BOYOVUL MAHALLASIDA ISTIQLOL ShUKUHI

Istiqlolimizning 32 yillik tantanasi yaqinlashayotgan ayni kunlarda mustaqil yurtimiz aro bayram shukuhi kezmoqda. Xalqimiz uchun aziz va qadrli boʻlgan Mustaqillik shunday ulugʻ neʼmatki, u oʻzimiz va oʻzligimizni, milliy anʼana va qadriyatlarimizni anglash imkonini berdi. U tufayli oʻzligimizga qaytib, milliy davlatchiligimiz, boy tariximiz va maʼnaviyatimiz, asosiysi, haq-huquq va qadr-qimmatga ega boʻldik. Diyorimizning har bir goʻshasidagi oʻzgarishlar, bunyodkorliklar, obodlik va farovonliklar hammasi mustaqillik bergan imkoniyatlar mevasidir.

Bayram yaqinlashayotgan ayni kunlarda har bir mahalladagi xonadonlardan tortib, taʼlim muassasalari, tashkilot va korxonalarda Vatanimiz mustaqilligining 32 yilligini munosib kutib olinayotgani, bunda ularga “Yangi hayot uchun, Yangi Oʻzbekiston uchun!” shiori yanada koʻtarinkilik baxsh etayotganini koʻrish mumkin.

17-avgust kuni Boyovul mahallasidagi 16-sonli ixtisoslashtirilgan davlat umumtaʼlim maktabi hovlisida fuqarolar yigʻini masʼullari va koʻchaboshchi ayollar tomonidan tashkil etilgan ”Qadriyatlarimiz – bebaho boyligimiz” nomli bayram tadbiri oʻtkazildi. Tadbirda tuman hokimi oʻrinbosari Goʻzal Soburova hamda fuqarolar yigʻini masʼullari, koʻchaboshchi va faol ayollar, mahalla aholisi, 16-sonli maktabning oʻqituvchi va oʻquvchilari ishtirok etishdi.

Tadbirga tashrif buyurganlar mahallada yashovchi hunarmandlarning qoʻl mehnatlari namunalaridan tashkil qilingan koʻrgazmani tomosha qildilar. Koʻrgazmaga qoʻyilgan milliy va zamonaviy ayollar liboslari, quroq koʻrpacha va yostiq jildlari, yumshoq oʻyinchoqlar, rangli iplardan toʻqilgan turfa gullar, uy-roʻzgʻor buyumlari, temirchilik mahsulotlari mehmonlarga nihoyatda manzur boʻldi.

Ochiq dasturxon atrofida tashkil etilgan bayram tadbirini fuqarolar yigʻini raisi Erkin Husainov ochib berdi va barchani mustaqillik bayrami bilan qizgʻin qutladi. Shuningdek, tuman hokimi oʻrinbosari Goʻzal Soburova va mahallaning yoshi ulugʻ nuroniylari ham soʻzga chiqib, istiqlol bergan neʼmatlar, imkoniyatlar haqida soʻz yuritdilar. Tumanimizda bugun yoshlarimiz barcha sharoitlar yaratilgan maktab va maktabgacha taʼlim tashkilotlarida taʼlim-tarbiya olishayotgani, koʻplab oilalar oʻzining zamonaviy tipdagi hovlisi, uy-joyi, yurtimizda ishlab chiqilgan yengil avtomashinasiga egaligini, mahallalarda tinchlik va totuvlik hukmronligi, xursandchilik, toʻy-tantana va bayramlar avjidaligi, bularning barchasi, mustaqillikning bizga bergan ulugʻ neʼmati ekanligini faxru-iftixor bilan soʻzlab oʻtishdi.

Shundan soʻng, 16-sonli maktab va mahallaning faol ayollari ishtirokida tayyorlangan bayram tomoshalariga navbat berildi. Ayollar sahna koʻrinishlarida milliy urf-odatlarimizga koʻra qiz tanlash, sovchi kutish, qiz uzatish kabi marosimlarni chiroyli tarzda ifodalab berishdi. Onaxonlar oʻz ijrolari orqali azaldan kelin-kuyov tanlash ota-onaning vazifasi hisoblangani, avval boʻlgʻusi kelin tanlanishi, bunda yoshlarning yulduzi toʻgʻri kelish-kelmasligi, qizning nasl-nasabi surishtirilishi, qiz topilgach, uning uyiga sovchilikka borilishini, toʻy marosimlarida keksa yoshli, baʼmani nuroniylar ishtiroki, ularning bosh boʻlishi zarur va oʻta muhim hisoblanishini koʻrsatib berishdi.

Kayvoni, gapga chechan onaxonlar ijrosidagi “Yor-yor” va “Kelin salom”lar, asrlar osha davom etib kelayotgan udumlarimiz ham yoshlarga nihoyatda manzur boʻldi. Dutorchi qiz Shohinur Madaminova chalgan kuy-navolar, oʻquvchi-qizlarning dilrabo raqslari bayram ishtirokchilariga xush kayfiyat ulashdi.

Mehmonlar bayram dasturxonidagi turli noz-neʼmatlar, milliy taomlardan tatib, shunday dorilomon kunlarga yetkazganiga shukronalar aytishdi, mustaqilligimiz abadiy boʻlishini tilab, duolar qilishdi.

Qiziqarli oʻtgan tadbir butun mahalla ahliga bayramona ruh, koʻtarinkilik baxsh etdi.

O.Xudoyberganova.