Tizimli ravishda yoʻl harakati qoidalarini buzib kelayotgan haydovchilar bilan profilaktik suhbatlar oʻtkazildi

Yoʻl harakati xavfsizligini taʼminlash, fuqarolarning hayoti va sogʻligʻini asrash bugungi kunning eng dolzarb masalalaridan biri hisoblanadi. Soʻnggi vaqtlarda avtomobil yoʻllaridagi qatnov surʼatining ortishi, transport vositalari sonining muttasil koʻpayishi har bir harakat ishtirokchisidan yuksak masʼuliyat va hushyorlikni talab etmoqda. Afsuski, baʼzi haydovchilar tomonidan qoidalarga mensimay munosabatda boʻlish, oʻzgalarning hayotini ochiqchasiga xavf ostiga qoʻyish holatlari hamon uchrab turibdi. Ayniqsa, muntazam ravishda qoidabuzarlik sodir etish yoki jamiyatda oʻrnatilgan tartib-qoidalarni namoyishkorona buzish kabi noxush holatlar huquq-tartibot idoralarining doimiy diqqat markazida boʻlib kelmoqda.

Shu oʻrinda, Amudaryo tumanida ham yoʻl-transport hodisalarining oldini olish, qonun ustuvorligini taʼminlash va haydovchilarning huquqiy madaniyatini yuksaltirish maqsadida muntazam ravishda profilaktik tadbirlar amalga oshirilayotganini alohida taʼkidlash lozim. Amudaryo tumani Ichki ishlar boʻlimi hamda tuman Prokuraturasi xodimlari hamkorligida tashkil etilgan navbatdagi muhokama va tushuntirish ishlari ham aynan shu xayrli maqsadga yoʻnaltirildi.

Bu galgi profilaktik suhbatga oddiy qoidabuzarlar emas, balki oʻz xatti-harakatlari bilan jamiyat xavfsizligiga va fuqarolarning osoyishtaligiga jiddiy tahdid solayotgan maʼlum toifadagi shaxslar jalb etildi. Xususan, yil davomida 10-marta va undan koʻp miqdorda yoʻl harakati qoidalarini qasddan buzgan haydovchilar tushuntirish-targʻibot tadbirining asosiy ishtirokchilari boʻlishdi. Qisqa vaqt ichida 10-marta va undan ortiq qoidabuzarlikka yoʻl qoʻyish — bu tasodif yoki shunchaki eʼtiborsizlik emas, balki qonun-qoidalarga nisbatan tizimli ravishda bepisandlik qilish, oʻrnatilgan tartibni qasddan mensimaslik demakdir. Bunday haydovchilar nafaqat oʻzlarining, balki begunoh yoʻlovchilar va piyodalarning ham hayotini doimiy ravishda xavf ostiga qoʻyishadi.

Shuningdek, boʻlib oʻtgan ushbu maxsus tadbir davomida toʻy va turli xursandchilik marosimlari munosabati bilan tashkil etiladigan sayillarda avtomobillarda guruh boʻlib harakatlangan, jamoat tartibini qoʻpol ravishda buzgan va boshqa harakat ishtirokchilariga jiddiy noqulaylik tugʻdirgan haydovchilar bilan ham alohida suhbat oʻtkazildi.

Xalqimizda toʻy-tomoshalar azaldan xursandchilik va shodiyona sifatida keng nishonlanadi. Biroq, soʻnggi paytlarda baʼzi yoshlar tomonidan toʻy sayillari bahonasida markaziy koʻchalarda uzun kolonna boʻlib harakatlanish, tezlikni ruxsat etilgan meʼyoridan keskin oshirish, yoʻlning asosiy qatnov qismini sunʼiy ravishda toʻsib qoʻyish yoki kuchli ovoz chiqaruvchi moslamalardan asossiz foydalanish holatlari tez-tez koʻzga tashlanmoqda. Bunday pala-partish harakatlar nafaqat ularning eng quvonchli kunlarini qaygʻuga aylantirish xavfini tugʻdiradi, balki yoʻl boʻyida harakatlanayotgan boshqa fuqarolarning ham sogʻligʻiga jiddiy ziyon yetkazishi mumkin. Bunday guruhli harakatlar orqali yaratilgan tirbandliklar favqulodda xizmat mashinalarining, xususan tez tibbiy yordam yoki oʻt oʻchirish va qutqaruv ekipajlarining oʻz manziliga vaqtida yetib borishiga ham toʻsqinlik qiladi.

Amudaryo tumani Ichki ishlar boʻlimi va tuman Prokuraturasi mutasaddi xodimlari tomonidan oʻtkazilgan suhbat jarayonida har bir haydovchiga yoʻl harakati qoidalariga soʻzsiz va qatʼiy amal qilish shartligi, sodir etilayotgan qoidabuzarliklarning oxir-oqibati qanday mudhish fojialarga olib kelishi mumkinligi aniq hayotiy misollar asosida batafsil tushuntirildi.

Mutasaddilar nazoratni kuchaytirishdan maqsad faqat haydovchilarga jarima qoʻllash emas, balki insonning bebaho hayoti va sogʻligʻini asrash eng muhim tamoyil ekanini alohida taʼkidlab oʻtdilar. 10-marta va undan ortiq qoida buzgan shaxslarning ruhiy holati, ularning xavfsizlik qoidalariga nega bunchalik eʼtiborsiz ekanligi chuqur tahlil qilinib, kelajakda bunday salbiy holatlarning yana takrorlanishi jinoiy javobgarlikkacha boʻlgan ogʻirroq turdagi qatʼiy jazo choralarini keltirib chiqarishi haqida ogohlantirildi. Toʻy sayillarida ishtirok etayotgan haydovchilarga esa hayotdagi eng quvonchli kunlarni muammoli tartibbuzarlikka aylantirmaslik, jamiyatda yurish-turish qoidalariga hurmat bilan munosabatda boʻlish kerakligi alohida uqtirildi.

Ichki ishlar va prokuratura organlarining tajribali xodimlari serqatnov yoʻllardagi kundalik xavfsizlik barchaning umumiy vazifasi ekanligini, har bir fuqaro qonun oldida teng boʻlib, davlat tomonidan oʻrnatilgan tartibga soʻzsiz boʻysunishi shartligini eslatib oʻtishdi. Davomli tushuntirish va targʻibot ishlaridan soʻng, suhbatga chaqirilgan haydovchilar oʻzlarining yoʻl qoʻygan nojoʻya qilmishlaridan chin dildan pushaymon ekanliklarini bildirib, kelgusida bunday qoʻpol qoidabuzarliklarga yoʻl qoʻymaslikka, aksincha, yoʻl harakati xavfsizligini taʼminlashga oʻzlarining munosib xissalarini qoʻshishga soʻz berishdi.