“Keksalar uchun turizm oyligi” doirasida Xiva shahriga sayohat tashkil etildi

Oʻzbekiston Respublikasi Vazirlar Mahkamasining 2020-yil 28-maydagi qarori bilan tasdiqlangan “Keksalarni davlat tomonidan qoʻllab-quvvatlash tizimini yanada takomillashtirish boʻyicha chora-tadbirlar dasturi”ga muvofiq mamlakat boʻylab keksa avlod vakillarini sayohat qilishga ragʻbatlantirish maqsadida “Keksalar uchun turizm oyligi”ni tashkil qilish vazifasi belgilangan. Shundan buyon har yili noyabr oyida keksalar uchun turizm oyligi oʻtkazib kelinadi.

Mazkur oylik doirasida barcha ovul va mahallalarda reja asosida keksa otaxonu-onaxonlar uchun diyorimizdagi diqqatga sazovor va tarixiy maskanlarga sayohatlar tashkil etiladi. Joriy yilda ham ushbu anʼanaga muvofiq amudaryolik nuroniylar mamlakatimiz boʻylab sayohatga chiqmoqdalar.

Mamlakatimizda bugungi kunda keksa avlod vakillarini ijtimoiy himoya qilish, ularga eʼtibor va gʻamxoʻrlikni kuchaytirish, ularning turmush sharoitini yaxshilash, faol va mazmunli hayot kechirishlarini taʼminlash, boy hayotiy tajribasidan keng foydalanishga alohida eʼtibor qaratilmoqda. Nuroniy otaxon va onaxonlarimizga qaratilayotgan eʼtiborni yanada kuchaytirish maqsadida 1-noyabrdan 30-noyabrgacha bir oy mobaynida tarixiy shaharlar va muqaddas qadamjolarga turli sayohatlar rejalashtirilgan.

Oylik doirasida 15-20-noyabr kunlari “Nuroniy” jamgʻarmasi Qoraqalpogʻiston Respublikasi boʻlimi hamda tuman boʻlimi tomonidan 50 nafar mehnat faxriylarining Xiva shahriga sayohati tashkil etildi.

Xiva shahridagi tarixiy obidalar hamda muqaddas qadamjolar qadimiy ziyoratgohlardan biri boʻlib, hozirda u yerga tashrif buyuruvchi ziyoratchilar soni tobora ortib bormoqda. Ziyoratgohga kelgan mehmonlar uchun barcha sharoitlar yaratilgan. Uzoq yillar davomida turli sohalarda samarali mehnat faoliyatini yuritgan, hozirda keksalik gashtini surayotgan otaxon va onaxonlar ushbu tarixiy maskanlarni ziyorat qilishib, bugungi dorilomon kunlarga shukronalar aytib, ajdodlarimiz ruhiga duolar qildilar.

Koʻrsatilayotgan alohida eʼtibor va gʻamxoʻrlikdan nihoyatda mamnun boʻlgan keksalar sayohat davomida Prezidentimizning tashabbusi bilan mamlakatimizda keksa avlod vakillarini har tomonlama qoʻllab-quvvatlash borasida amalga oshirilayotgan ishlar xususida suhbatlashib, oʻz fikr-mulohazalarini bildirishdi.

Shuningdek, ularning jamiyat, oilalar va mahallalarda tinchlik-osoyishtalikni taʼminlash hamda yosh avlodni xalqimizning koʻp asrlik anʼanalarini hurmat qilish ruhida tarbiyalashdagi rolini oshirishga qaratilgan keng koʻlamli islohotlar oʻz samarasini berayotgani, bularning hammasi yurtimizdagi rivojlanish, yuksalishlarda oʻz aksini topayotgani alohida taʼkidlandi.

Sayohatchilar Xiva shahridagi “Ichan qalʼa” tarixiy majmuasidagi barcha obidalar, muzeylar bilan taniib chiqqach, tushlik dasturxoni yozilib, mehmon qilindi.

Qoraqalpogʻiston Respublikasi “Nuroniylar” jamgʻarmasi va mazkur jamgʻarmaning tuman boʻlimi tomonidan tashkil etilgan sayohat davomida amudaryolik nuroniylar miriqib hordiq chiqardilar.

Ushbu sayohat mehnat faxriylarida katta taassurotlar qoldirib, ularning madaniy va maʼnaviy dam olishlariga imkon yaratdi. Sayohat yakunlangandan soʻng nuroniy faxriylar bu kabi eʼtibor hamda gʻamxoʻrlikdan gʻoyat xursand ekanliklarini bildirishib, tashkilotchilarga minnatdorchilik izhor etdilar.

Tuman hokimligi Axborot xizmati