Amudaryo tumanida Mangʻit suv tozalash inshooti foydalanishga topshirildi

Vatanimiz mustaqilligining 35 yillik bayrami arafasida butun mamlakatimiz boʻylab ulkan bunyodkorlik va yangilanishlar nafasi kezmoqda. Ushbu tarixiy sanaga munosib tuhfa sifatida, hurmatli Prezidentimiz Shavkat Mirziyoyev ishtirokida hududlarda umumiy qiymati 50 trillion soʻmlik 163 ta yangi inshootni foydalanishga topshirishga bagʻishlangan tantanali marosim boʻlib oʻtdi. Mazkur tadbirda davlatimiz rahbari videoaloqa orqali hududlardagi studiyalarga yigʻilgan keng jamoatchilik vakillarini va ular orqali butun Oʻzbekiston xalqini yaqinlashib kelayotgan eng ulugʻ, eng aziz bayram bilan samimiy muborakbod etdi. Shundan soʻng, davlatimiz rahbari ramziy tugmani bosish orqali mamlakatimiz iqtisodiy va ijtimoiy hayotida muhim ahamiyat kasb etuvchi 72 ta yirik investitsiya loyihasi hamda 91 ta ijtimoiy soha obʼektiga rasman start berdi.

Bugungi kunda olib borilayotgan islohotlarning amaliy natijasi sifatida, Qoraqalpogʻiston Respublikasining oʻzida jami 12 ta yirik obʼekt aholi xizmatiga topshirildi. Ushbu inshootlar qatorida umumiy qiymati 167,7 milliard soʻm mablagʻ hisobidan toʻliq rekonstruktsiya qilingan Mangʻit suv tozalash inshootining borligi hudud aholisi uchun chinakam bayram tuhfasi boʻldi.

Taʼkidlash oʻrinliki, soʻnggi yillar davomida mintaqada “Amudaryo tumanining ichimlik suv taʼminotini yaxshilash” loyihasi izchil amalga oshirib kelinmoqda. Ushbu loyiha doirasida tuzilgan shartnoma asosida 3 ta yirik ichimlik suvi obʼekti hamda uzunligi 300 kilometrdan ortiq boʻlgan ichimlik suvi tarmoqlarini yangidan qurish va rekonstruktsiya qilish ishlari jadal olib borildi. Mazkur “Mangʻit” suv tozalash inshooti hamda unga tutash ichimlik suvi tarmoqlarining toʻliq foydalanishga topshirilishi natijasida, tumandagi isteʼmolchilarni toza va markazlashgan ichimlik suvi bilan taʼminlash darajasini 80 foizga yetkazish rejalashtirilgan. Loyihaning texnik va muhandislik imkoniyatlari ham gʻoyat eʼtiborga molikdir. Mazkur zamonaviy inshoot 1 sutkada 40 000 kub metr ichimlik suvini tozalash quvvatiga ega. Ayni kunlarda inshootda barcha qurilish va montaj ishlari yuqori sifat darajasida toʻliq yakuniga yetkazilgan boʻlib, stantsiya eng soʻnggi rusumdagi zamonaviy suv tozalash texnologiyalari bilan jihozlangan.

Prezidentimiz ushbu obʼektlarni rasman ochib berganidan soʻng, tuman hokimi Sobir Xoʻjametov boshchiligida mahalliy faollar va nuroniylar ramziy tasmani kesib, majmuaning bugungi kundagi faoliyati, shuningdek, yaratilgan zamonaviy sharoitlar bilan yaqindan tanishdilar.

Bu kabi yirik bunyodkorlik ishlari va yangilanishlar faqatgina iqtisodiy koʻrsatkichlarda aks etmaydi. Avvalo, ushbu loyihaning amalga oshishi minglab xonadonlarning kundalik turmush sifatini keskin yaxshilash, hududda sanitariya va gigiyena sharoitlarini yanada mustahkamlash va aholi orasida sogʻlom turmush tarzini barqaror taʼminlashga bevosita xizmat qiladi. Bu esa mamlakatimizda inson qadrini ulugʻlash yoʻlida olib borilayotgan islohotlarning yorqin ifodasidir.