IYuN OYIDA TUMAN PENSIYa JAMGʻARMASI TOMONIDAN 25 MING 534 NAFAR FUQAROGA 31,16 MLRD SOʻM PENSIYa HISOBLANDI

Mamlakatimizda aholining ijtimoiy muhofazasini kuchaytirish, davlat va jamiyat hayotida yillar davomida amalga oshirgan fidoyi mehnatini ragʻbatlantirish, yoshi ulgʻayganida qadr-qimmatini ulugʻlash davlat siyosatidagi ustuvor yoʻnalishlardan biri sanaladi. Bu Yangi tahrirdagi Konstitutsiyamizning 46-moddasida ham oʻz aksini topgan. Unga koʻra, “Har kim qariganda, mehnat qobiliyatini yoʻqotganda, shuningdek, boquvchisini yoʻqotganda va qonunda nazarda tutilgan boshqa hollarda ijtimoiy taʼminot olish huquqiga ega”. Shu bois, mamlakatimizda aholi turmush darajasini oshirishga qaratilgan chora-tadbirlar koʻlamini kengaytirish, fuqarolarning daromadlarini izchil oshirib borish orqali ularning ijtimoiy muhofazasini kuchaytirishga alohida eʼtibor qaratiladi.

Bugungi kunda mamlakatimizda 4,5 mln. nafardan ziyod fuqaro turli toifadagi pensiyalarni olishadi. Ulardan salkam 216 ming nafari Qoraqalpogʻiston Respublikasida istiqomat qilishadi. Amudaryo tumanida 25 ming 534 nafar pensionerlar boʻlib, ularning pensiyalarini oʻz vaqtida, qiyinchiliklarsiz olishlarini taʼminlashga qaratilgan vazifalar ijrosi davlatimiz tomonidan doimiy nazoratda.

Ayni paytda tuman Pensiya jamgʻarmasida hisobda turuvchilarning pensiya pullarini oʻz vaqtida, hech qanday toʻsiqlarsiz olishlari uchun zarur imkoniyatlar yaratilgan. Joriy yilning iyun oyida 25 ming 534 nafar fuqaroga jami 31,16 mlrd soʻm pensiya pullari toʻlandi. Shundan 19 ming 863 nafar fuqaroga plastik kartalar orqali 23,56 mlrd soʻm, 5 ming 671 nafar fuqaroga esa naqd pul shaklida 7,6 mlrd soʻm beminnat yetkazib berildi.

Pensiya taʼminoti borasidagi yangiliklar va oʻzgarishlardan xalqimizni vaqtida xabardor qilib borish, fuqarolarni qiziqtirgan savollarga aniq va puxta javob berish maqsadida tuman Pensiya jamgʻarmasi boʻlimining malakali mutaxassislari tomonidan muntazam ravishda tushuntirish va targʻibot tadbirlari amalga oshirilib kelinmoqda. Ayniqsa, Prezident Qaror va Farmonlari yuzasidan aholi bilan yuzma-yuz muloqot tadbirlari oʻzining ijobiy samarasini berib, fuqarolar pensiya tayinlashdagi qulayliklardan oʻz vaqtida xabardor boʻlishmoqda.

Yoshga doir pensiya tayinlash borasidagi qulaylik tufayli 2025-yil 1-martdan boshlab pensiya yoshiga yetgan fuqarolarga pensiya “avtomatik” tarzda, hech qanday hujjat talab qilmasdan, fuqarolarning murojaatisiz tayinlanib, fuqarolarning shaxsiga oid barcha maʼlumotlar vazirlik va idoralar elektron bazalaridan olinadigan boʻldi. Tizimdagi bu oʻzgarish pensiya tayinlash borasidagi qogʻozbozliklarga, behuda ovoragarchiliklarga barham beribgina qolmay, xalqimizning qimmatli vaqtini tejash imkonini yaratdi.

Joriy yil 2-iyunda qabul qilingan, xalqimiz, ayniqsa, pensionerlarning ijtimoiy himoyasini kuchaytirishga qaratilgan “Ish haqi, pensiyalar, stipendiyalar va nafaqalar miqdorini oshirish toʻgʻrisida”gi Prezident Farmoni va ushbu Farmondan kelib chiqadigan vazifalar, shuningdek, qanday holatlarda fuqaroga koʻproq, qanday holatlarda kam pensiya tayinlanishi yuzasidan oʻtkazilgan targʻibot tadbirlari qizgʻin savol-javoblar, munozaralarga boy tarzda oʻtayotganidan ayonki, bu borada xalqimizning huquqiy madaniyati oshib bormoqda va ular oʻz kelajagiga befarq emas.

Tizimda amalga oshirilayotgan izchil islohotlar tufayli fuqarolarga pensiya tayinlash, farzand tugʻilganda beriladigan bir martalik nafaqa, dafn marosimi uchun nafaqa tayinlash, pensiya va nafaqa oluvchilar roʻyxatida mavjudligi haqidagi, pensiya va nafaqa miqdori toʻgʻrisidagi maʼlumotnomalar endilikda Davlat xizmatlari markazi yoki Yagona interaktiv davlat xizmatlari portali orqali berilayotgani tizimdagi byurokratik toʻsiqlarga barham berdi va fuqarolarning ovoragarchiligiga chek qoʻydi.

Bundan tashqari, Oʻzbekiston Respublikasi Prezidentining 2025-yil 27-maydagi “Nogironlik pensiyalari va kompensatsiyalarni tayinlashda proaktiv xizmatlarni joriy etish toʻgʻrisida”gi Qaroriga koʻra, “Oʻzbekiston — 2030” strategiyasini amalga oshirish doirasida aholiga davlat pensiyalari va kompensatsiyalarni tayinlash tartibini takomillashtirish orqali pensiya oluvchilar va nogironligi boʻlgan shaxslarning ijtimoiy xizmatlardan foydalanish imkoniyatlari yanada kengaytirilmoqda.

Unga asosan fuqarolarga nogironlikni belgilash munosabati bilan pensiyalarni alohida murojaat talab etmagan holda proaktiv shaklda tayinlash hamda fuqaroga proaktiv shaklda tayinlangan pensiyalarni rad qilish huquqining berilishi, ayrim toifadagi shaxslarga kompensatsiyalarni elektron maʼlumotlar almashinuvi asosida proaktiv shaklda tayinlash, fuqaroning pensiya miqdorini har ikki yilda proaktiv shaklda qayta hisoblash, pensiyalarni tayinlash va toʻlash tartib-taomillarini raqamlashtirish orqali nogironlik pensiyalari va kompensatsiyalarni oluvchilar uchun qulay imkoniyatlar yaratilmoqda.

“Inson qadri uchun” tamoyili asosida tuman Pensiya jamgʻarmasi boʻlimi mutaxassislari xalq orasida boʻlib, Prezident Farmon va Qarorlarining mazmun-mohiyati, pensionerlar, nogironlik nafaqasini oluvchi shaxslar uchun beriladigan soliq imtiyozlari, qariganda yaxshi pensiya olish uchun qanday hujjatlar zarurligi yuzasidan oʻtkazilayotgan ochiq muloqot tadbirlari orqali fuqarolar oʻz huquq va burchlarini chuqur anglab olishlariga yaqindan yordam berishmoqda.

ROBIYa YOʻLDOShEVA.