2013 - 2015-yillarda Amudaryo tumanini kompleks rivojlantirish dasturi

Tumanni kompleks rivojlantirish dasturini ishlab chiqishda 5 ta yoʻnalishda ishlar olib borildi.

Birinchidan.

Tumanda sanoat salohiyatini 2013-2015-yillarda rivojlantirish investitsiya loyihalari ishlab chiqilib, bu Dasturga jami qiymati 32 mln. 672,8 ming AQSh dollari ekvivalentidagi 20 ta loyihalar kiritilib, ularda 478 ta yangi ish oʻrinlari tashkil qilish belgilab olindi.

Amalga oshiriladigan loyihalarni tarmoqlar kesimida qarab chiqadigan boʻlsak, oziq-ovqat sanoatida 5 ta, qurilish materiallari ishlab chiqarishda 9 ta, yengil sanoatni rivojlantirishda 4 ta va boshqa sohalarda (kir yuvish vositasi, briket) 2 ta loyihani tashkil qiladi.

Dasturdagi jami 20 ta loyihadan 18 ta loyihaga 12287,3 ming AQSh dollari ekvivalentida bank krediti rejalashtirilgan.

Joriy yilning birinchi yarim yilligida amalga oshiriladigan 14 ta loyiha qiymati 1212,6 ming AQSh dollari ekvivalentiga teng boʻlib, shundan 12 ta loyihaga 797,1 ming dollar ekvivalentida bank kreditlari talab qilinadi, 2 ta loyiha oʻz mablagʻlari hisobidan amalga oshiriladi. Kredit mablagʻi ajratilishi talab qilinadigan 12 ta loyihadan 1-chorakda 8 ta loyihaga 417,1 ming dollar ekvivalentida kredit mablagʻlari ajratilib, ishga tushirilishi taʼminlandi. Qolgan loyihalarning 6 tasi 2-chorakda, 5ta loyiha 3-chorakda va 1 ta loyiha 4-chorakda ishga tushirilishi taʼminlanadi.

Ikkinchidan.

Mavjud sanoat korxonalarini toʻliq quvvatda ishlatish, boʻsh turgan bino va inshootlarda ishlab chiqarishni tashkil etish hamda tijorat banklar balansidagi korxonalarning ishlab chiqarish hajmlarini oshirish tadbirlari asosida tumanda kam quvvatli, iqtisodiy nochor korxonalarni moliyaviy qoʻllab-quvvatlash Dasturiga 2 ta korxona kiritilib, ularga jami 28,7 mlrd. soʻm investitsiya kiritilishi va 104 ta yangi ish oʻrinlari yaratilishi belgilab olinib, bugungi kunda 1 ta loyiha ("Jumurtau” MChJ da shagʻal ishlab chiqarishni kengaytirish loyihasi) ishga tushirilib, unga 100,0 mln. soʻm investitsiya kiritilib, yangidan 4 ta ishchi oʻrni yaratildi.

Ikkinchi loyiha - "Amudaryo tekstil” xorijiy korxonasida ip-kalava ishlab chiqarish loyihasi boʻyicha 28,6 mlrd. soʻm miqdorida investitsiya kiritilishi belgilangan boʻlsa, amalda 41,9 mln. AQSh dollari miqdorida investitsiya kiritilib, hozirgi kunda qurilish ishlari davom qildirilmoqda.

Uchinchidan

Xizmat koʻrsatish va servis sohalarini rivojlantirishga eʼtibor qaratilib, tumanda "2012-2016-yillarda xizmat koʻrsatish sohalarini rivojlantirish” Dasturi ishlab chiqildi.

Dasturga asosan joriy yil uchun belgilangan xizmat koʻrsatish va servisni rivojlantirish parametrlarida jami 68 ta xizmat koʻrsatish va servis obʼektlari tashkil qilish, xizmatlar hajmini 99,6 mlrd. soʻmga, oʻsim surʼatini 116,3 foizga yetkazish nazarda tutilgan.

Joriy yil 1-chorakda Dasturdagi 19 ta oʻrniga 21 ta xizmat koʻrsatish va servis obʼektlari tashkil qilinib, jami 324 mln. soʻm investitsiya kiritildi, shundan 40,0 mln. soʻm tijorat bank kreditlari, 284,5 mln. soʻm tadbirkorlarning oʻz mablagʻlari hisobidan amalga oshirilgan. Xizmat koʻrsatish obʼektlarini ishga tushirish natijasida 24 ta yangi ish oʻrinlari yaratildi.

Joriy yil Dasturidagi "UZTRANSGAZ” tomonidan tashkil qilinadigan "Aholiga maishiy xizmat koʻrsatish majmuasi” smeta bahosi 469,0 mln. soʻmni tashkil qilib, pudratchi tashkilot "Amudaryo qurilish materiallari” MChJ tomonidan qurilish ishlari olib borilmoqda.

Toʻrtinchidan

Qishloq xoʻjalik mahsulotlari ishlab chiqarishni, yaʼni chorvachilik, parrandachilik, baliqchilik, asalarichilikni rivojlantirish Dasturi ishlab chiqilib, mazkur Dasturga jami qiymati 3 mlrd. 306,0 mln. soʻmlik 43 ta loyiha kiritilgan boʻlib, shundan 2 mlrd. 557 mln. soʻmni bank kreditlari tashkil qiladi va mazkur loyihalarning amalga oshirilishi natijasida 112 ta yangi ish oʻrinlari yaratiladi.

Bu yoʻnalishda olib borilgan ishlarimiz natijasida jami 2 mlrd 970 mln. soʻmlik investitsiyalar oʻzlashtirilib, 40 ta loyiha toʻliq amalga oshirilib, ularda 98 ta yangi ish oʻrni yaratildi. Qolgan 3 ta loyihani 1-iyulga qadar yakuniga yetkazish boʻyicha ishlar olib borilmoqda.

Oziq-ovqat Dasturidagi "Qoraqalpoq mahsulotlari” MChJning goʻsht yetishtirish yoʻnalishidagi loyihasi boʻyicha uskunalar olib kelinib, oʻrnatish ishlari olib borilmoqda.

Oʻzbekiston Respublikasi Vazirlar Mahkamasining selektor yigʻilishida Bosh Vazir tomonidan oziq-ovqat mahsulotlari ishlab chiqarish loyihalarini 2 barobar oshirish boʻyicha bergan topshirigʻi asosida qoʻshimcha Dastur ishlab chiqildi. Qoʻshimcha Dasturga jami 1 mlrd. 800 mln. soʻmlik 40 ta loyiha kiritildi.

Bu Dasturga kiritilgan loyihalar boʻyicha tegishli ishlar olib borilmoqda va ular joriy yilning oktyabr oyiga qadar toʻliq amalga oshirilishi va ularda 54 ta yangi ish oʻrinlari yaratilishi nazoratga olingan.

Beshinchidan

Oʻzbekiston Respublikasi Prezidentining 2012-yil 22 oktyabrdagi "Oʻzbekistonda fermerlik faoliyatini tashkil qilishni yanada takomillashtirish va uni rivojlantirish chora-tadbirlari toʻgʻrisida”gi PF-4478-sonli Farmoniga asosan koʻp tormoqli fermer xoʻjaliklarini tashkil qilish maqsadida tumandagi jami 278 ta fermer xoʻjaliklaridan 197 tasini (71 foizi) koʻp tarmoqli fermer xoʻjaliklariga aylantirish boʻyicha tuman Dasturi ishlab chiqildi.

Dasturga asosan 8 ta yunalish boʻyicha jami loyiha qiymati 3124.5 mln. soʻmlik 207 ta loyiha rejalashtirilib, ularning amalga oshirilishi natijasida 881 ta yangi ish oʻrinlari yaratiladi.