Amudaryo tumanida “Rahbar va yoshlar uchrashuvi” boʻlib oʻtdi

Amudaryo tumanida yoshlarning muammo va tashabbuslarini tinglash, ularni qoʻllab-quvvatlash hamda kelajak sari dadil qadam tashlashlariga koʻmak berish maqsadida navbatdagi “Rahbar va yoshlar uchrashuvi” tashkil etildi. Tadbir Amudaryo tumani Madaniyat boʻlimida ochiq, samimiy muloqot ruhida oʻtkazildi.

Uchrashuvda tuman hokimi Sobir Xoʻjametov, hokim oʻrinbosari Nodirbek Kamolov, tuman prokurori Bahram Masharipov, Ichki ishlar boʻlimi boshligʻi Timur Doshumbayev, Yoshlar ishlari boʻlimi boshligʻi Bekzod Oʻrinboyev, shuningdek, kasb-hunar texnikumlari, tijorat banklari va boshqa mutasaddi tashkilotlar vakillari ishtirok etdilar.

Uchrashuvni ochib bergan tuman hokimi Sobir Xoʻjametov oʻz soʻzida yoshlar bilan ishlash davlat siyosatining eng muhim yoʻnalishlaridan biri ekanini taʼkidladi.

“Bugun yoshlar uchun yaratilayotgan imkoniyatlar har qachongidan ham keng. Eng muhimi, bu imkoniyatlardan toʻgʻri foydalanish, bilim va kasb egallash, tashabbus koʻrsatish zarur. Rahbarlar sifatida biz yoshlarning har bir muammosiga yechim topishga tayyormiz”, — dedi tuman hokimi.

Shuningdek, hokim yoshlar bandligini taʼminlash, ularni zamonaviy kasblarga yoʻnaltirish, tadbirkorlik tashabbuslarini qoʻllab-quvvatlash masalalari doimiy nazoratda ekanini qayd etdi.

Hokim oʻrinbosari Nodirbek Kamolov yoshlar bandligini taʼminlash borasida amalga oshirilayotgan ishlar, boʻsh ish oʻrinlari, kasb-hunar texnikumlarida mavjud yoʻnalishlar haqida batafsil maʼlumot berdi. U yoshlarni qisqa muddatli kasb oʻrgatish kurslariga jalb etish, “Ustoz-shogird” anʼanasi asosida hunar oʻrganish imkoniyatlari kengayib borayotganini taʼkidladi.

Hokim oʻrinbosari oʻz soʻzida yoshlar daftari orqali moddiy va ijtimoiy yordamlar, startap va innovatsion loyihalarni qoʻllab-quvvatlash, imtiyozli kreditlar va subsidiya mexanizmlari, yosh tadbirkorlarga yer maydonlari va bino-inshootlardan foydalanish imkoniyatlari haqida atroflicha tushuntirish berdi.

Tuman prokurori Bahram Masharipov yoshlarning huquq va majburiyatlari, qonunlarga rioya qilish, huquqiy madaniyatni oshirish masalalariga alohida toʻxtaldi. U yoshlar oʻrtasida huquqbuzarliklarning oldini olish, ularning huquqiy savodxonligini oshirish borasida olib borilayotgan profilaktik tadbirlar haqida maʼlumot berdi.

Ichki ishlar boʻlimi boshligʻi Timur Doshumbayev esa yoshlarni turli salbiy illatlardan asrash, sogʻlom turmush tarzini targʻib qilish, jinoyatchilikka qarshi kurashda yoshlarning faolligi muhim ekanini taʼkidladi.

Uchrashuv davomida yoshlar oʻzlarini qiziqtirgan savollar, bandlik, taʼlim, kredit olish, tadbirkorlikni boshlash, huquqiy masalalar yuzasidan murojaatlar bilan chiqishdi. Masʼullar tomonidan har bir murojaat atroflicha koʻrib chiqilib, ayrim masalalar joyida hal etildi, qolganlari boʻyicha aniq chora-tadbirlar belgilandi.

Tadbirda tuman Madaniyat boʻlimi xonandalari tomonidan ijro qilingan betakror kuy-qoʻshiqlar barcha ishtirokchilariga yuqori kayfiyat bagʻishladi.

Mazkur “Rahbar va yoshlar uchrashuvi” yoshlarning ijtimoiy faolligini oshirish, ularni qoʻllab-quvvatlash, muammo va takliflarini bevosita tinglashda muhim maydon boʻlib xizmat qildi. Eng asosiysi, bu muloqot yoshlarning oʻz kelajagiga boʻlgan ishonchini yanada mustahkamlab, yangi marralar sari undadi.

Charos Arslonova, tuman hokimligining Axborot xizmati rahbari.