Ахборот-кутубхона маркази китобхонлар хизматида

Ўзбекистон Республикаси Олий Мажлиси ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган Амударё телевидениеси таҳририятининг “Юксак маънавиятли ва аҳлоқли ёшлар − келажак пойдевори” номли грант лойиҳаси доирасида ёшларнинг бўш вақтини мазмунли ўтказишга, уларни мафкура майдонининг турли ҳуружларидан ҳимоя қилишга маънавий дунёсини бойитишга хизмат қилувчи кўплаб тадбирлар ташкил этилмоқда.

Жумладан, 23 январь куни ёшлар ўртасида китобхонликни кенг тарғиб қилиш мақсадида Амударё тумани Ахборот-кутубхона марказига 55-сонли мактаб ўқувчилари иштирокида экскурсия уюштирилди.

Маълумки, Ўзбекистон Республикаси Президентининг 2019 йил 7 июндаги “Ўзбекистон Республикаси аҳолисига ахборот-кутубхона хизматини кўрсатишни янада такомиллаштириш туғрисида”ги қарори қабул қилингин эди. Мазкур қарор ижросини таъминлаш мақсадида Амударё туманида 2019 йилда Ахборот-кутубхона маркази фаолияти йўлга қўйилди.

Кутубхонининг эски биноси туман Маданият бўлими маркази биносида жойлашган эди. Амударё тумани ҳокимлигининг 2022 йил 16 декабрь кунги қарорига асосан ахборот-кутубхона маркази учун Ойбек маҳалласи ҳудудидан янги бино ажратилди.

Янги бинода китобхонлар учун барча шароитлар яратилган бўлиб, бу ердан улар исталган турдаги бадиий ва илмий адабиётларни қийналмай топиш имкониятига эга бўлдилар.

55-сонли умутаълим мактаби ўқувчилари кутубхона фаолиятини кўздан кечириш баробарида кутубхонага янгидан олиб келинган бадиий адабиётлар билан танишишди.

Айтиш керакки, бугунги кунда ёшларнинг адабиётларга бўлган талаби жуда юқори. Илим олишни истаган ҳар бир китобхон илмий ёки бадиий адабиёт бўлишидан қатъий назар излаган китобини Ахборот-кутубхона марказидан тезда топа олади. Шу сабабдан ҳам бўлса керак, кутубхона фойдаланувчилари кундан кунга кўпаймоқда.

Амударё тумани аҳолисининг 28 фоизини ёшлар ташкил этади. Ахборот-кутубхона маркази фаолиятидан фойдаланувчи китобхонлар эса 13 минг 643 нафарни ташкил қилади.

Кутубхона фондини янада бойитиш мақсадида меҳнат фахрийлари, ёзувчи ва журналистлар ўз китобларини совға қилиб, адабиётларнинг янада кўпайишига ўз ҳиссаларини кўшиб келишмоқда.

Ҳозирга кунда Ахборот-кутубхона марказининг умумий фонди 19 минг 421 номдаги 64 минг 41 нусха китобдан иборат бўлиб, шундан бадиий адабиётлар 45 минг 966 нусхани, фан соҳаларига оид китоблар 17 минг 773 нусхани, газета, журнал ва электрон китоблар эса 302 нусхани ташкил этади.

Муҳтарам Президентимиз “Китобсиз тараққиётга, юксак маънавиятга эришиб бўлмайди. Дунёдаги ҳар қайси давлат, ҳар қайси миллат биринчи навбатда ўзининг интеллектуал салоҳияти, юксак маънавияти билан қудратлидир. Бундай енгилмас куч манбаи эса, аввало, инсоният тафаккурининг буюк кашфиёти – китоб ва кутубхоналарда”, – деб таъкидлаган эдилар.

Дарҳақиқат, китобхонликни кенг тарғиб қилиш мақсадида ўтказилаётган танловлар, ижодий кечалар, турли хил акциялар зийрак китобхонларни кашф этишда муҳим восита бўлиб хизмат қилмоқда.

 Ф.Эшимбетова.