Bosuv mahallasi – jinoyatchilik va huquqbuzarliklardan xoli hudud

Bugungi kunda yuksak taraqqiy etgan Yangi Oʻzbekistonni barpo etish yoʻlidagi saʼy-harakatlar izchillik bilan davom ettirilmoqda. Qator sohalarda erishilayotgan yuksak marralar ozod va obod yurtimizning nufuzini oshirayapti. Bunyodkor xalqimiz oʻz rivojlanish va taraqqiyot yoʻlidan dadil odamlab, tinch, osuda turmush kechirayapti.

Ana shunday farovon va erkin hayotimizni turli oqimlar va yovuz kuchlardan asrash, baxtiyor turmush barqaror boʻlishiga erishish bugungi kundagi eng dolzarb vazifalardan biriga aylangan. Chunki tinchlik, osoyishtalik hukm surgan yurtda yuksalish, taraqqiyot boʻladi. Shu boisdan-da globallashuv jarayoni shiddat bilan kechayotgan bugungi davrda ogohlik va sergaklik bilan yurtimizdagi osuda hayotining bardavom boʻlishiga xizmat qilish barchaning vazifasidir.

Bu boradagi Amudaryo tumanida amalga oshirilayotgan saʼy-harakatlarga munosib hissa qoʻshish maqsadida amunews.uz sayti tahririyati Oliy Majlis huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan “Mahallalarda, oilalarda ijtimoiy muhit barqarorligiga salbiy taʼsir koʻrsatuvchi holatlarning oldini olish” yoʻnalishidagi grant tanlovida “Sogʻlom muhit – sogʻlom hayot” nomli loyihasi bilan qatnashib, gʻolib boʻldi va ayni kunlarda mazkur loyihani muvaffaqiyatli amalga oshirib kelmoqda.

Grant loyihasi ish rejasida mahalla ahli, ayniqsa yoshlar oʻrtasida jinoyatchilikning oldini olish, jinoyat sodir qilishga moyil, muqaddam sudlangan va jinoyat sodir qilgan shaxslar bilan ishlashish borasida boshqalarga oʻrnak boʻlayotgan ovul va mahalla fuqarolar yigʻinlari faoliyatini keng targʻib qilish vazifasi ham koʻzda tutilgan. 19-dekabr kuni tahririyat xodimlari ana shunday mahallalardan biri – Bosuv mahallasida boʻlib, bu borada amalga oshirilayotgan ishlar bilan yaqindan tanishdi.

Aytish joizki, ushbu mahallada 730ta xonadonda 900ta oilalar istiqomat qiladi. Oʻzbek, qoraqalpoq, qozoq, qirgʻiz, rus millatiga mansub 3 ming 720 nafar aholining 1 ming 655 nafarini 30 yoshgacha boʻlganlar tashkil etadi.

Mahallada yosh avlodni komil insonlar qilib voyaga yetkazish, hayotda oʻz oʻrinlarini topishlari uchun ularning ilm olishlari, kasb-hunar oʻrganishlari uchun mahalla, oila va taʼlim muassasasi oʻrtasida mustahkam hamkorlik oʻrnatilgan. Oilalarda dunyoga kelgan farzandlarni milliy urf-odatlarimiz, qadriyatlarimizga hurmat ruhida, bir-biriga mehr-oqibatli qilib voyaga yetkazishga alohida eʼtibor qaratilmoqda. Taʼlim-tarbiyani bugungi kun talablari asosida olib borib, yuksak maʼnaviyatli, maʼrifatli qilib kamolga yetkazishga harakat qilishmoqda.

Bu haqda mahallada oʻtkazilgan tadbirda ham batafsil soʻz yuritildi. Tadbirda 26-sonli maktab direktorining maʼnaviy-maʼrifiy ishlar boʻyicha oʻrinbosari Hamida Ortiqova, amunews.uz sayti muxbiri – loyiha koordinatori Oygul Rajabova, hudud inspektor-psixologlari Husniddin Safarboyev, Dilshod Aminov, Bosuv mahalla fuqarolar yigʻini raisi Erkin Eshmurodov, xotin-qizlar faoli Dilfuza Abdullayeva, mahalla nuroniylari Hanifa Kamolova, Qurbonboy Bobojonov, Fayzulla Shukurullayev, yoshlar vakili Shahzoda Erdoshevalar kun tartibidagi masalalar yuzasidan fikr-mulohazalarini bildirdilar. Soʻzga chiqqanlar aholi, ayniqsa yoshlar orasida jinoyatchilik, huquqbuzarliklar sodir etilishini oldini olish borasidagi choralarni yana ham kuchaytirish lozimligini taʼkidladilar.

Aytish joizki, hududdagi 26-sonli umumiy oʻrta taʼlim maktabi tumanning eng ilgʻor taʼlim muassasalaridan biri hisoblanadi. 2022-2023 oʻquv yilida maktabning 18 nafar bitiruvchilarining 14 nafari oliy taʼlim muassasalarining talabalari boʻlishdi.

Muassasada maʼmuriyat tomonidan pedagogik jamoa, oʻquvchilar orasida sogʻlom maʼnaviy muhit yaratilganligi, tuman Ichki ishlar boʻlimida faoliyat yuritayotgan inspektor-psixolog Husniddin Safarboyevning oʻquvchi-yoshlar bilan yaxshi ish olib borayotganligi natijasida oʻquvchilar orasida tartibbuzarlik, huquqbuzarlik holatlari sodir etilishining oldi olinayapti. Mahalla fuqarolar yigʻini masʼullari, profilaktika inspektori ishtirokida hududda tinchlik-osoyishtalik barqaror boʻlishi yoʻlida tizimli ishlar amalga oshirilayapti. Natijada joriy yil davomida huquqbuzarlik, jinoyatchilik holatlari sodir etilmadi. Profilaktik hisobga olingan fuqarolar, yoshlar yoʻq.

Oʻtkazilgan tadbir davomida bu boradagi ishlarni yanada jonlantirish, tumanning boshqa ovul va mahallalari oʻrtasida ham ilgʻor tajribalarni keng ommalashtirish borasida fikrlar almashildi.

Sevara ISMOILOVA.