"Kamolot" YoIH tuman Kengashi tashkilotchiligidagi musobaqalar

Ona Vatanga xizmat qilish — bugun mustaqil mamlakatimiz hududlarida kamol topayotgan har bir oʻgʻlonning ezgu maqsadi. Ushbu sharafli orzuni qalbiga jo etgan yigitlarimizga Vatan himoyachisi boʻlishdek faxru iftixor yanada ulkan kuch-gʻayrat baxsh etmoqda. Oʻquvchi yoshlarni Qurolli Kuchlar saflariga — harbiy xizmatga, oliy harbiy bilim yurtlariga kirishga tayyorlash, oʻsib kelayotgan yosh avlod qalbida Vatanga sadoqat tuygʻularini shakllantirish maqsadida oʻtkazilayotgan uch bosqichli «Shunqorlar» harbiy-sport musobaqalari bugungi kunga kelib oʻzining katta samarasini bermoqda. Bu musobaqalarda oʻsmirlar toblanadi, chinakam Vatan himoyachisi boʻlib shakllanadi. Negaki, Vatanimizning ertangi kuni, mamlakatimiz kelajagi maʼnan yetuk, jismonan barkamol yosh avlod qoʻlida.

«Kamolot» yoshlar ijtimoiy harakati Qoraqalpogʻiston Respublikasi Kengashi, Respublika oʻrta-maxsus, kasb-hunar taʼlimi boshqarmasi, madaniyat va sport ishlari vazirligi, Mudofaa vazirligi bilan hamkorlikda Respublikamizdagi barcha hududlaridagi kasb-xunar kollejlari va akademik litsey oʻquvchi yoshlari oʻrtasida «Shunqorlar» harbiy sport musobaqalarining birinchi bosqichi yuqori saviyada oʻtkazildi.

Musobaqalarning tuman bosqichi ham qiziqarli va murosasiz bellashuvlarga boy boʻldi. Musobaqa yakunlariga koʻra Amudaryo akademik litseyining «Amir Temur vorislari» jamoasi gʻoliblikni qoʻlga kiritdi va keyingi bosqich yoʻllanmasiga ega boʻldi.

Yoshlarning huquqiy bilim va tafakkurini yuksaltirish taʼlim-tarbiya sohasida olib borilayotgan izchil islohotlar jarayonining tarkibiy qismini tashkil etadi. Respublikamiz boʻylab anʼanaviy tarzda oʻtkazib kelinayotgan "Siz qonunni bilasizmi?" koʻrik-tanlovi ham shu maqsadga xizmat qilmoqda.

Mamlakatimiz yoshlari oʻrtasida huquqiy taʼlim-tarbiyani takomillashtirish, jamiyatda qonun ustuvor boʻlishiga erishish, amaldagi qonunlar mohiyatini oʻsib kelayotgan yosh avlodga tushuntirish, huquqiy demokratik davlat barpo etishda yoshlarning ishtirokini taʼminlash, Prezident Farmonlari, Oʻzbekiston Respublikasi Qonunlariga yoshlarda hurmat bilan qarash tuygʻularini, ona Vatanga muhabbat, kelajakka ishonch ruhini shakllantirish, qonunlar targʻiboti orqali yoshlar va oʻsmirlar oʻrtasida huquqbuzarlik holatlari, jinoyatchilik illatlarining oldini olish hamda butunlay bartaraf etish yoʻlida bir qator xayrli ishlar qilinmoqda. Shu maqsadda tuman hokimligi, tuman prokuraturasi, «Kamolot» yoshlar ijtimoiy harakati Amudaryo tuman boʻlimi Kengashi, jinoyat ishlari boʻyicha tuman Sudi hamda tuman ichki ishlar boʻlimi bilan hamkorlikda anʼanaviy "Siz qonunni bilasizmi?" koʻrik-tanlovining tuman bosqichi boʻlib oʻtdi.

Bu tanlovda tumanimizdagi akademik litsey va barcha kasb-hunar kollejlarining talaba –oʻquvchi yoshlari oʻzaro kuch sinashdilar. Tanlov yakunlariga koʻra Mangʻit iqtisodiyot kasb-hunar kollejining "Adolat qonunlari” jamoasi 1-oʻrinni egalladi va tanlovning navbatdagi hududiy bosqichiga yoʻllanmani qoʻlga kiritdi. Gʻolib jamoalar hamda ishtirokchilarga "Kamolot" yoshlar ijtimoiy harakatining tuman kengashi tomonidan sovgʻalar, diplom va fahriy yorliqlar topshirildi.

Shaxar va tumanlardagi chaqiriqqacha tayyorgarlik yoshidagi talaba va oʻquvchi-yoshlarini harbiy bilim yurtlariga oʻqishga kirishga ruhan va jismonan tayyorlash, ular oʻrtasida Vatanga muxabbat, xarbiy vatanparvarlik gʻoyalarini targʻib qilish, yosh avlodda Davlat chegaralariga nisbatan xurmat tuygʻusini shakllantirish, Vatanimiz xavfsizligini taʼminlash uchun ularning maʼsuliyatini kuchaytirish maqsadida tumanimizdagi 3-sonli Mangʻit chegara posti, «Kamolot» yoshlar ijtimoiy Harakati tumani boʻlimi Kengashi bilan xamkorlikda tumandagi akademik litsey va kasb-hunar kollejlarida faoliyat yuritib kelayotgan «Yosh chegarachilar» klublari oʻrtasida musobaqa oʻtkazildi.

Musobaqada oʻrta maxsus, kasb-hunar taʼlimi muassasalarining 6 ta jamoalari ishtirok etib, hakamlar hayʼatining xulosasiga koʻra Qilichboy maishiy xizmat koʻrsatish kasb-hunar kollejining «Yosh chegarachilar» jamoasi gʻoliblikni qoʻlga kiritdi va musobaqaning navbatdagi - Qoraqalpogʻiston Respublikasi boskichi yullanmasiga ega boʻldi.