XALQQA MADANIY XIZMAT KOʻRSATISh SIFATI OShMOQDA

Yurtimizda madaniyat va sanʼatning jamiyatimiz ijtimoiy-maʼnaviy hayotida tutgan oʻrnini hisobga olgan holda va soha xodimlarini qoʻllab-quvvatlash maqsadida 15-aprel – Madaniyat va sanʼat xodimlari kuni sifatida nishonlanadi.

Madaniyat, sanʼat sohasi xalqimiz maʼnaviyatini yuksaltirish, koʻngilli madaniy dam olishini taʼminlash, yosh avlod ongida milliy va umuminsoniy qadriyatlarga hurmat hissini shakllantirishga xizmat qiladi. Asrlar osha yashab kelayotgan xalq qoʻshiqlari, termalari, aytishuvlari turli raqslari barchaga ruhiy quvvat bagʻishlaydi, ajdodlarimizning naqadar zukko, bilimdon va qobiliyatli boʻlganligini dalillaydi.

Xalqqa madaniy xizmat koʻrsatayotgan tuman Madaniyat va turizm boʻlimi tasarrufida ayni kunda 1 ta tuman Madaniyat markazi, 6 ta hududiy madaniyat markazlari, “Uchqun” ashula va raqs xalq ansambli, “Ofarin” folklor-etnografik xalq  ansambli, “Jayxun moʻʼjizasi” anʼanaviy sahna-tsirk xalq havaskorlik jamoasi, 2 ta Bolalar musiqa va sanʼat maktablari, 1 ta maxsus koʻzi ojizlar kutubxonasi, 1 ta Madaniyat va istirohat bogʻi bor.

Madaniy-ommaviy tadbirlarning chuqur gʻoyaviy mazmun bilan boyitilishini taʼminlash maqsadida boʻlimimiz ijodiy uyushmalar va jamoat tashkilotlari bilan yaqin hamkorlikni yoʻlga qoʻydi. Shuningdek, yoshlarni qoʻllab-quvvatlash, boʻsh vaqtlarini mazmunli tashkil etish, sanʼatga yoshlarning qiziqishlarini oshirish va iqtidorlarini yuksaltirish maqsadida joriy yilda 7 ta madaniyat markazlarida qoʻshimcha toʻgaraklar tashkil etildi.

Hozirgi kunda boʻlim Madaniyat markazlaridagi 21 ta havaskorlik toʻgaraklarida 240 nafar, qoʻshimcha 12 ta toʻgaraklarda esa 180 nafar turli yoshdagi yigit-qizlar sanʼat sirlarini oʻrganishmoqda. Maqom, sahna-tsirki, raqs, badiiy oʻqish, baxshichilik, estrada qoʻshiqchiligi, masxarabozlik toʻgaraklariga yoshlarning qiziqishlari juda yuqori.

2023-yil ilk kunlarida “Uchqun” ashula va raqs xalq ansambli, “Ofarin” folklor-etnografik jamoasi, “Jayhun moʻʼjizasi” anʼanaviy sahna- tsirk havaskorlik jamoasi va barcha madaniyat markazlarida faoliyat yuritayotgan toʻgaraklar aʼzolarining hisobot kontsertlari yuksak saviyada oʻtkazildi va tomoshabinlarda ulkan taassurotlar qoldirdi.

Shuningdek, joriy yilimizning birinchi choragidagi 14-yanvar – Vatan himoyachilari kuni, Alisher Navoiy va Zahiriddin Muhammad Bobur tavallud kunlari, 8-mart – Xalqaro xotin-qizlar kuni, 21-mart, Navroʻz – umumxalq bayrami munosabati bilan tadbirlar tashkillashtirilib, teatrlashtirilgan kontsert dasturlari namoyish etildi va bu xalqimizga manzur boʻldi. Tumanimizning barcha hududlarida “Yangi Oʻzbekistonda el aziz, inson aziz” shiori ostida oʻtkazilayotgan “Uch avlod uchrashuvi” madaniy-maʼrifiy, musiqiy tadbirlarimizning nufuzi oshmoqda va tobora koʻproq aholini qamrab olmoqda.

Shu yil 9-mart  kuni tuman Madaniyat markazi tomoshalar zalida oʻtkazilgan “Ijodimiz – senga, Vatan!” shiori ostida yosh ijodkorlar koʻrik-tanlovi sanʼatda isteʼdodli yoshlar juda koʻp ekanligini koʻrsatdi.

Quvonarlisi, oʻtkazilayotgan ommaviy bayram tadbirlarida ayon boʻlayotganiday, isteʼdodli yoshlar safi tobora ortayapti. Ular tumanimiz madaniyati va sanʼati sharafini yuqori koʻtarishiga ishonchimiz komil.

Ikromjon SIYTIMOV,

tuman Madaniyat va turizm boʻlimi mudiri.