SPORT MAKTABI TRENERLARI OʻRTASIDA STOL TENNISI VA MINI-FUTBOL BOʻYIChA MUSOBAQALAR OʻTKAZILDI

Prezidentimizning 2021-yil 5-noyabrdagi “Yurish, yugurish, mini-futbol, badminton, stritbol va «Workout» sport turlarini yanada rivojlantirish chora-tadbirlari toʻgʻrisida”gi Qarori ijrosini taʼminlash maqsadida Amudaryo tumani Sport maktabi trenerlari, xodimlari oʻrtasida sport musobaqalari oʻtkazildi.

Musobaqalarda sport maktabi direktori Charsham Tojimurodov ishtirok etdi va maktabda mazkur Qaror ijrosini taʼminlash borasida amalga oshirilayotgan ishlar xususida keng toʻxtaldi.

Sportning barcha turlari bilan shugʻullanish uchun sport maktabida yetarli shart-sharoitlar yaratilgani, zamonaviy sport anjomlari bilan taʼminlangani, shuningdek, chekka hududlarda ham sportni rivojlantirish va ommalashtirish maqsadida oʻtkazilayotgan tadbirlar samarasi tuman sportchilarining turli musobaqalardagi yutuqlari misolida namoyon boʻlayotgani haqida soʻzlab, bu galgi musobaqalarda ishtirok etayotgan maktab xodimlari, trenerlarga omad tiladi.

Dastlab sportning stol tennis turi boʻyicha oʻtkazilgan musobaqalarda 52 nafar xodim ishtirok etishdi. Mahoratli murabbiylar, turli nufuzli musobaqalar gʻoliblari boʻlgan yosh sportchilarga stol tennis turining sirlarini oʻrgatgan tajribali trenerlar oʻrtasida kechgan bahslar juda qizgʻin boʻldi. Biri-biridan mohirligini, abjir va chaqqonligini koʻrsatishga harakat qilib, gʻoliblik uchun intilishdi. Musobaqa yakunida raqiblarini yengishga erishgan sport maktabi direktori oʻrinbosari Bahrom Soatov 1-oʻrin sohibi boʻldi. Ushbu sport turi boʻyicha oʻzi mahoratini sinab koʻrgan maktabning shaxmat sporti treneri Zafar Qurbonov 2-oʻrinni, futbol boʻyicha trener Temur Sobirov esa 3-oʻrinni egalladi.

Stol tennis boʻyicha musobaqa Sport maktabining trener ayol-qizlari oʻrtasida ham bahslarga boy tarzda oʻtdi. Natijalarga koʻra maktabning badminton sporti boʻyicha treneri Zuhra Shomurodova 1-oʻrin, Ibodat Sharifboyeva 2-oʻrin, Umida Bozorboyeva hamda badiiy gimnastika murabbiysi Shahodat Rajabovalar 3-oʻrin sovrindorlari deb topildilar.

Shu kuni Prezidentimizning 2021-yil 5-noyabrdagi “Yurish, yugurish, mini-futbol, badminton, stritbol va «Workout» sport turlarini yanada rivojlantirish chora-tadbirlari toʻgʻrisida”gi Qarori ijrosini taʼminlash maqsadida sportning mini-futbol turi boʻyicha musobaqa oʻtkazildi.

Tuman sport maktabi ochiq birinchiligi uchun oʻtkazilgan ushbu musobaqalarda 15-16 yoshdagi oʻsmirlardan tashkil topgan jamoalar bellashishdi. Musobaqalarda 7 ta jamoa ishtirok etib, maydonda toʻp surish boʻyicha mahoratlarini koʻrsatishdi.

Bahslarga boy tarzda, qiziqarli oʻtgan musobaqa tuman Sport maktabining futbol treneri Temur Sobirov jamoasining gʻalabasi bilan yakunlandi. Shuningdek, 7 ta jamoa ichida 32-sonli maktab jamoasi 2-oʻrin, 11-sonli maktab jamoasi 3-oʻrin gʻolibi deb topildi.

Sport maktabi xodimlari, trenerlari oʻrtasida boʻlib oʻtgan sport musobaqalari gʻolib va sovrindorlariga maʼmuriyat tomonidan faxriy yorliq va esdalik sovgʻalari topshirildi.

O.Xudoyberganova.