Xalq deputatlari Amudaryo tuman Kengashining 16-sessiyasi toʻgʻrisida axborot

Amudaryo tumani hokimligining majlislar zalida yettinchi chaqiriq Xalq deputatlari tuman Kengashining navbatdagi 16-sessiyasi boʻlib oʻtdi. Sessiya ishida deputatlar, tuman hokimining oʻrinbosarlari, tashkilot va muassasalar rahbarlari hamda ommaviy axborot vositalari vakillari ishtirok etdi.

Sessiya avvalida Oʻzbekiston Respublikasi va Qoraqalpogʻiston Respublikasining Davlat madhiyalari yangradi. Sessiya majlisiga Xalq deputatlari Amudaryo tuman Kengashi raisi, tuman hokimi Sobir Xoʻjametov raislik qildi. Sessiya kotibligiga “22-Bosuv” saylov okrugidan deputat Saylixon Muratbayeva nomzodi deputatlar tomonidan maʼqullandi.

Sessiya kun tartibidagi birinchi — “2026-yilda Amudaryo tumanini kompleks ijtimoiy-iqtisodiy rivojlantirish dasturini tasdiqlash toʻgʻrisida”gi masala yuzasidan tuman hokimining birinchi oʻrinbosari, iqtisodiyot va moliya boʻlimi boshligʻi Faxriddin Yusupov hisobot berdi.

Hisobotda hududlarni kompleks rivojlantirish, yuqori iqtisodiy oʻsishga erishish, biznes muhitini yanada yaxshilash, “oʻsish nuqtalari”ni ishga solish, yashil tamoyil va yondashuvlarni keng joriy etish orqali aholi bandligini taʼminlash hamda daromadlarini oshirish borasida amalga oshirilayotgan chora-tadbirlar haqida batafsil maʼlumot berildi. Shuningdek, 2026-yil uchun Amudaryo tumani mahalliy byudjeti daromadlari va xarajatlari 156 milliard 793 million 126 ming soʻm miqdorida prognoz qilinayotgani qayd etildi.

Kun tartibidagi navbatdagi masala – “Oʻzbekiston – 2030” strategiyasining 25-maqsadi ijrosi, xotin-qizlarning taʼlim olishi, kasbiy koʻnikmalarni egallashi, erta turmush va ajrimlarning oldini olish hamda ularni tadbirkorlikka jalb etish borasida amalga oshirilayotgan ishlar yuzasidan tuman hokimining oʻrinbosari — oila va xotin-qizlar boʻlimi boshligʻi Goʻzal Saburova hisobot berdi.

Hisobotda joriy yil davomida 6-bosqich “Ayollar daftari”ga kiritilgan 5 825 nafar xotin-qizlarning 5 801 nafariga, yaʼni 99,9 foiziga amaliy yordamlar koʻrsatilgani taʼkidlandi. Jumladan, ijtimoiy himoyaga muhtoj ishsiz 4 722 nafar ehtiyojmand xotin-qizlardan 4 714 nafarining bandligi taʼminlandi. Tadbirkorlik qilish istagini bildirgan 82 nafar xotin-qizdan 72 nafariga 913,5 million soʻm miqdorida kredit ajratildi. Shuningdek, boquvchisini yoʻqotgan 357 nafar ehtiyojmand xotin-qizga “Ayollar jamgʻarmasi” mablagʻlari hisobidan bir martalik moddiy yordamlar koʻrsatildi. Bundan tashqari, uy-joy taʼmiriga muhtoj boʻlgan 2 nafar xotin-qizning xonadonlari homiylik mablagʻlari asosida taʼmirlandi.

Sessiya davomida davlat tili masalalari boʻyicha yil davomida amalga oshirilgan ishlar yuzasidan tuman hokimining maʼnaviyat va davlat tili masalalari boʻyicha maslahatchisi Ashirbay Kushayev hisobot berdi. Unda tuman hududidagi 49 ta fuqarolar yigʻini, 125 ta aholi punkti, 73 ta qabriston, 1 ta ziyoratgoh, 1 ta istirohat bogʻi, 2 489 ta koʻcha, shuningdek, transport, muhandislik-texnika infratuzilmasi hamda tabiiy obʼektlarning geografik nomlari davlat reyestriga toʻliq kiritilgani alohida taʼkidlandi.

Sessiya kun tartibidan Amudaryo tuman Soliq inspektsiyasi tomonidan amalga oshirilgan ishlar yuzasidan soliq inspektsiyasi boshligʻining hisoboti ham oʻrin oldi. Hisobotda qishloq xoʻjaligiga moʻljallanmagan yerlar uchun yuridik shaxslarga 1 gektar maydon uchun, shuningdek, jismoniy shaxslarga 1 kvadrat metr yer maydoni uchun belgilangan bazaviy soliq stavkalariga nisbatan kamaytiruvchi va oshiruvchi koeffitsiyentlar qoʻllash masalasi deputatlar tomonidan koʻrib chiqildi.

Maʼlumki, Oʻzbekiston Respublikasi Konstitutsiyasining yangi tahrirdagi 120-moddasida belgilangan normalarga muvofiq, xalq deputatlari Kengashiga deputatlar orasidan saylangan rais boshchilik qilishi belgilangan boʻlib, 2026-yil 1-yanvardan boshlab barcha tuman va shahar Kengashlarida hokimlarning bir vaqtning oʻzida Kengashga raislik qilishi amaliyoti toʻxtatilishi belgilangan.

Mazkur normalardan kelib chiqib, sessiyada “Mahalliy davlat hokimiyati toʻgʻrisida”gi Qonunning tegishli moddasida belgilangan tartibda Amudaryo tuman Kengashi raisi saylovi oʻtkazildi. Siyosiy partiyalar vakillari guruhi tashkil etilib, uning tarkibi deputatlar tomonidan bir ovozdan tasdiqlandi. Eng koʻp deputatlik oʻrniga ega boʻlgan Oʻzbekiston Liberal-demokratik partiyasi vakili Madamin Kazakov siyosiy partiyalar guruhi raisi etib belgilandi.

Maslahatlashuvlar yakunida guruh tomonidan deputat Alisher Yoʻldashev nomzodi Amudaryo tuman Kengashi raisligiga tavsiya etildi. Nomzod deputatlar tomonidan maʼqullanib, ovoz berish natijalariga koʻra Yoʻldashev Alisher Yalgʻashevich Xalq deputatlari Amudaryo tuman Kengashi raisi etib saylandi.

Yangi saylangan Kengash raisi oʻz nutqida hududni har tomonlama rivojlantirish, aholining turmush darajasini oshirish mahalliy Kengash faoliyatining ustuvor vazifasi ekanini taʼkidlab, mahalliy ijro hokimiyati bilan hamkorlikda belgilangan vazifalarni samarali amalga oshirish yoʻlida barcha kuch va imkoniyatlarini safarbar etishini bildirdi.

Sessiya kun tartibiga kiritilgan barcha masalalar atroflicha muhokama qilinib, tegishli qarorlar qabul qilindi. Shu bilan Xalq deputatlari Amudaryo tuman Kengashining 16-sessiyasi oʻz ishini yakunladi.

Charos Arslonova, tuman hokimligining Axborot xizmati rahbari.