15-oktyabr − Xalqaro qishloq ayollari kunida qishloq ayollarining mehnatlari eʼtirof etildi

Bugungi kunda butun dunyoda ayollar huquqlarini himoya qilish, ularni har tomonlama qoʻllab-quvvatlash boʻyicha mintaqaviy va xalqaro ahamiyatga ega yangidan yangi tashabbuslar ilgari surilib kelinmoqda. Jumladan, mamlakatimizda ham keyingi olti yilda xotin-qizlarni har tomonlama qoʻllab-quvvatlash, ularning ijtimoiy-iqtisodiy va siyosiy faolligini oshirish, bandligini taʼminlash, tadbirkorlikka keng jalb etish borasida erishilgan yutuqlar jahon hamjamiyati tomonidan munosib eʼtirof etilib kelinmoqda.

Amudaryo tumanidagi Bogʻ mahallasida ham ayollar tadbirkorligini rivojlantirish, ularning bandligini taʼminlashga alohida ahamiyat berilmoqda.

Hududda 1908 nafar ayol istiqomat qiladi. Ayollarning hayotida uchrayotgan turli xil maishiy muammolarni hal etishda mahallaning xotin-qizlar faoli Raʼno Abdullayeva mahalla raisi, hokim yordmachisi bilan birgalikda samarali ravishda hamkorlikni yoʻlga qoʻygan.

Bugungi kunda mahallada istiqomat qiluvchi 68 nafar ayol “Ayollar daftari”ga kiritilgan boʻlib, ular doimiy daromad manbaiga ega boʻlishlari bilan daftardan chiqariladi.

Quvonarlisi, ushbu ayolllarning 14 nafarning har biriga 5 mln. soʻm miqdorida imtiyozli ravishda kreditlar ajratildi. Ular oʻz xonadonlarida supurgi tayyorlash bilan shugʻullanishmoqda. 1 ayol bir kunda 10 dan ortiq supurgi tayyorlab, avvalo ichki bozorlarimizni arzon hom-ashyo bilan taʼminlamoqda. Qolaversa, tayyor mahsulotlar Toshkent shahriga ham yetkazib berilib, Qozogʻiston Respublikasiga esa eksport qilinmoqda.

Ichki bozorlarimizda 1 ta supurgi narxi uning katta-kichikligiga, zich toʻqilganligiga qarab 8 ming soʻmdan 15 ming soʻmgacha sotilyapti.

Shundan ham bilsa boʻladiki, 1 nafar hunarmand ayol bir kunda 100 ming. soʻmdan ortiq daromad topib, oilaviy byudjetiga oʻz xissasini qoʻshmoqda.

Bogʻ mahallasi qishloq hududi hisoblansa ham, qishloq ayollari oʻtayotgan kunlaridan aslo nolishmaydi. Aksincha, qishloq xoʻjaligi maxsulotlarini yetishtirish, chorvachilik, hunarmandchilik bilan shugʻillanishga barcha qulayliklar mavjudligini mamnuniyat bilan eʼtirof etishadi.

Yaqinda hokim yordamchisi hamda xotin-qizlar faolining koʻmagi bilan “Ayollar daftari” da turuvchi 1 nafar ayolga oʻz tomorqasida issiqxona tashkil etishi uchun 33 mln. soʻm miqdorida subsidiya ajratildi. Shuningdek, “Ayollar daftari”dagi 15 nafar ayolga dehqonchilik qilishlari uchun yer maydonlari ajratilib, bandligi taʼminlandi. Undan tashqari, 8 nafar ayollar tikuvchilik boʻyicha kasbga oʻqitilmoqda.

Mahallada ayollar salomatligini saqlashga ham alohida eʼtibor qaratilmoqda. Yaqinda 400 nafar ayol tibbiy koʻrikdan oʻtkazilib, zaruriy dori-darmonlar bilan taʼminlandi.

Mahallaning xotin-qizlar faoli Raʼno Abdullayeva “Oqila ayollar” harakati aʼzolari bilan birgalikda oilalarda kelib chiqqan notinchlik va ajrimlarning oldini olish maqsadida doimiy ravishda uchrashuvlar, targʻibot tadbirlarini oʻtkazib keladi.

Shu kunga qadar, mahallada turli sabablar bilan kelib chiqqan oilaviy nizolar oʻrganib chiqilib, ajrim yoqasida turgan 9 ta oila yarashtirildi.

“Oqila ayollar” harakati aʼzolari, koʻcha boshilari mahallada yangidan oila qurgan yoshlar bilan muloqotni samarali tarzda yoʻlga qoʻyishgan.

Yoshi ulugʻ onaxon va otaxonlar yosh oilalarga hayotning turli sinovlarini birdamlikda, hamjihatlikda yengib oʻtish kerakligini hayotiy misollar orqali tushuntirib beradilar.

Bogʻ mahallasida yashovchi ayollar qishloq ayoli boʻlsalar ham davlat va jamoat tashkilotlarida, xususiy biznes sohasida ishlab, ishidan tashqari oʻz tomorqalarida qishloq xoʻjaligi maxsulo tlarini muntazam ravishda yetishitirib, dasturxonlarimizni sarhil mevalar, poliz mahsulotlari bilan taʼminlashmoqda.

Undan tashqari, ular tomonidan tayyorlanayotgan mahsulotlar oilaviy daromadlari yuksalishiga hamda mamlakatimiz iqtisodiyotining gullab-yashnashiga katta hissa boʻlib qoʻshilmoqda.

15-oktyabr − Xalqaro qishloq ayollari kunida qishloq ayollarining mehnatlari, jonkuyarliklari yana bir bor eʼtirof etilib, ularga ehtirom koʻrsatildi.

Tuman hokimligining Axborot xizmati.