Amudaryoda aholi va qishloq xoʻjaligini roʻyxatga olish jarayonlari qizgʻin davom etmoqda

Ayni kunlarda yurtimizning barcha hududlarida boʻlgani singari Amudaryo tumanida ham aholi va qishloq xoʻjaligini roʻyxatga olish tadbirlari yuqori uyushqoqlik bilan davom etmoqda. Har qanday davlatning iqtisodiy va ijtimoiy taraqqiyoti, avvalo, aniq statistik maʼlumotlarga, demografik koʻrsatkichlarga va mavjud resurslarning haqqoniy hisob-kitobiga tayanadi. Shu maʼnoda, 2026-yilning ilk oyidan start olgan ushbu yirik kampaniya mamlakatimizda demografik jarayonlarni chuqur tahlil qilish, mehnat resurslarini toʻgʻri taqsimlash, ijtimoiy infratuzilma obʼektlari — maktab, shifoxona va yoʻllar qurilishini hamda hududiy rivojlanishni ilmiy asosda rejalashtirishda muhim poydevor vazifasini oʻtaydi. Taʼkidlash joizki, mazkur jarayonlar xalqaro standartlarga toʻliq mos ravishda, eng ilgʻor xorijiy tajribalar va zamonaviy raqamli texnologiyalardan foydalangan holda tashkil etilayotgani bilan avvalgi yillardagi tadbirlardan tubdan farq qiladi.

Roʻyxatga olish ishlari joriy yilning 15-yanvaridan 28-fevraliga qadar ikki asosiy bosqichda amalga oshirilishi belgilangan boʻlib, ayni paytda birinchi bosqich ishlari qizgʻin tus olgan. 15-31-yanvar kunlarini oʻz ichiga olgan ushbu bosqichda fuqarolarga qulaylik yaratish maqsadida zamonaviy axborot texnologiyalari imkoniyatlari ishga solingan: aholi maxsus axborot tizimi orqali masofadan turib, onlayn shaklda roʻyxatdan oʻtish imkoniyatiga ega.

Ikkinchi bosqich esa fevral oyida bevosita joylarda, yaʼni “Mahalla yettiligi” xodimlari tomonidan uyma-uy yurib, maxsus planshet qurilmalari yordamida savolnomalarni toʻldirish orqali amalga oshiriladi. Bunda census.stat.uz portali va OneID identifikatsiya tizimidan foydalanilayotgani maʼlumotlarning aniqligi va shaffofligini taʼminlashga xizmat qilmoqda. Ahamiyatli jihati shundaki, barcha jarayonlar geoaxborot tizimi asosida monitoring qilinmoqda. Xususan, respublika boʻyicha 7,6 milliondan ortiq xonadon va turar joylarning geomanzillari shakllantirilib, maxsus monitoring uskunalari orqali jarayonlarni real vaqt rejimida kuzatish imkoniyati yaratilgan.

Amudaryo tumani hokimligida tashkil etilgan maxsus shtab aʼzolari ham ushbu jarayonga jiddiy tayyorgarlik koʻrgan holda, aholi va qishloq xoʻjaligini roʻyxatga olish ishlarini tizimli tashkil etish, yuzaga kelayotgan savollarga tezkor javob berish va aholiga amaliy yordam koʻrsatish maqsadida uzluksiz faoliyat olib bormoqdalar. Raqamlarga murojaat qiladigan boʻlsak, 20-yanvar soat 12:00 holatiga koʻra, Qoraqalpogʻiston Respublikasi boʻyicha jami 232 mingga yaqin xonadon muvaffaqiyatli roʻyxatdan oʻtgan boʻlsa, shundan 23,5 mingdan ortigʻi aynan Amudaryo tumani hissasiga toʻgʻri kelayotgani tuman ahlining jarayonga naqadar masʼuliyat bilan yondashayotganidan dalolat beradi. Bugungi kunga qadar mamlakat miqyosida maxsus portal orqali 2,48 million xonadon hamda 31 mingta fermer xoʻjaliklari va qishloq xoʻjaligi korxonalari roʻyxatga olingani ham aholining faolligi oshib borayotganini koʻrsatadi.

Tumanning barcha hududlarida, jumladan, chekka ovullarda ham ishlar jadal surʼatlarda tashkil etilgan. Jumladan, Amudaryo tumanining Xolimbeg ovulida yashovchi fuqarolar ushbu jarayonda yuksak uyushqoqlik namunasini koʻrsatmoqdalar. “Mahalla yettiligi” aʼzolarining xonadonma-xonadon yurib olib borgan samarali targʻibot ishlari natijasida ovul hududidagi maktabda joylashgan shtabda ish qizgʻin davom etmoqda. Fuqarolar oʻz kelajagiga befarq boʻlmagan holda, savolnomalarni onlayn toʻldirishda faol ishtirok etmoqdalar. Shu oʻrinda aholi xavfsizligi va maʼlumotlar maxfiyligi masalasiga alohida toʻxtalib oʻtish zarur. Fuqarolar tomonidan taqdim etiladigan barcha shaxsiy maʼlumotlar qonunchilik talablariga muvofiq qatʼiy himoya qilinadi va ulardan faqat umumlashtirilgan holda, statistik maqsadlarda foydalaniladi. Bu esa har bir fuqaroning jarayonda xotirjam va ishonch bilan ishtirok etishi uchun huquqiy kafolatdir.

Ushbu yirik tadbirni yuqori saviyada oʻtkazish uchun mamlakat miqyosida ulkan tayyorgarlik koʻrildi. Respublika boʻyicha 14 ta hududiy hamda 208 ta tuman va shahar shtablari tuzilib, jarayonga 60 ming nafarga yaqin maxsus tayyorgarlikdan oʻtgan xodimlar jalb etildi. Ular safida 54 ming nafar “Mahalla yettiligi” vakillari, 2,6 ming nafar zaxira xodimlar, shuningdek, vazirlik va idoralardan biriktirilgan trenerlar hamda oliy taʼlim muassasalarining volontyor talabalari borligi bu ishning umumxalq harakatiga aylanganini koʻrsatadi. Aholini xabardor qilish maqsadida yuzlab videoroliklar, minglab targʻibot materiallari tayyorlanib, televideniye, ijtimoiy tarmoqlar va jamoat joylarida keng namoyish etilmoqda.

Xulosa qilib aytganda, aholi va qishloq xoʻjaligini roʻyxatga olish tadbirlari — bu shunchaki statistik maʼlumot toʻplash emas, balki ertangi kunimiz, farzandlarimiz kelajagi va yurtimiz ravnaqi uchun muhim dasturilamal boʻlib xizmat qiladi. Shunday ekan, aziz hamyurtlar, Siz ham onlayn tarzda aholi va qishloq xoʻjaligini roʻyxatga olish jarayonlarida faol ishtirok eting!