“Qurbaniyozov Jasur” MChJ hamda bloger Hakimboy Ibodullayevlar mehr-saxovatidan “Yolgʻiz keksa” reyestridagi yurtdoshlarimiz mamnun

Mamlakatimizda “Hamma narsa inson qadri uchun!” tamoyili asosida oʻzgalar parvarishiga muhtoj, nogironligi boʻlgan fuqarolar, shuningdek, kam taʼminlangan, ehtiyojmand oilalarni ijtimoiy qoʻllab-quvvatlash, ularning jamiyatning toʻlaqonli aʼzolari sifatida hayotdan rozi yashashlarini taʼminlashga qaratilgan chora-tadbirlar tufayli bugungi kunda minglab yurtdoshlarimiz mehr-saxovat, oʻzaro hurmat va eʼtibor ogʻushida, oʻz turmush sharoitlaridan mamnun yashamoqdalar.

Oʻzbekiston Respublikasi Prezidentining Farmonlari hamda Vazirlar Mahkamasining Qarorlari ijrosini taʼminlash maqsadida amalga oshirilayotgan saʼy-harakatlar natijasida mamlakatimizning barcha hududlarida faolit olib borayotgan “Inson” ijtimoiy xizmatlar markazlari bu boradagi ishlarni yuqori sifat darajasiga koʻtardi.

Ayniqsa, Oʻzbekiston Respublikasi Mustaqilligining 34 yilligi munosabati bilan “Vatan uchun, millat uchun, xalq uchun!” ezgu shiori ostida mahallalarda istiqomat qilayotgan “Yolgʻiz keksa” reyestriga kiritilgan, oʻzgalar parvarishiga muhtoj yolgʻiz nuroniylar, shuningdek yolgʻiz yashovchi keksalar hamda nogironligi boʻlgan shaxslarga saxovatpesha tadbirkorlar va homiylar tomonidan koʻrsatilayotgan yordamlar salmogʻi yanada oshdi. Tumanning turli hududlarida jami 115 nafar yurtdoshlarimiz “Yolgʻiz keksa” reyestriga kiritilgan.

Davlatimiz, ayniqsa, “Inson” ijtimoiy xizmatlar markazining tuman boʻlimi ijtimoiy xizmat koʻrsatuvchi xodimlari, saxovatpesha insonlar ularni aslo yolgʻizlatib qoʻyishmaydi. Turli bayram sanalarida, har haftaning payshanba va juma kunlarida bunday insonlar xonadonlariga borib, ularning koʻngillarini koʻtarish, turli oziq-ovqat mahsulotlari, bayramona sovgʻalar ulashish amudaryolik tadbirkorlar va mehr-oqibatni oʻzlarining hayot mazmunlariga aylantirgan saxovatpesha insonlarning ezgu amallariga aylangan.

Yaqinda tumandagi “Qurbaniyozov Jasur” masʼuliyati cheklangan jamiyati tomonidan 92 nafar “Yolgʻiz keksa” reyestriga kiritilgan fuqarolarga vaucher asosida ijtimoiy yordamlar koʻrsatiladi. Mazkur jamiyat tomonidan vaucherlar taqdim etilgan “Yolgʻiz keksa” reyestridagi fuqarolar saxovatli tadbirkordan hamisha mamnun.

Shuningdek, bloger Hakimboy Ibodullayev ham turli millat vakillari boʻlgan ijtimoiy himoyaga muhtoj yurtdoshlarimiz holidan xabar olib, ularga turli koʻrinishdagi ijtimoiy yordamlar taqdim etib kelmoqda.

“Faol hayotga qadam” dasturi doirasida oʻzgalar parvarishiga muhtoj boʻlgan yolgʻiz nuroniylar va yolgʻiz yashovchi keksalar hamda nogironligi boʻlgan shaxslar muhtojlik toifasiga qarab, tibbiy-ijtimoiy reabilitatsiya vositalari bilan beminnat taʼminlanayotgani ularning yanada ijtimoiylashuviga yordam bermoqda.

Bu esa oʻzlarining yolgʻiz emasliklarini his qilib, atrofida yaxshi insonlar borligidan mamnun, hayotdan rozi, kelajakka ishonch bilan yashashlarini taʼminlamoqda. Chunki ularni yoʻqlab keluvchilar koʻp. Saxovatli, mehr-oqibatli hamyurtlar, “Inson” ijtimoiy xizmat koʻrsatish markazining xodimlari, mahalladoshlari ularni aslo yolgʻizlatib qoʻyishmaydi va hayotlari yaxshilar bilan hamisha gavjum.

ROBIYa YOʻLDOShEVA.