“ILK RIVOJLANISh MARKAZI”: BOLALAR UChUN YaNGI IMKONIYaTLAR MASKANI

Mamlakatimizda inson kapitalini rivojlantirish, xususan, maktabgacha taʼlim tizimi qamrovini kengaytirish davlat siyosatining ustuvor yoʻnalishlaridan biriga aylandi. Zero, bolaning dunyoqarashi, intellektual salohiyati va jamiyatga moslashuvi aynan maktabgacha boʻlgan davrda shakllanadi. Shu maqsadda Amudaryo tumanida ham “Ilk rivojlanish markazi” tashkil qilinib, samarali faoliyat yuritmoqda.

Ushbu xayrli tashabbus Oʻzbekiston Respublikasi Prezidentining 2024-yil 23-sentyabrdagi “Kambagʻallikdan farovonlik sari” dasturini amalga oshirish boʻyicha birinchi navbatdagi chora-tadbirlar toʻgʻrisida”gi qarori hamda Vazirlar Mahkamasining 2025-yil 14-iyuldagi tegishli qarori ijrosini taʼminlash doirasida amalga oshirildi.

Yuqoridagi qarorlar asosida 2025-yil 28-iyul kuni Amudaryo tumani hokimining tegishli qarori qabul qilinib, Mangʻit shahri Olmazor mahallasi, "Barkamol avlod" shoh koʻchasi 25-uy manzilida tuman Maktabgacha va maktab taʼlimi boʻlimi tasarrufidagi yangi “Ilk rivojlanish markazi” tashkil etildi.

“Ilk rivojlanish markazi”ning asosiy vazifasi — shu kunga qadar bogʻchaga bormagan, maktabgacha taʼlim bilan qamrab olinmagan bolalarga teng imkoniyatlar yaratishdan iborat. Bu markaz shunchaki bolalarni vaqtinchalik nazorat qiladigan joy emas. Bu yerda bolaning jamiyatga ijtimoiy moslashuvi, tengdoshlari bilan muloqot qilish koʻnikmasi shakllantiriladi va eng muhimi — ular maktab taʼlimiga tayyorlanadi. Markaz faoliyati har bir bolaning yoshi, individual qobiliyatlari va oʻziga xos ehtiyojlarini inobatga olgan holda, ularning har tomonlama kamol topishini taʼminlashga yoʻnaltirilgan.

Hududning ehtiyojidan kelib chiqib, markaz tomonidan bosqichma-bosqich 240 nafar bolajonlarni qamrab olish rejalashtirilgan. Hozirgi kunda markazda 4 ta guruh shakllantirilgan boʻlib, ularda 10 nafar malakali pedagog-tarbiyachilar faoliyat olib bormoqda.

Taʼkidlash joizki, Prezidentimizning “Kambagʻallikdan farovonlik sari” dasturiga hamohang ravishda, markazga qabul jarayonida birinchi navbatda “Kambagʻal oilalar reyestri”ga kiritilgan, ijtimoiy himoyaga muhtoj oilalarning farzandlariga ustuvorlik berilmoqda. Bu esa ijtimoiy adolat tamoyilining amaldagi yorqin ifodasidir.

Yangi markazda taʼlim-tarbiya jarayonlari ikki xil innovatsion model asosida tashkil etilgan boʻlib, bu ota-onalar va bolalar uchun katta qulaylik yaratadi. “Oʻyin guruhlari” 3 yoshdan 6 yoshgacha boʻlgan bolalar uchun moʻljallangan. Mashgʻulotlar qisqa muddatli, yaʼni kuniga 3 yarim - 4 soat davomida tashkil etiladi. Bu vaqt davomida bolalar turli rivojlantiruvchi oʻyinlar orqali bilim oladilar. Eng muhimi, tarbiyalanuvchilarga yengil tamaddi beriladi va barcha xizmatlar uchun ota-onalardan badal toʻlovi undirilmaydi. Bu — oila byudjetiga sezilarli yordam deganidir.

“Maxsus maktabgacha taʼlim xizmati” modeli alohida eʼtiborga loyiq. Unda 2 yoshdan 7 yoshgacha boʻlgan, alohida taʼlim ehtiyojlari bor boʻlgan, yaʼni imkoniyati cheklangan yoki salomatligida muammosi bor bolalar qamrab olinadi. Bunda pedagoglar bolaning yashash xonadoniga borgan holda, individual dastur asosida taʼlim-tarbiya beradilar. Bu usul bolaning oʻz uyidagi qulay muhitda rivojlanishiga va jamiyatdan uzilib qolmasligiga xizmat qiladi.

Amudaryo tumanida faoliyat yuritayotgan “Ilk rivojlanish markazi” — kelajagimiz egalari boʻlgan bolajonlar uchun yangi hayot, yangi imkoniyatlar eshigidir. Bu maskan nafaqat bolalarning sifatli taʼlim olishiga, balki ularning sogʻlom va barkamol inson boʻlib voyaga yetishishiga munosib hissa qoʻshishi shubhasiz.