Paxta urugʻchiligi boʻyicha respublika seminariga Amudaryo tumani mezbonlik qildi

Amudaryo tumanining Toshyop ovulidagi “Bekmon Allaberganov” fermer xoʻjaligida 2025-yilgi mavsum oldidan respublika miqyosida keng koʻlamli oʻquv-amaliy koʻrgazmali seminar boʻlib oʻtdi. Tadbirning asosiy maqsadi – gʻoʻza maydonlarida urugʻlik uchun ekilgan paxta ekinlarida aprobatsiya oʻtkazish jarayonini chuqur oʻrganish va mamlakatimiz uchun sifatli urugʻlik jamgʻarmasini yaratish boʻyicha tajriba almashishdir.

Seminarda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev, Amudaryo tumani hokimi Sobir Xoʻjametov, respublika boʻyicha tumanlar hokimlarining qishloq va suv xoʻjaligi masalalari boʻyicha oʻrinbosarlari, qishloq xoʻjaligi boʻlimlarining agrotexnologiya boʻyicha masʼullari, Oʻzagroinspektsiya hamda Oʻsimliklar karantini va himoyasi agentligi tuman boʻlimi boshliqlari, “Qishloq xoʻjaligi ekinlari urugʻlari sifatini baholash markazi” davlat unitar korxonasining tuman boʻlimi vakillari, paxta-toʻqimachilik klasterlari rahbarlari, shuningdek, xorijiy navli paxta yetishtirayotgan va urugʻchilik bilan shugʻullanayotgan ilgʻor fermer xoʻjaliklari rahbarlari qatnashdi.

Seminar davomida ishtirokchilarga aprobatsiya jarayonining texnik talablari, nav tozaligini taʼminlash usullari, urugʻlik sifatini baholash mezonlari, shuningdek, selektsiya yutuqlaridan samarali foydalanish boʻyicha batafsil maʼlumotlar berildi. Dalada amaliy koʻrgazmalar oʻtkazilib, har bir bosqich boʻyicha tajribali mutaxassislar tomonidan izohlar berildi.

Seminarda soʻzga chiqqanlar sifatli urugʻlik jamgʻarmasini yaratish masalasida qatʼiy yondashuv zarurligini taʼkidladi: “Aprobatsiya – bu faqat nazorat jarayoni emas, balki kelajak hosilining kafolatidir. Agar biz bugun urugʻlik sifatiga eʼtibor bermasak, ertangi hosil hajmi va sifati haqida gapirish qiyin boʻladi. Har bir fermer urugʻ tanlashdan tortib, yigʻim-terimgacha boʻlgan jarayonda aniqlik va masʼuliyatni birinchi oʻringa qoʻyishi shart”, - dedi Shuhrat Teshayev.

Shundan soʻng Amudaryo tumani hokimi Sobir Xoʻjametov soʻzga chiqib, tumanda urugʻchilik sohasida amalga oshirilayotgan ishlar haqida batafsil toʻxtaldi. Qayd etilishicha, soʻnggi yillarda tuman dalalarida zamonaviy agrotexnologiyalar keng joriy etilmoqda, urugʻlik maydonlarida nav tozaligini taʼminlash uchun qatʼiy nazorat tizimi yoʻlga qoʻyilgan. Shuningdek, paxta ekinlarida suv tejovchi tomchilatib sugʻorish usullari va mineral oʻgʻitlardan meʼyorida foydalanish texnologiyalari keng qoʻllanmoqda.

“Bugungi aprobatsiya jarayoni bizning amaliy ishlarimizni yanada mukammallashtirish, urugʻchilik xoʻjaliklarining tajribasini umumlashtirishga xizmat qiladi. Maqsadimiz — tumanda yetishtirilayotgan urugʻlik paxtaning har bir doni sifat jihatidan xalqaro talabga javob berishiga erishishdir. Bu nafaqat Amudaryo tumani, balki butun respublikamiz agrar salohiyatini oshiradi,” — deya taʼkidladi tuman hokimi oʻz nutqida.

Tadbir davomida xorijiy navli paxtaning afzalliklari, ularni mahalliy iqlim sharoitiga moslashtirish tajribalari, suv tejovchi texnologiyalar bilan uygʻunlashtirish imkoniyatlari ham muhokama qilindi. Ishtirokchilar gʻoʻza aprobatsiyasi boʻyicha yangi metodik qoʻllanmalar, agrotexnik meʼyorlar va xalqaro tajribalar bilan tanishdilar.

Seminar yakunida soha vakillari oʻzaro tajriba almashib, urugʻlik xoʻjaliklari va klaster korxonalari oʻrtasida hamkorlik aloqalarini mustahkamlash boʻyicha kelishuvlarga erishildi. Bu esa, kelgusi mavsumda yuqori sifatli, navi toza va raqobatbardosh paxta hosilini yetishtirishga mustahkam zamin yaratadi.

Amudaryo dalalaridan boshlangan bu tashabbus — butun respublika miqyosida qishloq xoʻjaligi samaradorligini oshirishga xizmat qiluvchi muhim qadamlardan biridir.

Charos Arslonova, tuman hokimligining Axborot xizmati rahbari.