Ichimlik suvidan noqonuniy foydalanganlarga jarima qoʻllanildi

Suv – bu hayot, tiriklik manbaidir. Bugungi kunda butun dunyoda, jumladan, bizning mintaqamizda ham toza ichimlik suvi eng bebaho neʼmat sanalib, uning har bir qatrasini koʻz qorachigʻidek asrab-avaylash dolzarb masalaga aylangan. Davlatimiz tomonidan aholini sifatli va uzluksiz ichimlik suvi bilan taʼminlash, olis hududlarga ham obihayot yetib borishini yoʻlga qoʻyish maqsadida koʻplab hududlarga yangi tarmoqlar tortilib, ulkan mablagʻlar sarflanmoqda. Afsuski, baʼzi fuqarolarning bu xizmatlarni suiisteʼmol qilishi oqibatida mazkur saʼy-harakatlar samaradorligiga jiddiy putur yetmoqda.

Aynan shu kabi qonunbuzilish holatlarining oldini olish maqsadida Qoraqalpogʻiston Respublikasi hududiy qurilish va uy-joy kommunal xoʻjaligi sohasida nazorat inspektsiyasi tomonidan joylarda muntazam ravishda keng koʻlamli oʻrganish ishlari hamda profilaktik reydlar olib borilmoqda.

Ushbu nazorat tadbirlaridan koʻzlangan asosiy vazifa faqatgina maʼmuriy chora koʻrish yoki fuqarolarni jazolash emas, balki aholi oʻrtasida suv resurslaridan oqilona foydalanish madaniyatini keng targʻib qilish, qonun ustuvorligini taʼminlash va tabiiy boyliklarni keyingi avlodlar uchun asrashdan iboratdir.

Amudaryo tumanining Durinki hamda Boʻston mahallalarida ham xuddi shu kabi navbatdagi nazorat-reyd tadbirlari tashkil etildi. Mutaxassislar har bir holatni diqqat bilan oʻrganib, tegishli tartibda qonuniy hujjatlashtirib borishdi. Bu oʻrganishlar jarayonida ham joylarda ayrim kamchiliklar va qoʻpol qonunbuzarlik holatlari aniqlandi.

Jumladan, Boʻston mahallasi hududida istiqomat qiluvchi fuqarolardan birining xonadoni tekshirilganda, hech qanday tegishli shartnoma tuzmasdan, ichimlik suvi tarmogʻiga noqonuniy ravishda ulangani va foydalanib kelayotganligi aniqlandi.

Xuddi shunday huquqbuzarlik holati Durinki mahallasi hududida istiqomat qiladigan yana bir fuqaroning xonadonida ham kuzatildi. Tekshiruv davomida ushbu fuqaro tomonidan suv hisoblagich uskunasiga oʻrnatilgan davlat plombasiga qasddan yoki ehtiyotsizlik oqibatida shikast yetkazilganligi, yaroqsiz holatga keltirilganligi maʼlum boʻldi.

Mazkur qonunbuzarlik holatlari boʻyicha mutasaddilar tomonidan tegishli dalolatnomalar rasmiylashtirilib, Maʼmuriy javobgarlik toʻgʻrisidagi kodeksning 163-moddasiga asosan aybdorlarning har biriga 4 million 120 ming soʻm miqdorida jarima jazosi qoʻllanildi.

Har bir qatra suvning oʻz qadri va bahosi bor. Tarmoqlarga noqonuniy ulanish, hisoblagichlarni buzish yoki suvni behuda isrof qilish kabi salbiy holatlar butun jamiyatimiz va iqtisodiyotimiz rivojiga toʻsqinlik qiluvchi illatlardir. Shunday ekan, har bir isteʼmolchi foydalanilgan suv uchun belgilangan toʻlovlarni oʻz vaqtida va toʻliq amalga oshirib, oʻrnatilgan qonun-qoidalarga qatʼiy amal qilmogʻi lozim. Zero, obihayotga nisbatan hurmat va tejamkorlik – bu eng avvalo oʻzimizga, oʻz oilamizga va butun jamiyatimizga boʻlgan yuksak hurmatning amaldagi yorqin ifodasidir.