Oliy Majlis Qonunchilik palatasi va Joʻqorgʻi Kenges deputatlari Amudaryo tumanida boʻlishdi

Mamlakatimizda olib borilayotgan keng koʻlamli islohotlar samarasi joylarda, ayniqsa, oddiy odamlar hayotida oʻz aksini topishi lozim. Shu bois ham davlat organlari va xalq vakillari faoliyatida joylarga borib, saylovchilar bilan bevosita muloqot qilish, ularning dardini eshitish, amalga oshirilayotgan islohotlarning real natijalarini oʻrganish alohida ahamiyat kasb etadi. Oliy Majlis Qonunchilik palatasi deputati Sapargul Utemuratova hamda Joʻqorgʻi Kenges deputati Aysanem Begimovalarning Amudaryo tumaniga amalga oshirgan xizmat safari ham shu maqsadlarga qaratilgani bilan ahamiyatlidir. Tashrif davomida deputatlar tomonidan hududdagi mavjud muammolar, ijtimoiy-iqtisodiy rivojlanish holati va fuqarolarning kayfiyati oʻrganildi, shuningdek, joylardagi davlat tashkilotlari bilan hamkorlikda muhim masalalar muhokama qilindi.

Safarning dastlabki manzili tuman hokimligi boʻlib, bu yerda mahalliy davlat hokimiyati organlari va boshqa mutasaddi tashkilotlar ishtirokida yigʻilish oʻtkazildi. Yigʻilishda fuqarolardan kelib tushayotgan murojaatlar, ularni hal etish mexanizmlari, amalga oshirilayotgan islohotlarning tuman miqyosidagi ijrosi yuzasidan atroflicha muhokamalar olib borildi. Fuqarolarning davlat organlariga boʻlgan ishonchini oshirish uchun murojaatlarga munosabatni oʻzgartirish va ularning yechimiga eʼtibor qaratish kerakligi taʼkidlandi.

Yigʻilishdan soʻng deputatlar Boy ovul mahallasiga tashrif buyurishdi. Bu yerda “Mahalla yettiligi” aʼzolari bilan yaqindan tanishilib, ularning faoliyatini oʻrganildi.

Mahallada fuqarolar bilan ochiq muloqot tashkil etildi. Suhbat davomida mahalliy aholi oʻzlarini qiynayotgan masalalarni bayon qilib, xalq vakillariga muammoli masalalarda murojaat qildilar. Saylovchilar xalq vakillari faoliyatidan mamnun ekanliklarini bildirib, ularning yuzma-yuz suhbat uyushtirganidan minnatdorlik izhor etdilar. Bunday ochiq muloqotlar joylarda odamlarning haqiqiy muammolariga yechim topishda muhim vosita boʻlib xizmat qilayotgani yana bir bor oʻz tasdigʻini topdi.

Deputatlar xizmat safari davomida Chordora mahallasida joylashgan “Tamara tekstil” tikuvchilik tsexi faoliyati bilan ham tanishdilar. Maktab formalarini ishlab chiqaradigan ushbu kichik korxonada 43 nafar mahalliy xotin-qizlar doimiy ish bilan taʼminlangan.

Tsex rahbariyati bilan boʻlib oʻtgan suhbatda ish joylari sonini yanada oshirish, yangi tikuv mashinalari bilan taʼminlash, mahsulot turlarini kengaytirish kabi rejalar muhokama qilindi. Deputatlar ushbu loyiha boshqa mahallalarda ham namuna boʻlishi mumkinligini qayd etdilar.

Safarning keyingi manzili “Amudaryo tomorqa klasteri”ga qarashli zamonaviy issiqxona boʻldi. Rufat Qurbonboyev rahbarligidagi mazkur issiqxonada hozirgi kunda turli sabzavot va mevalar yetishtirilayotgan boʻlib, 10 dan ortiq mahalliy aholi ish bilan taʼminlangan. Yaqin kelajakda sut mahsulotlarini ham ishlab chiqarish rejalashtirilayotgani maʼlum qilindi.

Bu kabi loyihalar qishloq xoʻjaligini rivojlantirish, eksportbop mahsulotlar ishlab chiqarish va aholining iqtisodiy barqarorligini taʼminlashda muhim ahamiyatga ega. Deputatlar davlatimiz tomonidan bunday tashabbuslar qoʻllab-quvvatlanishini, loyihalarni kredit va subsidiyalar orqali yanada kengaytirish lozimligini taʼkidladilar.

Xalq vakillarining Amudaryo tumaniga xizmat safari, shubhasiz, joylardagi amaliy islohotlar, fuqarolarning haqiqiy ehtiyojlari va davlat siyosatining samaradorligi qay darajada tatbiq etilayotganini chuqur oʻrganish imkonini berdi. Safar davomida deputatlar ishtirokida saylovchilar bilan toʻgʻridan-toʻgʻri muloqot oʻtkazildi, tadbirkorlar faoliyati bilan yaqindan tanishildi va masʼul idoralarga aniq vazifalar yuklatildi.

Bunday safarlar faqat rasmiy tashriflar emas, balki davlat va xalq oʻrtasidagi ishonchli munosabatlarni mustahkamlashga xizmat qiladi. Unda joylardagi muammolarni manzilli hal etish, fuqarolarning ogʻirini yengil qilish va mamlakatda amalga oshirilayotgan islohotlarning hayotdagi aksini koʻrish asosiy maqsad hisoblanadi.

Shu bois xalq vakillarining bunday tashriflari orqali joylardagi ijtimoiy, iqtisodiy va siyosiy jarayonlar yanada jadallashib, xalq vakillari faoliyati orqali aholining davlatga boʻlgan ishonchi mustahkamlanadi. Bu esa, shubhasiz, yangi Oʻzbekiston taraqqiyotining muhim asoslaridan biridir.

Shohzod Qurbonboyev tayyorladi.