“TAShABBUSLI BYuDJET” ORQALI KOʻPGINA IJTIMOIY MUAMMOLAR HAL QILINAYaPTI

Mamlakatimizda byudjet mablagʻlarining maʼlum qismini jamoatchilik fikri asosida yoʻnaltirish, tashabbusli byudjetlashtirish tizimi izchil davom ettirilmoqda. Fuqarolarning byudjet mablagʻlarining bir qismi sarflanishida ishtirok etayotgani hududlardagi eng dolzarb muammolarning ijobiy hal etilib, odamlarning ertagi kunga ishonchini oshirishda muhim omil boʻlmoqda. Boisi, tashabbusli byudjetlashtirish bu aholining byudjet mablagʻlarining maʼlum qismini sarflash maqsadidagi tashabbuslarini ilgari surishi orqali mahalliy boshqaruvda toʻgʻridan toʻgʻri ishtirok etishini taʼminlaydi.

Buning uchun 18 yoshdan oshgan tashabbuskor fuqarolar yakka yoki guruh boʻlib loyiha taklif qilishi kerak. Ushbu loyihalar ekspertizadan oʻtkazilib, saralanadi va ovoz berishga qoʻyiladi. Eng koʻp ovoz toʻplagan loyihalar moliyalashtiriladi.

Amudaryo tumani aholisi ham ushbu jarayonda faol ishtirok etib, eng dolzarb loyihalarni ilgari surib, gʻolib boʻlib, turmushidagi koʻpgina muammolarning hal boʻlishiga erishmoqdalar.

Oʻtgan 2022-yilda “Ochiq byudjet” axborot portalida oʻtkazilgan “Tashabbusli byudjet” jarayonida ishtirok etgan tumanimizning faol fuqarolari 1-bosqichida oʻzlarining loyihalarini ilgari surib, 9 ta ijtimoiy muammolarning hal etilishga erishdilar. Tumanimiz infaratuzilmasini rivojlantirish loyihalariga fuqarolarning tashabbuslari asosida byudjet mablagʻlari ajratilib, loyihalar muvaffaqiyatli amalga oshirildi. Yaʼni, gʻolib chiqqan 9 ta loyiha uchun 4 mlrd. 720 million soʻm ajratildi.

Ushbu loyihalardan biri Toʻlqin ovulidan oʻtgan ulkan asfalt yoʻl boʻyiga piyodalar yoʻlakchasi qurish edi. 33-sonli maktabga qatnovchi oʻquvchilar, ovul fuqarolari uchun yoʻl boʻyida yoʻlakcha yoʻqligi yoʻlda harakatlanganda ancha noqulayliklar tugʻdirib kelayotgan edi. Ovul faol fuqarolari “Ochiq byudjet” portalidagi “Tashabbusli byudjet” jarayonida ushbu loyihani ilgari surib, gʻolib boʻldilar. Piyodalar yoʻlakchasi “Jayxun Master Stroy” masʼuliyati cheklangan jamiyati tomonidan sifatli qurib bitkazildi va foydalanishga topshirildi.

Shuningdek, Arnaboʻyi mahallasidagi 33-sonli maktabgacha taʼlim tashkilotini joriy taʼmirlash boʻyicha taqdim etilgan loyiha ham fuqarolarning faolligi tufayli gʻolib boʻldi va muassasa 299 million soʻm mablagʻ evaziga joriy taʼmirlandi. Ikkinchi bosqichda esa 6 ta loyiha gʻolib deb topildi va ushbu ijtimoiy muammolar ijobiy hal etilishi uchun 5 milliard 799 million 500 ming soʻm sarflandi.

Amudaryoliklar “Ochiq byudjet” portalidagi “Tashabbusli byudjet” jarayonida joriy yilda ham oʻz hududlaridagi turli yechimini kutayotgan muammolar bilan ishtirok etishdi. Bu boradagi takliflarning 16 tasi gʻolib boʻldi.

Endilikda ushbu loyihalar moliyalashtirilib, hududlardagi elektr tarmoqlarini yangidan tortish, maktablar binolarini mukammal va joriy taʼmirlash, qoʻshimcha bino qurish, isitish tizimini taʼmirlash, yoʻllarga tosh, asfalt yotqizish kabi ijtimoiy ahamiyatga molik ishlar amalga oshiriladi. Ayni kunlarda mazkur loyihalarning loyiha-smeta hujjatlari ishlab chiqilmoqda.

Eʼtiborli jihati, joriy yilda birinchi bosqichda gʻolib boʻlgan loyihalarning 5 tasida umumiy oʻrta taʼlim maktablarini joriy, kapital taʼmirlash, isitish tizimini yangilash va qoʻshimcha bino qurish tashabbuslari ilgari surilgan. Bu – oʻsib kelayotgan yosh avlodning sifatli taʼlim olishi, boʻsh vaqtlarini mazmunli, maqsadli oʻtkazishiga imkoniyat yaratish maqsadida rejalashtirilgan xayrli loyihalardir.

Oygul RAJABOVA