Axborot-kutubxona markazi kitobxonlar xizmatida

Oʻzbekiston Respublikasi Oliy Majlisi huzuridagi Nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan Amudaryo televideniyesi tahririyatining “Yuksak maʼnaviyatli va ahloqli yoshlar − kelajak poydevori” nomli grant loyihasi doirasida yoshlarning boʻsh vaqtini mazmunli oʻtkazishga, ularni mafkura maydonining turli hurujlaridan himoya qilishga maʼnaviy dunyosini boyitishga xizmat qiluvchi koʻplab tadbirlar tashkil etilmoqda.

Jumladan, 23-yanvar kuni yoshlar oʻrtasida kitobxonlikni keng targʻib qilish maqsadida Amudaryo tumani Axborot-kutubxona markaziga 55-sonli maktab oʻquvchilari ishtirokida ekskursiya uyushtirildi.

Maʼlumki, Oʻzbekiston Respublikasi Prezidentining 2019-yil 7-iyundagi “Oʻzbekiston Respublikasi aholisiga axborot-kutubxona xizmatini koʻrsatishni yanada takomillashtirish tugʻrisida”gi qarori qabul qilingin edi. Mazkur qaror ijrosini taʼminlash maqsadida Amudaryo tumanida 2019-yilda Axborot-kutubxona markazi faoliyati yoʻlga qoʻyildi.

Kutubxonining eski binosi tuman Madaniyat boʻlimi markazi binosida joylashgan edi. Amudaryo tumani hokimligining 2022-yil 16-dekabr kungi qaroriga asosan axborot-kutubxona markazi uchun Oybek mahallasi hududidan yangi bino ajratildi.

Yangi binoda kitobxonlar uchun barcha sharoitlar yaratilgan boʻlib, bu yerdan ular istalgan turdagi badiiy va ilmiy adabiyotlarni qiynalmay topish imkoniyatiga ega boʻldilar.

55-sonli umutaʼlim maktabi oʻquvchilari kutubxona faoliyatini koʻzdan kechirish barobarida kutubxonaga yangidan olib kelingan badiiy adabiyotlar bilan tanishishdi.

Aytish kerakki, bugungi kunda yoshlarning adabiyotlarga boʻlgan talabi juda yuqori. Ilim olishni istagan har bir kitobxon ilmiy yoki badiiy adabiyot boʻlishidan qatʼiy nazar izlagan kitobini Axborot-kutubxona markazidan tezda topa oladi. Shu sababdan ham boʻlsa kerak, kutubxona foydalanuvchilari kundan kunga koʻpaymoqda.

Amudaryo tumani aholisining 28 foizini yoshlar tashkil etadi. Axborot-kutubxona markazi faoliyatidan foydalanuvchi kitobxonlar esa 13 ming 643 nafarni tashkil qiladi.

Kutubxona fondini yanada boyitish maqsadida mehnat faxriylari, yozuvchi va jurnalistlar oʻz kitoblarini sovgʻa qilib, adabiyotlarning yanada koʻpayishiga oʻz hissalarini koʻshib kelishmoqda.

Hozirga kunda Axborot-kutubxona markazining umumiy fondi 19 ming 421 nomdagi 64 ming 41 nusxa kitobdan iborat boʻlib, shundan badiiy adabiyotlar 45 ming 966 nusxani, fan sohalariga oid kitoblar 17 ming 773 nusxani, gazeta, jurnal va elektron kitoblar esa 302 nusxani tashkil etadi.

Muhtaram Prezidentimiz “Kitobsiz taraqqiyotga, yuksak maʼnaviyatga erishib boʻlmaydi. Dunyodagi har qaysi davlat, har qaysi millat birinchi navbatda oʻzining intellektual salohiyati, yuksak maʼnaviyati bilan qudratlidir. Bunday yengilmas kuch manbai esa, avvalo, insoniyat tafakkurining buyuk kashfiyoti – kitob va kutubxonalarda”, – deb taʼkidlagan edilar.

Darhaqiqat, kitobxonlikni keng targʻib qilish maqsadida oʻtkazilayotgan tanlovlar, ijodiy kechalar, turli xil aktsiyalar ziyrak kitobxonlarni kashf etishda muhim vosita boʻlib xizmat qilmoqda.

 F.Eshimbetova.