EL-YuRT OSOYIShTALIGI VA FAROVONLIGIGA MUSTAHKAM SALOMATLIK ASOSIDA ERIShILADI

Amudaryo tuman Sanitariya-epidemiologik osoyishtalik va jamoat salomatligi boʻlimi xodimlari tumanimiz aholisining sanitariya-epidemiologik osoyishtaligini taʼminlash, oʻta yuqumli va karantin infektsiyalarining kirib kelishi va tarqalishining oldini olish yuzasidan tegishli tashkilotlar bilan hamkorlikda faol ish olib bormoqda.

Boʻlim tarkibida jami 96 nafar xodim faoliyat olib boradi, shundan 25 nafari oliy, 39 nafari oʻrta, 22 nafari kichik tibbiy xodimlar va 10 nafari boshqa texnik xodimlardir.

Tashkilot ustaviga muvofiq boʻlim oʻz faoliyati davomida obʼektlarni joylashtirishda, ularni qurish va ekspluatatsiya qilishda aholi salomatligiga zararli taʼsir koʻrsatuvchi omillarning oldini olishga qaratilgan ogohlantiruvchi sanitariya nazoratini olib boradi. Joriy sanitariya nazorati davomida atrof-muhit monitoringini, ochiq suv havzalari, atmosfera havosi va tuproqning ifloslanishining oldini olish choralarini koʻradi. Shuningdek, kommunal va maishiy xizmat koʻrsatish obʼektlari, bolalar va oʻsmirlar muassasalari, umumiy ovqatlanish va savdo-sotiq obʼektlari hamda sanoat va ishlab chiqarish korxonalarida boʻlim xodimlari tomonidan nazorat ishlari oʻtkaziladi.

Muassasaning mutaxassislari tomonidan 2025-yil davomida joriy sanitariya nazorati oʻtkazish maqsadida 901 ta obʼekt roʻyxati shakllantirilgan. “Xavfni tahlil qilish mexanizimini joriy qilish” buyrugʻi ijrosini taʼminlash maqsadida boʻlimda maxsus axborot tizimi asosida ish tashkil etilgan. Roʻyxatga olingan barcha obʼektlar elektron bazaga kiritilib, xavf darajasi boʻyicha toifalarga ajratilgan. Ularning 102 tasi yuqori xavfli, 206 tasi oʻrtacha xavfli va 206 tasi xavf darajasi kam boʻlgan obʼektlar sifatida roʻyxatga olingan.

2025-yilning oʻtgan 9 oyi davomida boʻlim mutaxassislari tomonidan 106-marta rejali tekshirishlar oʻtkazildi, jumladan, 25 ta davolash-profilaktika muassasasida sanitariya nazorati amalga oshirildi.

Oʻtkazilayotgan epidemiyaga qarshi chora-tadbirlar natijasida tumanda oʻta xavfli va karantin kasalliklari qayd qilinmadi, boshqariladigan yuqumli kasalliklar tarqalishining oldi olindi.

2025-yilning 9 oyi davomida 2936 nafar chaqaloq tugʻilib, ulardan virusli gepatit «V» ga qarshi 2934 bola, sil kasalligiga qarshi 2922 bola emlandi. Barcha vaktsina emlash punktlari tomonidan turli yuqumli kasalliklarga qarshi 6 yoshli va oʻsmir bolalarni emlash ishlari belgilangan reja asosida olib borildi.

Oʻtgan davr mobaynida tuman boʻyicha 144 ta bolalar va oʻsmirlar gigiyenasi muassasasidan 81 tasida sanitariya nazorati oʻtkazildi. Sanitariya-gigiyena laboratoriyasiga olingan oziq-ovqat namunalaridan 26 tasi, ichimlik suvi namunasidan 425 tasi sanitariya talablariga javob bermasligi aniqlandi. Mavjud kamchiliklarni bartaraf qilish maqsadida tegishli choralar koʻrildi.

Jumladan, byudjet tashkilotlarida 106 ta, mahallalarda 116 ta qonun buzilish holati aniqlanib, “E –mamuriy ish” tizimiga kiritildi va aybdorlarga nisbatan Oʻzbekiston Respublikasi Maʼmuriy javobgarlik toʻgʻrisidagi kodeksining tegishli moddalari asosida maʼmuriy ish qoʻzgʻatilib, jarimalar undirildi.

Aholining sanitariya-epidemiologik osoyishtaligi bilan bogʻliq muammoli masalalarni hal etishning yangicha “Mahallabay” ishlash tizimi tashkil etilib, aholi xonadonlarining sanitariya-gigiyenik orastaligini taʼminlash va aholining sanitariya madaniyatini oshirish borasida jamoatchilik bilan hamkorlikda muntazam ravishda targʻibot ishlari olib borilmoqda.

Telegramda boʻlimning kanali tashkil etilib, u orqali tizimdagi yangiliklar hamda yuqumli kasalliklarning oldini olishga qaratilgan profilaktik tadbirlar toʻgʻrisidagi xabar va maqolalar yoritib berilmoqda. Amalga oshirilayotgan chora-tadbirlar tufayli 2025-yil 9 oyi davomida aholi tomonidan kelib tushgan 12 ta murojaatning barchasi ijobiy hal etildi.

Sanitariya-epidemiologik osoyishtalik va jamoat salomatligi tizimida amalga oshirilishi lozim boʻlgan barcha ishlarni boʻlim shifokorlari bundan keyin ham oʻzaro jipslik va hamjihatlik asosida olib borib, zimmalaridagi aholi salomatligini mustahkamlashdek sharafli vazifalarini sidqidildan ado etadilar. Zero, maqsadimiz hamisha ezgu — el-yurt osoyishtaligi va farovonligiga hissa qoʻshish. Osoyishtalik va farovonlikka esa mustahkam salomatlik asosida erishiladi.

Gulmurod BEKIYeV, Amudaryo tuman SEO va JS boʻlimi boshligʻi.