Uchastka saylov komissiyalari tomonidan saylovga qizgʻin tayyorgarlik koʻrilmoqda

Mamlakatimizda tobora yaqinlashayotgan Oʻzbekiston Respublikasi Prezidenti sayloviga tayyorgarlik ishlari qizgʻin tarzda olib borilmoqda.  Amudaryo tumanida hamda ushbu muhim siyosiy jarayonni munosib tarzda oʻtkazish borasida amaliy ishlar olib borilmoqda.

Tumanda Oʻzbekiston Respublikasi Prezidenti saylovini oʻtkazish maqsadida jami 64 ta saylov uchastkalari tuzilgan boʻlib, ularning 54 tasi umumtaʼlim maktablarida, 2 tasi kasb-hunar maktabida, 1 tasi musiqa va sanʼat maktabida, 1 tasi muhandislik texnikumida, 1 tasi sport maktabida, 3 tasi madaniyat muassasalarida, 1 tasi fuqarolar yigʻinlari binolarida va 1 tasi tashkilot binosida joylashgan. Oʻzbekiston Respublikasi Prezidenti saylovini oʻtkazuvchi 1-Qoraqalpogʻiston okrug saylov komissiyasining qarori bilan saylovchilar soniga qarab, har biri 11-15 nafar aʼzodan iborat tarkibda uchastka saylov komissiyalari tuzildi.

Aytish kerakki, tumanda saylov uchastkalarining moddiy-texnik taʼminoti hamda saylovchilar uchun qulayliklar yaratish bilan bogʻliq tashkiliy ishlar oʻz vaqtida amalga oshirildi. Saylov uchastkalarida mavjud muammo va kamchiliklar barataraf qilinib, xonalar zarur jihozlar bilan taʼminlandi. Saylovga tayyorgarlik koʻrish, saylov bilan bogʻliq jarayonlar xususida jamoatchilikni xabardor qilib borish, aholi, ayniqsa, saylovda ilk marotaba qatnashadigan yoshlarning bu boradagi bilim va tushunchalarini kengaytirish borasida targʻibot-tashviqot ishlariga alohida eʼtibor qaratilmoqda.

Jumladan, tumandagi Qipchoq ovul fuqarolar yigʻini binosida joylashgan 141-saylov uchastkasida ham saylovga tayyorgarlik ishlari avjida. Uchastka saylov komissiyasi raisi Ibragim Rajabov boshchiligida barcha zaruriy ishlar oʻz muddatlarida amalga oshirilmoqda. Saylov uchastkasi markazi boʻlmish ovul fuqarolar yigʻini binosida mahalliy byudjet mablagʻlari hisobidan 392 mln soʻm mablagʻ evaziga qayta taʼmirlash ishlari olib borildi. Bino atrofi obodonlashtirilib, gullar ekildi. Xonalar zaruriy jihozlar - stol-stullar, kompyuter jamlanmalari bilan jihozlanib, saylovchilar uchun barcha qulayliklar yaratildi.

Aytish kerakki, 141-saylov uchastkasi hududida ikkita aholi punkti mavjud boʻlib, bular Koʻkcha hamda Qayrovul aholi punktlaridir. Ularda istiqomat qiluvchi jami aholi soni 3701 nafarni tashkil etib, ularning 2407 nafari saylov jarayonlarida ishtirok etadilar. Shundan 107 nafari 18 yoshga toʻlgan, saylov jarayonlarida ilk bora ishtirok etadigan yoshlardir.

Choykoʻl ovulidagi 22-sonli maktabda joylashgan 138-sonli uchastka saylov komissiyasi aʼzolari ham saylovga tayyorgarlik jarayonlarini qizgʻin tarzda davom ettirishmoqda. Uchastka saylov komissiyasi raisi Azimjon Bekbergenov boshchiligidagi 15 nafar aʼzolari Prezident saylovini munosib oʻtkazish maqsadida tizimli ishlarni tashkil etmoqdalar.

Xususan, saylov uchastkasi markazi joylashgan binoda mavjud kamchiliklar aniqlanib, zarur qurilish-taʼmirlash ishlari olib borildi. Uchastka saylov komissiyasi raisi, oʻrinbosari, kotibi hamda aʼzolarining samarali faoliyat olib borishlari uchun alohida xonalar ajratilib, yumshoq mebellar, televizor, stol-stul hamda kompyuter jamlanmalari bilan taʼminlangan. Saylov uchastkasi hududida 543 ta xonadonda istiqomat qiluvchi 595 ta oilalar mavjud. Jami aholi soni 3564 nafarni tashkil etib, ularning 2318 nafari saylovchilardir.

Shu oʻrinda taʼkidlash joizki, uchastka saylov komissiyalari raisi, oʻrinbosari, kotiblari hamda aʼzolari malakalarini oshirish maqsadida saylov qonunchiligi doirasida turli mavzularda seminar-trening mashgʻulotlari ham oʻtkazilmoqda.

Tumanimizdagi Oybek nomli mahalla hududidagi 55-sonli maktab 97-sonli saylov uchastkasining markazi hisoblanib, bu yerdagi uchastka saylov komissiyasi tomonidan ham saylovga munosib tayyorgarlik koʻrilmoqda. Uchastka saylov komissiyasi raisi Rohatoy Yusupova boshchiligida 13 nafar kishidan iborat uchastka saylov komissiyasi siyosiy jarayonni qonun talablari asosida oʻtkazish borasida samarali faoliyat olib bormoqda. 

Saylov uchastkasi hududida 25 ta koʻcha joylashgan boʻlib, ularda 4530 nafar aholi istiqomat qilishadi. Shundan jami saylovchilar soni 2500 nafar boʻlib, birinchi marta ovoz beruvchilar 78 nafarni, koʻzi ojizlar 3 nafarni, nogironligi bor fuqarolar 67 nafarni tashkil etadi.

Uchastka saylov komissiyasi joylashgan bino Saylov kodeksi va boshqa zarur qoʻllanmalar bilan taʼminlangan. Uchastka saylov komissiyasi raisi, oʻrinbosari, kotibi va aʼzolarining faoliyat olib borishlari uchun alohida xonalar ajratilib, ular kompyuter jamlanmalari, telefon, stol-stullar bilan yetarli darajada taʼminlangan. 

Taʼkidlash kerakki, tumanimizdagi barcha saylov uchastkalarida ham Oʻzbekiston Respublikasi Prezidenti sayloviga munosib tayyorgarlik koʻrilib, saylovchilarning saylovda ishtirok etishlari uchun barcha qulayliklar hamda sharoitlar yaratilmoqda.

Tuman hokimligining Axborot xizmati.