IJTIMOIY SOHA OBʼEKTLARIDA ISITISh TIZIMLARI BARQAROR IShLAShIGA ERIShILADI
Har yili kuz-qish mavsumida ijtimoiy soha obʼektlarida gaz bosimi pasayib ketishi, isitish qozonxonalarining yaxshi ishlamasligi tufayli koʻpgina muammolar yuzaga kelar edi.
Joriy yildan boshlab mamlakatimizda ijtimoiy soha obʼektlarining isitish tizimlari bilan tadbirkorlar shugʻullanishi yoʻlga qoʻyildi. Bundan koʻzlangan maqsad isitish tizimlarining kuz-qish mavsumida barqaror ishlashini taʼminlash, ushbu obʼektlarga issiqlik energiyasini uzluksiz yetkazib berish va energiya resurslaridan samarali foydalanish, sohaga xususiy investitsiyalarni jalb qilishdan iboratdir.
Bu borada joriy yilning aprel oyida Prezidentning “Ijtimoiy soha obʼektlarining isitish tizimlarini davlat-xususiy sheriklik asosida modernizatsiya qilish toʻgʻrisida”gi Qarori qabul qilingan boʻlib, qaror ijrosi yuzasidan Amudaryo tumanida ham kuz-qish mavsumigacha muayyan ishlar olib borildi.
Tumandagi 38-sonli umumiy oʻrta taʼlim maktabi majlislar xonasida tumanda faoliyat yuritayotgan ijtimoiy soha obʼektlari rahbarlari va masʼul xodimlariga yigʻilish oʻtkazilib, ularga Prezident qaroriga muvofiq xususiy sheriklik asosida ijtimoiy soha obʼektlarining isitish tizimini yangilash va boshqarish borasida Andijon tajribasini Oʻzbekiston miqyosida joriy etilayotgani, isitish tizimlari tadbirkorga 10-yil muddatga berilishi va ularning xizmatlari davlat tomonidan sotib olinayotgani, bu boʻyicha loyiha-smeta hujjatlari ishlab chiqilayotgani boʻyicha keng tushuntirish berilgan edi.
“JKB ENERGY NUKUS GROUP” masʼuliyati cheklangan jamiyati bilan tumanda 125ta ijtimoiy soha obʼektlarini isitish boʻyicha shartnoma imzolangan boʻlib, shundan 26ta ijtimoiy soha obʼektlarini joriy yilda modernizatsiya qilish muvaffaqiyatli tugallandi.
Shu kungacha tuman Tibbiyot birlashmasiga qarashli Berdaq oilaviy shifokorlik punktiga 2 dona, shuningdek, maktabgacha taʼlim, umumiy oʻrta taʼlim tashkilotlaridan jami 26ta obʼektga 89ta isitish qozonxonalari oʻrnatilib, ishga tushirildi.
Davlat-xususiy sheriklik asosida isitish tizimlari yangilangan ijtimoiy soha obʼektlarida bugungi kunda normal harorat taʼminlanib, tizim uzluksiz ishlamoqda.
Xususan, Amudaryo tumani Tibbiyot birlashmasiga qarashli Berdaq oilaviy shifokorlik punktiga oʻrnatilgan Turkiya davlatiga ishlab chiqarilgan 2ta isitish qozonlari mazkur obʼektda sifatli ishlab, zarur haroratni yaratib turganligi quvonarlidir.
Shuningdek, 43-sonli maktabgacha taʼlim tashkilotiga oʻrnatilgan yangi isitish tizimi tufayli muassasada bolajonlar uchun qulay sharoit yaratilgan.
Mangʻit shahridagi 76-sonli, 55-sonli umumiy oʻrta taʼlim maktablari ham yangilangan isitish tizimi orqali isitilayapti. Ushbu taʼlim maskanlarida ham isitish tizimlari uzluksiz va bir maromda, kerakli haroratni taʼminlab bermoqda.
Kelgusida jami 125ta ijtimoiy soha obʼektlarida xuddi shunday yangilangan isitish tizimini joriy qilish koʻzda tutilgan. Xizmat qilish kafolati 15-yil boʻlgan Turkiyada ishlab chiqarilgan isitish qozonlari tumanimiz ijtimoiy soha obʼektlarida kuz-qish mavsumida uzluksiz va moʻʼtadil haroratni yaratib beradi.
Sevara ISMOILOVA
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
