JINOYaTChILIK, HUQUQBUZARLIKLARGA QARShI KURASh SAMARADORLIGINI OShIRIShGA OID YIGʻILISh OʻTKAZILDI

Mamlakatimizda huquqbuzarliklar, jinoyatlarga qarshi kurash samaradorligiga erishish, oilalarda sogʻlom turmush tarzi barqarorligini taʼminlash maqsadida mahallalar “qizil”, “sariq”, “yashil” toifalarga ajratilib, eng ogʻir va nizoli vaziyatlarning huquqbuzarlikka aylanishiga yoʻl qoʻymaslik uchun ularni mahallalarning oʻzidayoq bartaraf etish ishlari olib borilmoqda, aholining ijtimoiy holatini yaxshilash borasida tizimli ishlar, profilaktik chor-tadbirlar amalga oshirilmoqda. Huquqbuzarliklarga qarshi “mahallabay” tarzda kurashish maqsadida “qizil”, “yashil”, “sariq” toifalarga ajratish – manzilli profilaktikani amalga oshirish imkonini bermoqda.

Amudaryo tumani hokimligining majlislar zalida mahalla fuqarolar yigʻinlari raislari, xotin-qizlar faollari, yoshlar yetakchilari ishtirokida “qizil”, “sariq”, toifaga kiritilgan mahallalarda huquqbuzarliklar, mayda oʻgʻirliklar sodir boʻlishining oldini olish va “yashil” toifaga oʻtkazishga erishish vazifalarini muhokama qilish maqsadida yigʻilish boʻlib oʻtdi.

Yigʻilishda Oʻzbekiston Respublikasi Milliy gvardiyasining Qoraqalpogʻiston Respublikasi Qoʻriqlash boshqarmasi, 4-sektor masʼullari ishtirok etdilar.

Yigʻilishni 4-sektor boshligʻi, tuman soliq qoʻmitasi raisi Aydos Seyitov ochdi va olib bordi. U oʻz soʻzida 4-sektor hududidagi “qizil”, “sariq” toifadagi mahallalarda jinoyatchilik, huquqbuzarliklar sodir etilishining oldini olish borasida olib borilayotgan ishlarga keng toʻxtaldi. Bu borada hamkor tashkilotlar Ichki ishlar, Milliy gvardiya, prokuratura, Qoʻriqlash xizmati xodimlarining birgalikda olib borayotgan profilaktik ishlarini yanada kuchaytirish, nizoli oilalarning ahil yashab ketishiga erishish, qoʻni-qoʻshni, mahalladoshlarning oʻzaro ahil-inoq yashashini taʼminlash, bunda koʻp asrlik milliy qadriyatlarimizni, urf-odatlarimizni aholiga singdirishda keksa yoshdagi nuroniylarning koʻmagidan, oʻgit-nasihatlaridan foydalanish lozimligiga keng toʻxtaldi.

Tuman Qoʻriqlash boʻlimi boshligʻi, mayor Qanatbay Ramanov hududlarda oʻgʻirlik, huquqbuzarliklar sodir etilishining oldini olishda xonadonlar, yakka tartibdagi uylar qoʻrigʻi, mahallalar hududidagi obʼektlar qoʻrigʻi muhim ahamiyat kasb etishini taʼkidladi. Shuningdek, videokuzatuv bilan jihozlanishi ham eʼtiborga molik ekanligini, mahallalarda jinoyatchilik, huquqbuzarliklarning oldini olishda mahalla fuqarolar yigʻinlari masʼullari hamkor tashkilotlar bilan oʻzaro ishlashishni yaxshilashi lozimligini qayd etdi.

Yigʻilishda hududlardagi jinoyat oʻchoqlarini tugatishda “xavfsiz xonadon”, “xavfsiz hovli” tizimini yoʻlga qoʻyish, nizoli oilalar va muammoli shaxslar bilan “mahallabay”, “oilabay” va “fuqarobay” ijtimoiy profilaktika ishlarini samarali olib borish lozimligi, bunda qoʻriqlash xizmati imkoniyatlaridan keng foydalanish, videokuzatuv moslamalarini oʻrnatish afzalliklari keng targʻib etildi.

Yigʻilishda muhokama etilgan masalalar yuzasidan tegishli qarorlar qabul qilindi.

Oygul RAJABOVA.