Amudaryo tumanida energiya resurslari nazorati kuchaytirilmoqda

Bugungi kunda "Energiya samaradorligi — farovon hayot garovi" degan tamoyil nafaqat shior, balki har bir fuqaroning, har bir masʼul rahbarning kundalik hayotiy qoidasiga aylanib ulgurgan. Zero, tabiiy gaz, elektr energiyasi va obihayotning har bir qatrasi bebaho neʼmat boʻlib, ularni asrab-avaylash hamda maqsadli yoʻnaltirish butun jamiyat barqarorligini belgilab beradi. Aynan shu maqsadlarni hayotga tatbiq etish, joylarda kuzatilayotgan muammolarni tezkorlik bilan bartaraf qilish hamda qonun ustuvorligini taʼminlash maqsadida Amudaryo tumanida ham keng koʻlamli nazorat tadbirlari izchil davom ettirilmoqda.

Ushbu jarayonlarning uzluksizligini taʼminlash hamda sohada tartib oʻrnatish maqsadida Amudaryo tuman prokurori Bahrom Masharipov boshchiligida ertalabki yigʻin oʻtkazildi. Mazkur yigʻinda tumanning gaz, elektr va ichimlik suvi taʼminoti korxonalarining masʼul xodimlaridan iborat maxsus tashkil topgan ishchi guruh aʼzolari ishtirok etdi.

Tadbirda har bir soha vakilining oldida turgan dolzarb vazifalar aniq va qatʼiy belgilab berildi. Xususan, ishchi guruh aʼzolariga birinchi galdagi vazifa sifatida aholi xonadonlari va tadbirkorlik subʼektlari tomonidan energiya resurslaridan foydalanish madaniyatini oʻrganish va taftish qilish topshirigʻi qoʻyildi. Joylarda elektr energiyasi, tabiiy gaz va eng aziz neʼmat boʻlgan ichimlik suvidan noqonuniy foydalanish, tarmoqlarga oʻzboshimchalik bilan ulanish, oʻgʻirlik va talon-toroj qilish kabi salbiy holatlarning oldini olish, ularni oʻz vaqtida aniqlash hamda zudlik bilan bartaraf etish boʻyicha reyd tadbirlarini keskin kuchaytirish choralarini koʻrish yuzasidan qatʼiy koʻrsatmalar berildi. Bu kabi tadbirlar nafaqat davlat mulkini asrash, balki insofli isteʼmolchilarning haq-huquqlarini himoya qilishga ham xizmat qilishi alohida taʼkidlab oʻtildi.

Albatta, zamonaviy tizimlarni joriy etishda raqamlashtirish va avtomatlashtirishning oʻrni beqiyos. Bugungi kunda isteʼmolchilarga oʻrnatilgan zamonaviy hisoblagichlarning uzluksiz ishlashi tizimdagi shaffoflikni kafolatlaydi. Shu bois, reyd tadbirlari doirasida ishchi guruh aʼzolari tomonidan aloqaga chiqmagan, yaʼni markazlashgan tizimga maʼlumot uzatishda uzilishlar kuzatilgan isteʼmolchilarning elektr va tabiiy gaz hisoblash uskunalari joyiga chiqqan holda birma-bir koʻzdan kechirilmoqda. Oʻrganishlar davomida hisoblagichlarning ishdan chiqqan, nosoz ehtiyot qismlari zudlik bilan yangisiga almashtirilib, mavjud texnik kamchiliklar toʻliq bartaraf qilinmoqda. Amalga oshirilgan bunday tezkor chora-tadbirlar natijasida hisoblagichlarning markaziy baza bilan qayta aloqaga chiqishi va maʼlumotlarni aniq uzatishi taʼminlanmoqda. Bu esa, oʻz navbatida, isteʼmol qilingan energiya resurslarining aniq hisobini yuritish va sunʼiy yoʻqotishlarning oldini olishda muhim omil boʻlib xizmat qiladi.

Resurslarni tejashning yana bir muhim yoʻnalishi bu — eskirgan infratuzilmani yangilashdir. Ayniqsa, aholini tabiiy gaz bilan barqaror taʼminlash, quvurlardagi yoʻqotishlarni kamaytirish maqsadida tumanda keng koʻlamli modernizatsiya ishlari olib borilmoqda. Jumladan, tumanning Durunki mahallasi hududida joylashgan, uzoq yillar davomida foydalanilib kelingan va bugungi kun talablariga javob bermay qolgan eski gaz quvurlarini yangilash jarayonlari masʼullarning diqqat markazida boʻldi. Ishchi guruh aʼzolari tomonidan ushbu hududdagi diametri 100 millimetr boʻlgan oʻrta bosimli eski gaz quvurlarini zamonaviy va chidamlilariga almashtirish ishlari bevosita joyiga chiqqan holda koʻzdan kechirildi va nazoratga olindi. Bu kabi amaliy ishlar tabiiy gazning isteʼmolchigacha boʻlgan yoʻldagi texnik yoʻqotishlarini bartaraf etish bilan birga, hudud aholisining xonadonlariga zangori olovning bir maromda va xavfsiz yetib borishini taʼminlaydi.

Amudaryo tumanida huquqni muhofaza qiluvchi organlar va kommunal soha xodimlari hamkorligida olib borilayotgan bu kabi tushuntirish, nazorat va taʼmirlash ishlari aholi turmush farovonligini yuksaltirish, iqtisodiyot barqarorligini taʼminlash hamda qonun ustuvorligini qaror toptirishdek ezgu maqsadlarga xizmat qilishi shubhasiz. Energiya samaradorligiga erishish va resurslardan oqilona foydalanish esa kelajak avlodlarning farovonligi uchun qoʻyilgan eng muhim qadamdir.