Amudaryoda paxta yigʻim-terimi — uyushqoqlik va samaradorlik namunasi

Oʻzbekiston qishloq xoʻjaligida paxta — nafaqat iqtisodiyotimizning tayanchi, balki xalqimiz mehnatsevarligi va fidoyiligini namoyon etuvchi ramzlardan biridir. Bugungi kunda yurtimizning barcha hududlarida boʻlgani kabi, Amudaryo tumanida ham paxta yigʻim-terim mavsumi uyushqoqlik va yuqori samaradorlik bilan olib borilmoqda.

Tumandagi fermer xoʻjaliklari dalalarida ish qizgʻin. Ayniqsa, zamonaviy paxta terish mashinalari terim jarayonida asosiy yordamchi boʻlib xizmat qilmoqda. Ulardan foydalanish tufayli dalalarda mehnat unumdorligi sezilarli darajada oshib, paxta yigʻib olish jarayoni ancha tezlashmoqda.

Masalan, Bobur nomli ovuldagi “Sitmomut” fermer xoʻjaligi misolida aytadigan boʻlsak, 100 gektarlik paxta maydonida terim ishlari toʻliq texnika asosida tashkil etilgan. Natijada “Sulton” navli paxtadan gektariga 45–50 tsentnergacha hosil olinmoqda. Paxta terish mashinalari esa kuniga 20–25 tonnagacha paxta yigʻib-terib olish imkonini bermoqda.

Shu kabi, “Umid Azimxoʻja” fermer xoʻjaligi ham ilgʻor texnologiyalardan unumli foydalangan holda yuqori samaradorlikka erishmoqda. 65 gektarlik maydonda gektariga 55–60 tsentner hosil olinayotgani — zamonaviy texnikalar va samarali agrotexnik tadbirlarning yaqqol natijasidir.

Joriy yilda Amudaryo tumanida paxta terimiga jami 12 ta paxta terish mashinasi jalb qilingan boʻlib, ularning 10 tasi 2025-yil mavsumi uchun yangidan xarid qilingan texnikalardir. Bu esa davlatimiz rahbari tomonidan qishloq xoʻjaligini rivojlantirish, fermerlarga keng imkoniyatlar yaratish yoʻlida amalga oshirilayotgan islohotlarning amaliy samarasidir.

Amudaryolik fermerlar bugun oʻz mehnatini zamon talablariga mos tarzda tashkil etib, yangi texnikalar yordamida nafaqat hosildorlikni oshirmoqda, balki oʻz tadbirkorligini ham yanada rivojlantirmoqda.

Paxta terimi — nafaqat daladagi ish, balki haqiqiy mehnat bayramidir. Tumanimizda aholining terim jarayonidagi faolligi buning yaqqol dalili boʻlib xizmat qilmoqda. “Abdulla” fermer xoʻjaligining 60 gektar maydonidagi hosil asosan qoʻl mehnati asosida yigʻib olinmoqda. Bu yerda terimchilarga barcha sharoitlar yaratilgan: issiq ovqatlar tashkil etilgan, terilgan paxtaning har kilogrammi uchun 2000 soʻmdan haq oʻz vaqtida toʻlab berilmoqda.

Mehnatkash terimchilar bundan mamnun holda, yuqori kayfiyat va shijoat bilan paxta terishmoqda. Ularning fidoyiligi va mehnatga boʻlgan mehr-muhabbati tufayli bu yilgi paxta xirmoni baland boʻlishiga ishonch katta.

Bugungi kunda Amudaryo dalalarida olib borilayotgan paxta yigʻim-terimi — texnika va mehnat uygʻunligining, davlatimiz tomonidan yaratilayotgan imkoniyatlar va xalqimizning fidoyiligini oʻzida mujassam etgan yorqin manzaradir. Hosildor dalalar, samarali texnikalar va fidoyi mehnatkashlar tufayli bu yilgi paxta mavsumi ham yuqori natijalar bilan yakunlanishi shubhasiz.

Charos Arslonova, tuman hokimligining Axborot xizmati rahbari.