Yoshlar oʻrtasida harbiy-sport musobaqalarining tuman bosqichi oʻtkazildi

Vatan – muqaddas tushuncha. Uning tinchligi va osoyishtaligini asrash, sarhadlarimiz daxlsizligini taʼminlash hamda osmonimiz musaffoligini saqlash har bir fuqaroning, ayniqsa, kelajagimiz egalari boʻlgan barkamol yoshlarning eng oliy burchi sanaladi. Shu sababli ham bugungi kunda mamlakatimizda yosh avlodni jismonan sogʻlom, maʼnan yetuk, intellektual jihatdan salohiyatli va eng muhimi, yuksak harbiy-vatanparvarlik ruhida tarbiyalash davlat siyosatining ustuvor yoʻnalishlaridan biriga aylangan. Aynan shu ezgu maqsad yoʻlida joylarda turli maʼnaviy-maʼrifiy tadbirlar, sport musobaqalari, harbiy xizmatchilar va yoshlar uchrashuvlari muntazam ravishda yuqori saviyada tashkil etib kelinmoqda.

Xususan, Amudaryo tumanida ham oʻsib kelayotgan yosh avlod qalbida ona yurtga muhabbat, fidoyilik, mardlik va jasurlik tuygʻularini yuksaltirish maqsadida keng koʻlamli ishlar amalga oshirilmoqda.

Yaqinda Amudaryo tumani Mudofaa boʻlimi tashabbusi bilan mudofaaga koʻmaklashuvchi “Vatanparvar” tashkiloti bilan hamkorlikda umumtaʼlim maktablari oʻquvchilari oʻrtasida harbiy-vatanparvarlik ruhini oshirish, ularni chaqiriqqa qadar boshlangʻich tayyorgarlik fanlari boʻyicha olgan nazariy bilim va koʻnikmalarini amaliyotda, real hayotiy vaziyatlarda qoʻllashga oʻrgatish maqsadida harbiy-sport musobaqalarining tuman bosqichi koʻtarinki ruhda oʻtkazildi.

Musobaqa davomida tumandagi umumtaʼlim maktablaridan tashrif buyurgan, koʻzlarida oʻt chaqnab turgan yoshlar oʻzlarining chaqqonligi, merganligi, kuch va irodasini turli sinovlardan oʻtkazdilar. Maydonda hukm surgan sogʻlom raqobat muhiti, ishtirokchilarning gʻalabaga boʻlgan intilishi va ishtiyoqi mazkur sport tadbirining qanchalik ahamiyatli hamda hayajonli ekanligini yaqqol namoyon etdi.

Spartakiada dasturidan oʻrin olgan shartlar yoshlarning nafaqat jismoniy imkoniyatlarini, balki intellektual salohiyatini, tezkor fikrlashini ham sinovdan oʻtkazishga qaratildi. Ishtirokchilar belgilangan masofaga tezlik bilan yugurish, turnikda tortilish, arqon tortishish, avtomatni qismlarga ajratish va yigʻish hamda boshqa shartlar asosida bilimlarni, jismoniy imkoniyatlarini namoyish etishdi.

Har bir shart oʻquvchilardan yuksak masʼuliyatni, chaqqonlikni va albatta, chinakam oʻzaro hamjihatlikni talab etdi. Tadbirni katta qiziqish bilan kuzatib borgan tomoshabinlar, ustoz-murabbiylar va ota-onalar oʻz farzandlarining, shogirdlarining shiddatli harakatlaridan, ularning ertaga el-yurtga kamarbasta boʻladigan vatan himoyachisi degan sharafli nomga munosib boʻlib voyaga yetayotganidan cheksiz gʻururlandilar. Hakamlar hayʼati esa ishtirokchilarning har bir chiqishini odilona, xolis va qatʼiy mezonlar asosida baholab bordi.

Albatta, har qanday sport musobaqasida boʻlgani kabi, bu galgi sport va yoshlik bayramida ham eng kuchlilar, eng chaqqon va bilimlilar saralandi. Natijalarga koʻra, faxrli uchinchi oʻrinni oʻzining tezkorligi va jamoaviy jipsligi bilan koʻpchilikning eʼtiborini tortgan, nomiga monand harakat qilgan 19-sonli umumtaʼlim maktabining "Qalqon" jamoasi qoʻlga kiritdi. Ikkinchi oʻrin esa barcha shartlarda birdek barqaror natijalarni qayd etgan, irodali va bilimdon oʻquvchilardan tashkil topgan 12-sonli maktabning "Vatanparvar" jamoasiga nasib qildi. Eng yuqori – faxrli birinchi oʻrin esa musobaqa davomida chinakam yetakchilik qobiliyatini namoyon etgan, jismoniy va maʼnaviy jihatdan boshqalardan tengsiz ekanligini yaqqol isbotlagan 40-sonli maktabning "Yurt posbonlari" jamoasiga nasib qildi.

Gʻolib va sovrindor jamoalar tuman Mudofaa boʻlimi hamda tadbir tashkilotchilari tomonidan maxsus diplomlar, faxriy yorliqlar hamda qimmatbaho esdalik sovgʻalari bilan taqdirlandilar. Bu kabi keng qamrovli musobaqalar nafaqat oʻsmirlarning jismoniy chiniqishiga, balki ularda jamoa boʻlib ishlash, qiyin va nostandart vaziyatlarda toʻgʻri qaror qabul qilish, sabr-matonatli boʻlishdek eng muhim insoniy xususiyatlarini shakllantirishda muhim ahamiyat kasb etadi.