AMUDARYo IXTISOSLAShTIRILGAN MAKTABIDA "MARTABANG BALAND BOʻLSIN, ONA TILIM!" MAVZUSIDA TADBIR OʻTKAZILDI

Xalqimiz sevib nishonlaydigan bayram sanalari koʻp. Bunday sanalar insonlar qalbida tinchlik-osoyishtalikka shukronalik, oʻzaro mehr-oqibat, millatlararo totuvlik tuygʻularini yanada mustahkamlaydi, milliy oʻzlikni anglash, bobomeros maʼnaviy qadriyatlarga sadoqat, vatanparvarlik hissi bilan yashashga undaydi. Ana shunday bayram sanalaridan biri shu kunlarda 1-dekabr — qoraqalpoq tiliga davlat tili maqomi berilgan kun munosabati bilan oʻtkazilayotgan bayramona tadbirlar ham nafaqat Qoraqalpogʻiston Respublikasi, balki butun mamlakatimiz xalqlari uchun millatlararo totuvlik va bagʻrikenglik bayrami sifatida umumtaʼlim maktablarida, davlat va jamoat tashkilotlarida, oliy taʼlim muassasalarida tantanali ravishda nishonlanmoqda.

Qoraqalpoq tili bu zaminda yashovchi har bir insonning faxr-u iftixori, millatidan qatʼiy nazar, oilalarda, taʼlim-tarbiya muassasalarida farzandlarimiz sevib oʻrganadigan, ushbu tilda muloqot qilishdan iftixor hissini tuyadigan jarangdor til sifatida qadrlidir. Shu bilan birga bu til xalqimizning koʻrki, ziynati, qoraqalpoq millatini dunyoga tanituvchi betakror koʻzgusidir.

Bu haqda Amudaryo ixtisoslashtirilgan maktabida boʻlib oʻtgan, qoraqalpoq tiliga davlat tili maqomi berilganligining 36 yilligiga bagʻishlangan “Martabang baland boʻlsin, ona tilim!” mavzusidagi bayram tadbirida maktab oʻquvchi-yoshlari, ularning ustozlari iftixor bilan soʻz yuritdilar.

Tantanali bayram tadbirining avvalida mazkur maktab oʻquvchilari qoraqalpoq tilining tarixi, shakllanish jarayonlari va qardosh xalqlar orasidagi nufuzi xususida maʼruzalar oʻqidilar. Shuningdek, maktabning qoraqalpoq tili va adabiyot toʻgaragi aʼzolari qoraqalpoq xalq ogʻzaki ijodi namunalari, maqol va matallar asosida soʻz oʻyinlari tashkil etishib, qoraqalpoq mumtoz va hozirgi zamon adabiyotining taniqli namoyandalari ijodlariga mansub asarlardan parchalar va sheʼrlarni ifodali oʻqib berdilar.

Tadbirning adabiy qismi qiziqarli taassurotlarga boy boʻldi. Unda maktabning badiiy havaskorlik toʻgaragi aʼzolari tomonidan kichik sahna koʻrinishlari namoyish etilib, unda qoraqalpoq tilining oʻziga xos jilvalari, soʻz boyligi, milliy-maʼnaviy jihatdan tarbiyaviy ahamiyati mahorat bilan ochib berildi. Sahna koʻrinishlari orqali halollik, toʻgʻrisoʻzlik, xalqparvarlik, ona Vatanga cheksiz mehr-muhabbat tuygʻulariga ustuvorlik berilgani tadbir ishtirokchilarining olqishlariga sazovor boʻldi.

“Martabang baland boʻlsin, ona tilim!” mavzusidagi maʼnaviy-maʼrifiy va adabiy-musiqiy tadbirning musiqiy qismi barchaga koʻtarinki kayfiyat bagʻishladi. Unda Amudaryo tumani Madaniyat boʻlimi sanʼatkorlari tomonidan maxsus tayyorlangan “Kuylarimga jarang bergan ona tilim!” deb nomlangan kontsert dasturi namoyish etildi. Amudaryo tumanining iqtidorli sanʼatkorlari tomonidan mahorat bilan ijro etilgan qoraqalpoq kuy va qoʻshiqlari, jozibador raqslari bayram tadbirining yanada joʻshqin taassurotlarga boy oʻtishini taʼminladi.

ROBIYa YOʻLDOShEVA.