Qoraqalpogʻiston Respublikasi Konstitutsiyasi qabul qilinganligining 33 yilligi keng nishonlandi

Har bir yurtning tarixida muhim sanalar va voqealar boʻladi. Qoraqalpogʻiston Respublikasi uchun ana shunday tarixiy kunlardan biri, shubhasiz, Konstitutsiya qabul qilingan sanadir. Bundan roppa-rosa 33-yil muqaddam, yaʼni 1993-yilning 9-aprel kuni Qoraqalpogʻiston Respublikasi Oliy Kengashining sessiyasida Qoraqalpogʻiston Respublikasi Konstitutsiyasi qabul qilingan edi. Oʻtgan davr mobaynida Konstitutsiya koʻp millatli xalqimizning hamjihatligi va doʻstligini mustahkamlovchi, ularni ulugʻ bunyodkorlik ishlariga boshlovchi asosiy hujjat boʻlib xizmat qilmoqda.

Ushbu sana respublikaning barcha shahar va tumanlarida keng nishonlanmoqda. Xususan, Amudaryo tumanida ham Qoraqalpogʻiston Respublikasi Konstitutsiyasi qabul qilinganligining 33 yilligi munosabati bilan bayram tadbiri tashkil etildi.

Tuman Madaniyat boʻlimi binosida boʻlib oʻtgan ushbu tantanali marosimda deputatlar, tuman hokimligining masʼullari, hududdagi korxona va tashkilotlar vakillari, taʼlim muassasalari xodimlari hamda keng jamoatchilik ishtirok etdi.

Bayramning rasmiy qismi Oʻzbekiston va Qoraqalpogʻiston Respublikalarining davlat madhiyalari bilan boshlandi.

Tantanali tadbirni Xalq deputatlari tuman Kengashining kotibiyati mudiri Mansur Oʻrozboyev kirish soʻzi bilan ochib berdi. U oʻz nutqida Konstitutsiyamizning davlat va jamiyat taraqqiyotini, xalq jipsligini taʼminlashdagi beqiyos oʻrni va ahamiyatiga alohida toʻxtalib oʻtdi.

Taʼkidlanganidek, Qoraqalpogʻiston Respublikasi Konstituiyasi — koʻp millatli xalqimizning oʻzaro hamjihatligi, doʻstligi va totuvligini mustahkamlovchi, ularni birdamlikka daʼvat etuvchi muhim huquqiy hujjatdir. Konstitutsiya nafaqat davlat tuzilishini, balki har bir fuqaroning qadr-qimmati, shaʼni va kelajagini himoya qiladigan qalqondir. Oʻtgan 33-yil ichida erishilayotgan barcha yutuqlar, ijtimoiy-iqtisodiy sohalardagi oʻzgarish va yangilanishlar, xalqimizning turmush darajasi yuksalishi bevosita mana shu Konstitutsiyamizda belgilangan normalarning hayotiy ifodasidir.

Yurtimizning bugungi taraqqiyot bosqichlariga nazar tashlar ekanmiz, iqtisodiyotimizning yildan-yilga mustahkamlanib borayotgani, shahar va qishloqlarimiz qiyofasi tubdan oʻzgarayotgani barchamizni quvontiradi. Bu yutuqlar zamirida inson manfaatlarini hamma narsadan ustun qoʻyuvchi chuqur va puxta oʻylangan strategik maqsadlar mujassam.

Ayniqsa, keyingi yillarda Muhtaram Prezidentimiz rahbarligida Qoraqalpogʻiston Respublikasini rivojlantirish boʻyicha qabul qilingan alohida farmon va qarorlar, davlat dasturlari hayotimizda muhim burilish yasadi. Ushbu hujjatlar asosida respublikaning eng chekka hududlarigacha yetib borayotgan islohotlar, yangidan barpo etilayotgan zamonaviy turar joylar, ijtimoiy soha obʼektlari, maktab va bogʻchalar, tibbiyot maskanlari xalqimizning ertangi kunga boʻlgan ishonchini yanada mustahkamlamoqda. Amudaryo tumani misolida ham ana shunday ulkan qurilish-taʼmirlash va obodonlashtirish ishlarining guvohi boʻlish mumkin. Bularning barchasi Konstitutsiyamizda muhrlangan tamoyillarning amaldagi ijrosidir.

Konstitutsiya bayramiga bagʻishlangan tadbirning badiiy qismi ham nihoyatda mazmunli va rang-barang boʻldi. Tuman madaniyat boʻlimi xodimlari tomonidan tayyorlangan kontsert dasturi yigʻilganlarga koʻtarinki kayfiyat ulashdi. Tinchlik va doʻstlikni tarannum etuvchi kuy-qoʻshiqlar, milliy raqslar va badiiy chiqishlar orqali xalqimizning boy madaniy merosi, milliy qadriyatlarimiz yana bir bor namoyish etildi.

Shu oʻrinda aytish joizki, Konstitutsiya va qonunlarga hurmat bilan munosabatda boʻlish, ularni eʼzozlash va hayotimizga tatbiq etish yurt tinchligi va taraqqiyotining eng toʻgʻri yoʻlidir. Bugungidek shodiyonalar esa xalqimizning yakdilligini oshirib, ezgu maqsadlar sari yangi kuch-gʻayrat bagʻishlaydi.