21-may — Kutubxonachilar kuni munosib nishonlandi

Maʼnaviyat va maʼrifat har qanday jamiyat taraqqiyotining poydevori hisoblanadi. Bu poydevorni mustahkamlashda esa kitobning, mutolaa madaniyatining oʻrni beqiyosdir. Insoniyat yaratilgan dastlabki davrlardan boshlab oʻz tajribasi, bilimi va kashfiyotlarini qogʻozga tushirishga, ularni kelajak avlodlarga yetkazishga intilib kelgan. Ana shunday buyuk vazifani oʻz zimmasiga olgan, asrlar qaʼridan yetib kelgan durdona asarlarni, ilm-fan yutuqlarini asrab-avaylab, kitobxonlarga yetkazib beradigan moʻʼtabar kasb egalari — kutubxonachilar mehnati har qanday tahsinga sazovordir.

Bugungi shiddat bilan rivojlanayotgan axborot texnologiyalari asrida ham anʼanaviy kitob va kutubxonaning qadri aslo yoʻqolgani yoʻq, aksincha, ularning jamiyat hayotidagi, ayniqsa, yosh avlod tarbiyasidagi ahamiyati tobora ortib bormoqda. Kutubxonachi faqatgina kitob beruvchi shaxs emas, u oʻquvchining dunyoqarashini shakllantiruvchi, uning qiziqishlarini toʻgʻri yoʻnaltiruvchi va maʼnaviy olamini boyitishga xizmat qiluvchi maʼnaviy ustozdir.

Shu boisdan ham yurtimizda ushbu sharafli kasb egalarini qoʻllab-quvvatlash, ularning mehnatini munosib qadrlash va ragʻbatlantirish masalasiga alohida eʼtibor qaratib kelinmoqda. Xususan, Oʻzbekiston Respublikasi Prezidentining 2019-yil 7-iyundagi "Oʻzbekiston Respublikasi aholisiga axborot-kutubxona xizmati koʻrsatishni yanada takomillashtirish toʻgʻrisida"gi qarori bu boradagi ishlarni yangi bosqichga olib chiqdi. Mazkur hujjatga muvofiq mamlakatimizda 21-may sanasi "Kutubxonachilar kuni" sifatida keng nishonlanishi belgilangan. Qarorda ushbu sana munosabati bilan oʻzining boy tajribasi, kasbiga boʻlgan sadoqati bilan ajralib turadigan, sohada halol mehnat qilib, axborot-kutubxona tizimini rivojlantirishga munosib hissa qoʻshib kelayotgan fidoyi xodimlarni davlat mukofotlari bilan taqdirlash va ularni ragʻbatlantirish masalasi alohida koʻzda tutilgan.

Maʼlumki, Oʻzbekiston Respublikasi Maktabgacha va maktab taʼlimi vazirligi tomonidan taʼlim sohasini yanada takomillashtirish va tizimdagi islohotlarni jadallashtirish maqsadida may oyida "Muhim oylik" eʼlon qilingan boʻlib, mazkur oylik doirasida amalga oshirilishi lozim boʻlgan ishlarning “Yoʻl xaritasi” tasdiqlangan. Ushbu “Yoʻl xaritasi”da belgilangan vazifalarning ijrosini taʼminlash, shuningdek, kutubxonachilarning jamiyatdagi oʻrnini keng targʻib qilish maqsadida 20-may kuni Amudaryo tumanidagi 82-sonli umumiy oʻrta taʼlim maktabida "Kutubxonachilar kuni" munosabati bilan maʼrifiy anjuman tashkil etildi.

Ushbu bayram tadbiriga hududdagi barcha umumiy oʻrta taʼlim maktablarining kutubxona mudirlari va xodimlari taklif etildi. Tadbirga yigʻilgan hamkasblar nafaqat kasb bayramini nishonladilar, balki oʻzaro tajriba almashdilar, sohadagi yangiliklar va kelgusidagi rejalar haqida qizgʻin fikrlashish imkoniga ega boʻldilar.

Tadbir davomida soʻzga chiqqanlar kutubxonachilarning maktab hayotidagi, ayniqsa, oʻquvchi-yoshlarning tarbiyasidagi beqiyos oʻrni haqida alohida toʻxtalib oʻtdilar. Anjuman doirasida yil davomida oʻz kasbiga sadoqat bilan yondashgan, oʻquvchilarni kitob mutolaasiga jalb qilishda turli xil innovatsion usullardan foydalangan, kutubxona fondini boyitish va uni tizimli tashkil etishda alohida jonbozlik koʻrsatgan umumtaʼlim maktablarining eng faol va ilgʻor kutubxonachilari eʼtirof etildi. Ularga tashkilotchilar tomonidan faxriy yorliqlar hamda qimmatbaho esdalik sovgʻalari tantanali ravishda topshirildi. Bunday ragʻbat, eʼtirof va mukofotlar ularning yillar davomidagi zahmatli mehnatlariga berilgan bahodir.

Bugungi kunda davlatimiz tomonidan taʼlim sohasiga, shu jumladan, axborot-kutubxona markazlarini eng zamonaviy texnologiyalar va boy kitob fondlari bilan taʼminlashga juda katta mablagʻlar yoʻnaltirilmoqda. Bu yaratilgan shart-sharoitlarni oʻquvchilarga toʻgʻri va samarali yetkazishda aynan kutubxonachining oʻrni oʻta muhimdir. Ularsiz har qanday zamonaviy kutubxona ham shunchaki kitoblar saqlanadigan omborxonaga aylanib qolishi hech gap emas. Shunday ekan, 21-may sanasi faqatgina kutubxonachilarning emas, balki kitobni sevuvchi, qadrlovchi va undan maʼnaviy ozuqa oluvchi barcha ziyoli insonlarning kasb bayrami hisoblanadi.

Jamiyatning ziyo maskanlari boʻlmish kutubxonalar va ularning fidoyi xodimlarini qoʻllab-quvvatlashga qaratilgan bu kabi yuksak eʼtibor kelajak avlodning yanada bilimli, maʼnaviyati yuksak va dunyoqarashi keng insonlar boʻlib yetishishiga xizmat qiladi. Zero, kitobga, ilm-fanga va maʼrifatga qaratilgan eʼtibor — bu avvalo kelajakka, millatning ertangi kuniga yoʻnatirilgan eng katta va bebaho sarmoyadir.