MAHORATLI MUSIQA OʻQITUVChISI

Cholgʻu ijrochiligida pedagogik faoliyat olib borayotgan ustozlarning ishi murakkab jarayon hisoblanadi. Musiqa maktablarida oʻquvchilarning psixologiyasi, qobiliyati va isteʼdodini chuqur oʻrgangan holda ijro dasturini tanlash va unga jalb qilish yaxshigina tajriba talab qiladi. Masʼuliyatli kasb egasi, tumanimizdagi 21-sonli Bolalar musiqa va sanʼat maktabi oʻqituvchisi Komiljon Murotov bu borada 40 yillik katta tajriba ega mahoratli ustozlardandir.

U 1965-yilda tugʻilgan. Maktab taʼlimidan soʻng, 1980-1984-yillarda Japaq Shomuratov nomidagi Nukus davlat sanʼat bilim yurtini tugatgan. 1987-1992-yillarda A.Qodiriy nomidagi Toshkent davlat Madaniyat instituti (hozirgi Oʻzbekiston davlat sanʼat va madaniyat instituti)da oliy taʼlim olgan. Oliygohni tugatgach, 1984-1998-yillarda Hamza nomidagi Bolalar musiqa va sanʼat maktabida prima rubobi boʻyicha oʻqituvchi boʻlib ishlagan. 1998-2015-yillarda tumanning 21-sonli Bolalar musiqa va sanʼat maktabida ishlay boshladi.

Komiljon Muratov oʻz ish faoliyati davomida samarali mehnati uchun bir necha bor Qoraqalpogʻiston Respublikasi madaniyat vazirligi, tuman hokimligining Faxriy yorliqlari bilan taqdirlangan.

– Komiljon Murotov bugungi kunda oʻzining ijrochilik mahorati va oʻqituvchilik uslubi bilan alohida ajralib turadigan tajribali mutaxassislardan biri, – deydi “Qoraqalpogʻistonda xizmat koʻrsatgan madaniyat xodimi”, birinchi darajali Mehnat faxriysi, Xalq taʼlimi aʼlochisi Gulmirza Nurmatov. – U Qoraqalpogʻiston musiqa madaniyatiga ulkan hissa qoʻshmoqda.

Tinimsiz izlanishdan va mehnat qilishdan toʻxtamaydigan Komiljon Murotovning shogirdlaridan X.Vaisov va Oʻ.Jumaniyozovlar ustoz yoʻlini davom ettirib, pedagog sifatida ish faoliyatini olib bormoqdalar. Xursand Vaisov Ellikqalʼadagi ixtisoslashtirilgan sanʼat maktabida prima rubobi sinfida taʼlim berib, bir qator yutuqlarga erishib kelayotgan boʻlsa, Oʻ.Jumaniyozov Qoraqalpogʻiston va Oʻzbekiston sahnalarida namoyish etgan koʻplab kontsertlari, tanlovlarda muvaffaqiyatli chiqishlari bilan musiqa shinavandalari koʻnglidan joy oldi. Hozirgi kunda u Oʻzbekiston davlat konservatoriyasining Nukus filiali prima rubobi sinfida dars berib kelmoqda.

Komiljon Murotovning bolalar musiqa va sanʼat maktabi oʻquvchilari bilan ishlash uslubi juda ibratli. Uning oʻquvchilar psixologiyasidan kelib chiqib, toʻgʻri ijro dasturini tanlash, koʻrik-tanlovlarga tayyorlash kabi muhim vazifalarni yuksak mahorat bilan bajarishi koʻpchilikka namuna boʻla oladi. 

Oʻktam Jumaniyozov,

21-sonli Bolalar musiqa va sanʼat maktabi oʻqituvchisi.