MILLIY KURASh BOʻYIChA "GʻAYRATLI KEKSALAR" MUSOBAQASIDA GʻAYRATLI-ShIJOATLI NURONIYLAR BELLAShDILAR

Prezidentimiz tomonidan 2024-yil 25-noyabrda qabul qilingan “Kambagʻallikdan farovonlik sari” dasturini amalga oshirishga faol nuroniylarni jalb etish chora-tadbirlari toʻgʻrisida"gi Qaror ijrosini taʼminlash, keksa avlod vakillarining bilim va tajribalaridan foydalangan holda oilalarni kambagʻallikdan chiqarish tizimini joriy etish hamda “Kambagʻallikdan farovonlik sari” dasturini amalga oshirish jarayoniga faol nuroniylarni jalb etish borasida tizimli ishlar amalga oshirilmoqda. Ularning imkoniyatlaridan samarali foydalanish va mahallalarda sogʻlom turmush tarzini targʻib qilish maqsadida tashkil etilayotgan piyoda yurish madaniyatini shakllantirish tadbirlari, nuroniylar oʻrtasida turli sport musobaqalari oʻtkazilayotgani keksa avlod vakillarining ijtimoiy faolligini oshirish, salomatliklarini mustahkamlash imkonini bermoqda.

Mazkur Qarorda belgilangan vazifalarni amalga oshirish maqsadida joriy yilning 14-avgust sanasida “Nuroniy” jamgʻarmasining Amudaryo tuman boʻlimi tomonidan “Gʻayratli keksalar” shiori ostida sportning milliy kurash turi boʻyicha sogʻlom turmush tarzi targʻibotiga bagʻishlangan musobaqalar oʻtkazildi.

Keksa yoshdagi kishilarning ijtimoiy faolligini oshirish, salomatliklarini mustahkamlashga koʻmaklashish, ularning hamisha harakatchan, oʻziga eʼtiborli boʻlishlarini kundalik hayot tarziga aylantirishlariga yordam berish maqsadida tashkillashtirilgan sport musobaqalarida ikki xil yosh toifasidagi nuroniylar ishtirok etishib, oʻzlarining nechogʻli gʻayratli-shijoatli ekanliklarini amalda namoyon qildilar.

Amudaryo tumanining barcha ovul va mahallalarida istiqomat qiluvchi ushbu musobaqada ishtirok etish istagini bildirgan sportsevar va gʻayratli-shijoatli nuroniylar musobaqani tashkillashtirish va oʻtkazish boʻyicha Nizom talablari bilan tanishtirildi. Shundan soʻng barcha ovul va mahallalardan 80 kilogramgacha va 80 kilogramdan yuqori vazn toifasidagi gʻayratli nuroniylar saralab olindi.

Musobaqa qiziqarli taassurotlarga boy, doʻstona va samimiy vaziyatda oʻtkazildi. Gʻoliblarni aniqlashda tajribali sport trenerlari jalb etilib, har bir ishtirokchining milliy kurash sporti qoidalariga qay tarzda amal qilishi, kurashish uslubi shaffoflik asosida baholab borildi.

Yakuniy natijalarga koʻra, 80 kilogramgacha boʻlgan vazn toifasida Toʻlqin ovullik eng gʻayratli-shijoatli nuroniy Koʻklan Rahimov 1-oʻrinni egalladi. 2-oʻrin joʻshqin kayfiyatli va gʻayratli nuroniy Alisher Yuldashevga nasib etdi. Ushbu vazn toifasida Boyovul mahallasi polvoni, gʻayratli-shijoatli nuroniy Baxtiyor Eshimbetov 3-oʻrin sohibi boʻldi.

Eng qiziqarli va hayajonli daqiqalarga boy tarzda oʻtgan 80 kilogramdan yuqori vazn toifasidagi nuroniylar bellashuvida Xizr eli mahallasining gʻayratli-shijoatli nuroniy polvoni Qurbonboy Jumaniyozov 1-oʻrinni egalladi. Shuningdek, oʻziga xos kurash tushish uslubini namoyish etgan Xitoy ovulidan kelgan gʻayratli-shijoatli nuroniy Norboy Urozov musobaqa shohsupasining ikkinchi pogʻonasidan joy oldi. Oʻrta qalʼalik gʻayratli-shijoatli nuroniy polvon Davlatboy Eshniyozovga esa 3-oʻrin nasib etdi.

Musobaqada faxrli oʻrinlarni egallagan nuroniylar tashkilotchilar tomonidan diplom va esdalik sovgʻalari bilan taqdirlandilar.

Oʻz navbatida musobaqa ishtirokchilari mamlakatimizda keksa avlod vakillariga koʻrsatilayotgan yuksak eʼtibor va ularning salomatliklarini mustahkamlashga qaratilgan gʻamxoʻrlikdan minnatdor ekanliklarini izhor etishib, musobaqa tashkilotchilariga bundan keyin ham doimiy ravishda mana shunday sport tadbirlarini oʻtkazib turish boʻyicha oʻz takliflarini bildirdilar.

Robiya YOʻLDOShEVA.