NUKUS HARBIY PROKURORI TOMONIDAN AMUDARYo TUMANIDA OMMAVIY SAYYoR QABUL OʻTKAZILDI

Aholi hayotiga doir muammolarni joyiga chiqqan holda oʻrganish, fuqarolar bilan ochiq va samimiy muloqotda boʻlish orqali ularni qiynab kelayotgan iqtisodiy, huquqiy masalalarga yechim topish maqsadida Nukus harbiy prokurori tomonidan Amudaryo tumani Madaniyat boʻlimiga qarashli madaniyat markazi binosida ommaviy sayyor qabul va boʻsh ish oʻrinlari yarmarkasi oʻtkazildi.

Tadbirga tegishli soha vakillari va malakali mutaxassislar jalb qilinib, Amudaryo tumani Mudofaa ishlari boʻlimi, Favqulodda vaziyatlar boʻlimlarida oʻz xizmat vazifasini oʻtayotgan harbiy xizmatchilar, ularning oila aʼzolari, isteʼfodagi harbiy pensionerlar, shuningdek, muddatli harbiy xizmatni oʻtab qaytgan yigitlar hamda yoshlarning murojaatlari tinglandi.

Sayyor qabul jarayonida ishtirokchilardan turli mazmundagi murojaatlar qabul qilindi. Murojaatlarning asosiy qismi uy-joyga subsidiya olish, harbiy xizmat vazifasini oʻtayotgan zobitlar va harbiy xizmatchilar, isteʼfoga chiqqan sobiq harbiy pensionerlarning shartnoma asosida oliy taʼlim muassasalarida tahsil olayotgan farzandlarining kontrakt toʻlovini toʻlash, harbiylarning oilalarini uy-joy bilan taʼminlash masalalarida boʻldi. Shuningdek, ishtirokchilar masʼullarga sud-huquq sohasiga doir masalalar va mulkiy munosabatlar yuzasidan ham murojaat qildilar.

Har bir murojaat masʼullar tomonidan sinchiklab oʻrganib chiqildi. Jumladan, 6 ta murojaat sayyor qabul jarayonida joyida ijobiy hal etilgan boʻlsa, 7 ta murojaat tahliliy oʻrganilgandan soʻng mutaxassislar tomonidan murojaat qiluvchilarga zarur huquqiy tushuntirishlar olib borildi. 4 ta murojaat esa harbiy prokuratura tomonidan alohida roʻyxatga olinib, tegishli tashkilotlar, jumladan tuman Soliq inspektsiyasi, Aholi bandligiga koʻmaklashish va kambagʻallikni qisqartirish boʻlimi, Favqulodda vaziyatlar boʻlimi, Tibbiyot birlashmasi, “Mikrokreditbank”ning tuman boʻlimi hamda tuman Oila va xotin-qizlar boʻlimi kabi tashkilotlarning masʼullarini jalb qilgan holda koʻrib chiqiladigan boʻldi.

Sayyor qabul jarayonida fuqarolar oʻzlarini qiziqtirgan masalalar yuzasidan savollar bilan murojaat qildilar. Xususan, turli toifadagi soliq imtiyozlari, mulkiy munosabatlarni tartibga solish, kadastr hujjatlarini rasmiylashtirish, alohida toifadagi fuqarolar uchun ijtimoiy, tibbiy xizmat boʻyicha imtiyozlar berish xususidagi savollarga masʼullar atroflicha javoblar va huquqiy maslahatlar berdilar. 6 nafar fuqaroga esa sayyor qabul jarayonida harbiy guvohnoma rasmiylashtirib berildi.

Sayyor qabuldan soʻng, oliy taʼlim muassasalarini bitirgan va Qurolli Kuchlar saflarida muddatli harbiy xizmatni oʻtab qaytgan sobiq askarlar, mehnat muhojirligidan qaytib kelib, ish izlovchi sifatida Bandlikka koʻmaklashish va kambagʻallikni qisqartirish boʻlimida roʻyxatdan oʻtgan ish izlovchilar ishtirokida boʻsh ish oʻrinlari yarmarkasi ham tashkil etildi.

Yarmarkada Amudaryo tumani Aholi bandligiga koʻmaklashish va kambagʻallikni qisqartirish boʻlimi xodimlari tomonidan aholini ish bilan taʼminlash borasida amalga oshirilayotgan ishlar, mehnat qonunchiligidagi oʻzgarishlar, oliy taʼlim muassasalari hamda texnikumlarni bitiruvchilar uchun yangi ish oʻrinlarini yaratish boʻyicha koʻrilayotgan chora-tadbirlar yuzasidan zarur maʼlumotlar berildi.

Shuningdek, xorijiy davlatlar tomonidan taklif qilinayotgan ish oʻrinlari, ularning turlari boʻyicha ham ishtirokchilarga maʼlumotlar berilib, shartnoma asosida xorij davlatiga chiqib ishlashning oʻziga xos jihatlari yuzasidan tushuntirishlar olib borildi.

Ishtirokchilar tumanda faoliyat olib boruvchi korxona, tashkilotlar hamda tadbirkorlik subʼektlari tomonidan taklif etilayotgan boʻsh ish oʻrinlari bilan yaqindan tanishib, mehnat qonunchiligidagi yangiliklar va oʻzgarishlar yuzasidan zarur maʼlumotlar oldilar.

ROBIYa YOʻLDOShEVA.