14-sonli maktabda Navoiy va Bobur ijodiga bagʻishlangan maʼnaviy-maʼrifiy kecha oʻtkazildi

Amudaryo tumani Maktabgacha va maktab taʼlimi boʻlimiga qarashli 14-sonli umumtaʼlim maktabida oʻzbek adabiyotining ikki ulugʻ namoyandasi — Alisher Navoiy tavalludining 585 yilligi va Zahiriddin Muhammad Bobur tavalludining 543 yilligi munosabati bilan maʼnaviy-maʼrifiy kecha tashkil etildi. Tadbir yosh avlod qalbida milliy merosga hurmat, ona tiliga muhabbat va adabiyotga qiziqishni kuchaytirish maqsadida oʻtkazildi.

Mazkur tadbir maktabning oʻzbek tili hamda ona tili va adabiyot fani oʻqituvchilari Dilfuza Gʻaipova, Feruza Xoʻjamuratova, Sadoqat Davletova va Dilnoza Safarboyevalar rahbarligida tayyorlandi. Ular oʻquvchilar bilan birgalikda buyuk mutafakkirlar hayoti va ijodiga bagʻishlangan mazmunli dastur ishlab chiqib, kechani haqiqiy adabiyot bayramiga aylantirdilar.

Kecha davomida oʻquvchilar Alisher Navoiyning gʻazal va ruboiylarini ifodali oʻqib, uning insonparvarlik, ezgulik va komillik gʻoyalariga yoʻgʻrilgan hayot yoʻli va ijodi haqida batafsil maʼlumotlar berdilar. Shuningdek, Zahiriddin Muhammad Bobur asarlari asosida sahna koʻrinishlari namoyish etilib, uning sarkardalik jasorati, Vatanga muhabbati va yurt sogʻinchi badiiy obrazlar orqali yoritib berildi. Sahna chiqishlari oʻquvchilarning isteʼdodi va tayyorgarligi yuqori darajada ekanini namoyon qildi.

Tadbirda maktabning 5-“A”, 5-“B”, 6-“B”, 4-“A” va 7-“B” sinf oʻquvchilari faol ishtirok etdilar. Ayniqsa, maktabning faol va aʼlochi oʻquvchilari Anargul Uzoqboyeva, Madina Jiyanboyeva, Charosxon Amanbayeva, Aydana Abatova, Jasmina Tazaboyeva, Ulmeken Toʻxtasinova hamda 7-“B” sinf oʻquvchilari Charos Tursunbayeva, Farangiz Gʻaypova, Umida Yusupboyeva tomonidan Vatanni madh etuvchi kuy-qoʻshiqlar va musiqalarga ijro etilgan raqslar kechaga yanada fayz bagʻishladi.

Aytish joizki, Alisher Navoiy va Zahiriddin Muhammad Bobur — oʻzbek maʼnaviyati va davlatchilik tarixining ikki ulugʻ ustunidir. Navoiy Hirotda kamol topib, davlat ishlarida faol qatnashgan, ilm-maʼrifat va bunyodkorlikni qoʻllab-quvvatlagan arbob sifatida tanilgan. Bobur esa Fargʻonada hukmdor boʻlib, ogʻir siyosiy kurashlardan soʻng Qobul va Hindistonda yangi davlat — Boburiylar saltanatiga asos solgan.

Navoiy ijodi turkiy adabiyotni yuksak pogʻonaga koʻtardi: uning gʻazallari, dostonlari va maʼrifiy asarlari insonparvarlik, adolat, muhabbat va vatan tuygʻusini targʻib qiladi. Bobur ijodida esa shoh va shoir ruhi uygʻun: “Boburnoma” orqali u oʻz davrining siyosiy hayoti, tabiati va urf-odatlarini jonli tasvirlab, tarix uchun bebaho manba qoldirdi.

Ikki buyuk ajdodimiz oʻz hayoti va ijodi bilan turkiy til va adabiyotni, xalqimiz tafakkurni boyitgani, oʻzligini mustahkamlagan bilan avlodlar uchun nihoyatda ahamiyatli va ibratlidir. Yoshlar uchun Navoiy va Boburni oʻrganish nutq madaniyatini oshiradi, oʻtmishdan ibrat olishga, maqsadga qatʼiyat bilan intilishga, milliy gʻurur va maʼnaviy masʼuliyatni his etishga undaydi.

14-sonli maktabdagi tadbir ham ana shu maqsadlarni oʻzida mujassam etdi. Mazmunli chiqishlar, sheʼrxonlik va sahna koʻrinishlari orqali oʻquvchilar nafaqat adabiy bilimlarini namoyon etdilar, balki milliy qadriyatlarimiz, tarixiy merosimiz va maʼnaviy boyligimizga boʻlgan hurmatini ham ifoda etdilar. Kecha davomida oʻquvchilar tomonidan bildirilgan fikr va taassurotlar ularning buyuk ajdodlarimiz ijodiga qiziqishi tobora ortib borayotganini koʻrsatdi.

Mazkur tadbir yosh avlodni milliy adabiyot durdonalari bilan yaqindan tanishtirish, ular qalbida vatanparvarlik va maʼnaviy kamolot tuygʻularini shakllantirishda muhim ahamiyat kasb etdi. Bunday maʼnaviy kechalar yoshlarning maʼnaviyatli va maʼrifatli shaxs boʻlib kamol topishiga xizmat qilishi bilan alohida qadrlidir.