-u takror!

Bunchalar azizsan, goʻzal, mukarram,
Seni ulgʻaytirgan Vatan — muhtaram.
Oʻzbekiston — ulugʻ Allohdan karam,
Hurriyat qulf urgan yorugʻ istiqbol,
Sening taqdiringga bitilgan iqbol!

Boshimga koʻtarib qadr-u kamoling,
Elim, yurtim, degan ezgu aʼmoling.
Misli bahor yangligʻ husn-u jamoling,
Havaslar koʻshkida asragim kelar,
Men senga oʻxshagim, oʻxshagim kelar!

Hayotim bagʻishlab ilm-u  ziyoga,
Sening koʻzing bilan boqsam dunyoga.
Aylansam  fidoyi  mehrigiyoga,
Menga bundan ulugʻ saodat yoʻqdir,
Yoshlik shavqi bilan koʻngilim toʻqdir!

Koʻz oldimda ravnaq topayotir Yurt,
Bir tomon vodiy-yu sermaʼdan Ustyurt.
Robiya, tuprogʻin koʻzlaringga surt,
Har bitta farzandi zakiy va gʻani—
Ona Oʻzbekiston  yoshlar Vatani!

ROBIYa